გუშინ ესპანურმა გამოცემამ „AS“ საინტერესო ინფორმაცია გაავრცელა. აღმოჩნდა რომ „ვალენსიას“ ქართველ მეკარე გიორგი მამარდაშვილთან კონტრაქტის გახანგრძლივების თაობაზე გარკვეული პრობლემები შეექმნა. კლუბსა და ფეხბურთელს შორის შეთანხმება უკვე მიღწეული იყო. მამარდაშვილი თანახმა იყო, რომ ხელშეკრულება 2027 წლამდე გაგრძელებულიყო და მისი გამოსასყიდი თანხა 100 მილიონი ევრო ყოფილიყო, მაგრამ აღმოჩნდა რომ ესპანურ კლუბს გარკვეული პრობლემები გააჩნია, რაც ე.წ. ფინანსური „ფეირ-ფლეის“ შესაძლო დარღვევას გულისხმობს.
თუ ქართველი „ვალენსიასთან“ ახალ ხელშეკრულებას მოაწერს ხელს, მისი ანაზღაურებაც გაიზრდება, რაც გუნდში სახელფასო თამასას კიდევ უფრო გაზრდის. ამ მდგომარეობაში „ვალენსიას“ ფეხბურთელთა გაყიდვა ესაჭიროება, რათა ახალი კონტრაქტებიც გააფორმოს და მოთამაშეებიც დაიმატოს.
ამ სიტუაციას ინტერესით აკვირდება „მანჩესტერ იუნაიტედი“. ქართველის გამოსასყიდი თანხა 20 მილიონი ევროა და მას საკმაოდ მცირე ხელფასიც აქვს. ინგლისური გუნდიდან მამარდაშვილს უკვე შეეხმიანნენ და პირველი კონტაქტიც დაამყარეს.
ცნობილი გახდა რომ 29 ივნისს, „დინამო“ ბათუმი ეროვნული ლიგის მეოცე ტურში „დინამო“ თბილისს უმასპინძლებს და ამ შეხვედრაში ხვიჩა კვარაცხელიას გაცილება შედგება. მატჩამდე გულშემატკივრების წინაშე კვარაცხელიას გააცილებენ, რომელიც 1 ივლისიდან „ნაპოლის“ შეუერთდება.
ხვიჩა კვარაცხელიამ „დინამო ბათუმის“ მაისურით 11 მატჩი ჩაატარა და 8 გოლის გატანა მოახერხა.
იტალიურმა გამოცემამ „Football Italia La Gazzetta dello Sport“ გაავრცელა ცნობა რომ კრიშტიანუ რონალდუს აგენტი ჟორჟე მენდეში მისი კლიენტისთვის ახალ კლუბს ეძებს.
რონალდუს ირგვლივ არაერთი ურთიერთგამომრიცხავი ინფორმაცია ვრცელდება. გადაჭრით ჯერჯერობით არაფრის თქმა არ შეიძლება, თუმცა სხვადასხვა სანდო გამოცემები თითქმის ყოველ დღე ახალ ინფორმაციებს ავრცელებენ.
პორტუგალიელს კარიერა „რომაში“, „ბაიერნში“, „ჩელსიში“ ან „სპორტინგში“ უნდა გაეგრძელებინა. იყო ტურინის „იუვენტუსში“ დაბრუნების გეგმაც. რონალდუს მომავალ სეზონში აუცილებლად ჩემპიონთა ლიგაში ასპარეზობა სურს.
დიდი ალბათობით უახლოეს დღეებში რონალდუს შესახებ მორიგი ინფორმაცია გავრცელდება. სავარაუდოდ, ზაფხულის დიდი ნაწილი ასე იქნება.
ბრაზილიელი ნეიმარის „ისტორია“კი გრძელდება. რამდენიმე დღის წინ, „პარი სენ ჟერმენის“ პრეზიდენტმა ნასერ ალ-ხელაიფიმ ფეხბურთელთან დაკავშირებით შემდეგი განცხადება გააკეთა:
„იქნება თუ არა ნეიმარი „პსჟ“-ს პროექტში? ამ თემაზე ღიად საუბარი არ შეიძლება. იქნებიან ფეხბურთელები, რომლებიც მოვლენ და ასევე წავლენ. ეს ყველაფერი კერძო მოლაპარაკებაა.“
გამოცემა „AS“-ის მტკიცებით, „იუვენტუსისა“ და „პარი სენ ჟერმენის“ წარმომადგენლები ერთმანეთს შეხვდნენ და ბრაზილიელის ტრანსფერზე ისაუბრეს, თუმცა ვერ შეთანხმდნენ, რადგან ტურინულ კლუბს 29 წლის შემტევის ხელფასის გადახდა არ შეუძლია.
თავის მხრივ, პარიზელებს ნეიმარის გაშვება სურთ, მაგრამ თავად ფეხბურთელი ამის წინააღმდეგია და შესანიშნავი ბერკეტიც აქვს. გასულ წელს მან „პსჟ“-სთან კონტრაქტი 2027 წლამდე გაახანგრძლივა და რეალურად ის ხელშეუხებელია. იმ შემთხვევაში, თუ ხელაიფი მას კონტრაქტს გაუწყვეტს, კონტრაქტის მიხედვით დარჩენილი მთლიანი ანაზღაურების გადახდა მოუწევს.
დღეს დიდ ბრიტანეთში, ჩოგბურთში უიმბლდონის ტურნირი იწყება. შეჯიბრების ორგანიზატორთა გადაწყვეტილებით, ტურნირის პირველ კვირა დღეს, რომელიც ადრე უქმე დღე იყო ხოლმე, ცენტრალურ კორტზე უფასო ბილეთები დაურიგდებათ უკრაინიდან ლტოლვილებს, რომლებიც ტურნირზე დასწრებას ისურვებენ. გარდა ამისა, უკრაინაში მიმდინარე ომის დროს დაზარალებულთა ფონდში, 250 ათასი სტერლინგი ჩაირიცხება.
უკრაინაში რუსეთის შეჭრის და მისთვის ბელარუსის მიერ დახმარების გაწევის გამო, უიმბლდონზე რუს და ბელარუს ჩოგბურთელებს თამაში აეკრძალათ. ამის გამო, ATP-ის და WTA-ის ტურებმა, ბალახის დიდი სლემის ტურნირს სარეიტინგო ქულები ჩამოართვეს.
ავტორი
