მთავარი არხის მიერ გავრცელებული ინფორმაციით, გორაბერეჟოულის საარჩევნო უბანზე არჩევნების შედეგები გაყალბდა.
მაუწყებელმა გაავრცელა ვიდეო, სადაც საუბნო კომისიის წევრის მიერ სამოქალაქო ტანსაცმელში მყოფი მამაკაცისთვის თეთრი პაკეტის გადაცემის ფაქტია ასახული.
აქვს თუ არა ადგილი არჩევნების შედეგების გაყალბებას ან ამომრჩევლის მოსყიდვას და რით შეიძლება აიხსნას აღნიშნული ვიდეო_ ამ კითხვებზე პასუხების მისაღებად „გურია ნიუსი“ საუბნო კომისიის თავმჯდომარეს გოჩა მეფარიშვილს, ჩოხატაურის მუნიციპალიტეტის მერის მოადგილეს, მინდია ჟღერიას და „ნაციონალური მოძრაობის“ ჩოხატაურის ადგილობრივი ორგანიზაციის თავმჯდომარეს, დიმიტრი კორიფაძეს ესაუბრა.
საუბნო კომისიის თავმჯდომარე ირწმუნება, რომ მან საარჩევნო უბანზე გაყალბება ვერ დაინახა და დარღვევის დანახვის შემთხვევაში, ვიდეოს გადამღებს საჩივრის დაწერის სრული უფლება ჰქონდა, რაც საარჩევნო უბანზე არ მომხდარა.
„არანაირი გაყალბება არ ყოფილა იქ, ვინც დაწერა ეს _ „მთავარმა არხმა“, „ნაციონალებმა“, რა თქმა უნდა, მათ ჰქონდათ საშუალება გასაჩივრების, რაც არ მომხდარა. ალბათ, კომენტარი მათ უნდა ჰკითხოთ, რა გადაიღეს, რა დადეს. იქ, რაც აჩვენეს, არის ჩემი საჭიროებისათვის რაღაც და არანაირ გაყალბებას არ ჰქონია. მე ვიყავი თავმჯდომარე და რეგისტრატორს ვაწოდებდი რაღაცას ჩემივე საჭიროებისთვის. მათ უნდა დაუსვათ შეკითხვა, რა იყო და რა უნდა უთხრან თავიანთ შვილებს, მე კი ვიცი, რასაც ვეტყვი ჩემს შვილებს. იქ იყო „ნაციონალების“ 3 წარმომადგენელი, ერთი „ლელოს“ წარმომადგენელი, ერთი „ლეიბორისტი“, ერთი „იურისტთა ასოციაცია“ და შეეკითხონ მათ, სად იყო გაყალბება. მე ვერ დავინახე“,_ გვპასუხობს გოჩა მეფარიშვილი.
ამ ფაქტს განსხვავებულად ხედავს „ნაციონალური მოძრაობის“ ჩოხატაურის ადგილობრივი ორგანიზაციის თავმჯდომარე დიმიტრი კორიფაძე.
კორიფაძის შეფასებით, ვიდეოში საუბნო საარჩევნო კომისიის წევრის მიერ ამომრჩევლისთვის თანხის გადაცემის ფაქტია ასახული. საარჩევნო უბანზე ჩანთის ქონაც კი დარღვევაა.
“ფაქტია რომ თანხა არის იმ ადამიანის ხელში. ჩანთა იქ არ უნდა იყოს. ამოიღო თანხა კომისიის წევრმა და გადასცა ალბათ ამომრჩეველს“,_ გვითხრა კორიფაძემ.
შეკითხვაზე _ რატომ არ დაიწერა ოფიციალური საჩივარი აღნიშნული შემთხვევის შესახებ, _ კორიფაძე გვპასუხობს, რომ არ იცის.
„არ ვიცი. ეს ვიდეო ახლა ვნახე. საჩივარი თვითონ უნდა დაეწერა იმას, ვინც გადაიღო, წარმომადგენელი იყო თუ კომისიის წევრი. ფაქტია, რომ ეს ხდებოდა საარჩევნო უბანში და ფაქტია, რომ ადამიანმა, რომელმაც მეორე ადამიანს გადასცა თანხა, არის საარჩევნო კომისიის წევრი და საგამოძიებო უწყებები მიხედავენ ალბათ“,_ გვითხრა კორიფაძემ.
ჩოხატაურის მუნიციპალიტეტის მერის მოადგილე მინდია ჟღერია კი გადაღებულ ვიდეოს „ნაციონალური მოძრაობის“ მიერ დადგმულ „სეირად“ აფასებს.
ჟღერია ამბობს, რომ არ იცის, ზუსტად რა ხდებოდა საარჩევნო უბნის შიგნით, მაგრამ თუ გაყალბების ან დარღვევის რაიმე ფაქტი შენიშნეს, კანონის შესაბამისად უნდა გაპროტესტებულიყო.
„მე ერთადერთი შეფასება ამ ფაქტთან დაკავშირებით შემიძლია ვთქვა, რომ ეს არის სეირი და მოგონილი ინფორმაცია, როგორც სჩვევიათ. მე კომისიის წევრი არ ვარ და შიგნით რა ხდებოდა, ამაზე ზუსტი ინფორმაცია არ მაქვს, მაგრამ, რაც შემიძლია ვთქვა, არის ის, რომ ეს სიმართლეს არ შეესაბამება. იქ არანაირ გაყალბებას და გაყალბების მცდელობას არ ჰქონია ადგილი და ჩატარდა აბსოლუტურად გამჭვირვალედ და დემოკრატიულად. თუ რაიმე შეამჩნიეს, არ დააფიქსირებდნენ მაშინვე, ან არ გააპროტესტებდნენ კანონის შესაბამისად? ის, რაც ვიდეოში ჩანს, ყუთისკენ საერთოდ არ მიდის ის ადამიანი, გამოდის გარეთ“, _ ამბობს მინდია ჟღერია.
ცესკოს მონაცემებით, გორაბერეჟოულის საარჩევნო უბანზე „ქართული ოცნების“ მაჟორიტარობის კანდიდატ ვასილ ჩიგოგიძეს 242 ხმა აქვს, „ნაციონალური მოძრაობა-გაერთიანებული ოპოზიციის“ კანდიდატ მანუჩარ კვირკველიას _ 65, მესამე ადგილს კი „პატრიოტთა ალიანსის“ კანდიდატი შოთა გოგიბერიძე იკავებს 15 ხმით.
