30 ოქტომბერს, დილის რვა საათზე, ოზურგეთის მუნიციპალიტეტის საარჩევნო პროცესი მშვიდ ვითარებაში დაიწყო.
ამ დღეს ოზურგეთელებს მუნიციპალიტეტის მერი უნდა აერჩია, ხოლო ოთხ საარჩევნო უბანში კი _ საკრებულოს წევრი.
“ყველაფერი მშვიდობიანად მიდის”, _ ასეთი კომენტარი გააკეთა დილის საათებში ოზურგეთის საოლქო საარჩევნო კომისიის თავმჯდომარემ ბერდია ლომიძემ.
“ქართული ოცნების” წევრის, გიორგი ღურჯუმელიძის თქმით, არჩევნები მშვიდობიან ვითარებაში მიმდინარეობდა და მოქალაქეებმა მშვიდ ვითარებაში გააკეთეს საკუთარი არჩევანი.
დამოუკიდებელი კანდიდატის კონსტანტინე შარაშენიძეს შტაბში “გურია ნიუსს” უთხრეს, რომ ქალაქ ოზურგეთის 60/01 საარჩევნო უბანზე ამომრჩეველმა ბიულეტენი პოზიციის დაფიქსირების შემდეგ დახია.
“ამომრჩეველმა თავისი პოზიციის დაფიქსირების შემდეგ საარჩევნო ბიულეტენს ფოტო გადაუღო, რასაც მოყვა მცირე კამათი. ამომრჩეველს უთხრეს, რომ მას ამის უფლება არ ჰქონდა, რის შემდეგ მან ბიულეტენი დახია”, _ გვითხრეს შტაბში.
შარაშენიძის შტაბში, ასევე, გვითხრეს, რომ ტრადიციულად, როგორც ყველა არჩევნებზე, მობილიზებულები არიან “ქართული ოცნების” კოორდინატორები და ე. წ. “ძველი ბიჭები”.
არჩევნების დღეს, “ერთიანი ნაციონალური მოძრაობის” წევრმა ბესო ქათამაძემ “გურია ნიუსთან” საუბრის დროს აღნიშნა, რომ ოზურგეთში საარჩევნო უბნებთან “ქართული ოცნების” კოორდინატორები ჭარბობენ ამომრჩეველს:
“ამ ეტაპზე რაიმე სახის დარღვევებს ადგილი არ ჰქონია. საარჩევნო უბნებზე გამოჩნდა ბეიჯიანი ხალხი საარჩევნო უბნის გარეთ, რაც წინა არჩევნებზე არ ყოფილა. ასევე, ამომრჩეველზე მეტი “ქართული ოცნების” კოორდინატორები არიან”, _ გვითხრა ბესო ქათამაძემ.
რაც შეეხება დამოუკიდებელი კანდიდატის კონსტანტინე შარაშენიძის მხარდამჭერების პოზიციას, ისინი მთელი დღის განმავლობაში აქტიურად ავრცელებდნენ ინფორმაციას, რომ საარჩევნო უბნებთან, ღია სივრცეში მიმდინარეობდა ამომრჩევლებისთვის ფულის გადაცემა, აგრეთვე, ზოგი მათგანის დაშინება.
პასუხისმგებლიანი ამომრჩევლები
30 ოქტომბერს ოთხ მაჟორიტარულ ოლქში მიმდინარეობდა არჩევნები. “გურია ნიუსი” დაბა ნარუჯაში და დაბა ლაითურში იმყოფებოდა. აქ “ერთიანი ნაციონალური მოძრაობის” დეპუტატობის კანდიდატი რაინდი დუმბაძე და “ქართული ოცნების” დეპუტატობის კანდიდატი გია ჩაგანავა იყრიდნენ კენჭს. პირველ ტურში ბარიერი ვერც ერთმა მათგანმა ვერ გადალახა.
საარჩევნო პროცესი მშვიდობიან ვითარებაში მიმდინარეობდა. როგორც დანარჩენ საარჩევნო უბნებზე, აქაც შეიმჩნეოდა ავტომობილების და “ქართული ოცნების” კოორდინატორების სიმრავლე.
ჩვენ ადგილობრივ მოსახლეობას ვესაუბრეთ და მათი პრობლემებით დავინტერესდით.
“რა პრობლემები? რამ უნდა შემაწუხოს? მე მაინტერესებს და მადარდებს ჩემი ბინა, რომლის სახურავიდან წყალი შემოდის და არავინ არ მაქცევს ყურადღებას. დაბა ნარუჯის მესამე რაიონში ვცხოვრობ. ადამიანებს მეტი ყურადღება რომ უნდა მიაქციოს ხელისუფლებამ, ამაზე ყოველ არჩევნებზე რატომ უნდა ვსაუბრობდეთ?!
მე პოლიტიკაში არ ვერევი. მინდა, რომ ყველა ვცხოვრობდეთ კარგად და რაც შეიძლება მეტი სასარგებლო საქმეები კეთდებოდეს სოფლებში. ერთი ის ვიცი, რომ ყველა სკამისთვის იბრძვის”, _ გვითხრა ქალმა, რომელმაც სახელი და გვარის დასახელებისგან თავი შეიკავა.
“გურია ნიუსთან” პოზიცია დააფიქსირა სტუდენტმა ზურაბ საგინაძემ:
“საქართველოში მცხოვრები ადამიანები უკვე ხვდებიან, რომ ცვლილებების დროა ყველგან. ზუსტადაც ამის გამო ჩამოვედი და ჩემი არჩევანი გავაკეთე.
აუცილებლად მოსაწესრიგებელია შიდა გზები. ასევე, კარგი იქნება სპორტული დარბაზი თუ გაკეთდება”.
დაბა ნარუჯაში მცხოვრებმა ერთ-ერთმა მამაკაცმა გვითხრა, რომ დაბაში ყველაზე უფრო აუცილებელი შიდა გზების მოწესრიგებაა:
“ასევე, ადამიანებს სამუშაო არ აქვთ. გვინდა, ისეთი ადამიანი მოვიდეს ხელისუფლებაში, რომელიც ხალხისთვის იქნება. ჩვენთან, ტრადიციულად, არჩევნების შემდეგ, ოპოზიციის და მთავრობის მხარდამჭერები კარგად ვაგრძელებთ ურთიერთობას. ერთი დაბის შვილები ვართ და ეს ასეც უნდა იყოს. ყველა ერთი კანდიდატის მხარდამჭერი ვერ ვიქნებით”, _ გვითხრა მან.
“ლაითურში რა ხდება? სტიქია იყო ერთი წლის წინ აქ და საცხოვრებელ ბინის შენობაზე სახურავი გადაგვიძრო. ეს პრობლემა დღემდე მოუგვარებელია და ვართ ასეთ დღეში”, _ გვითხრა ადგილობრივმა ეთერ შაინიძემ.
ჟუჟუნა სურმანიძე, დაბა ლაითურში მცხოვრები: “40 წლის განმავლობაში ყველა არჩევნებზე ვიყავი და ახლაც მოვედი. გაჭირვებული მუშისთვის არასდროს არ ყოფილა საშველი, მაგრამ ჩვენ მაინც დავდივართ და ჩვენს არჩევანს ვაკეთებთ. ხან გვიმართლებს და ხან _ არა”.
ორივე ქალბატონი ჩვენთან საუბრის დროს ამბობს, რომ რაც შეიძლება მეტი ახალგაზრდის დასაქმებაა საჭირო. მათი დიდი ნაწილი თურქეთში გადადიოდა სამუშაოდ, მაგრამ კორონავირუსის გამო, ახლა გაჭირდა გადასვლა.
ნარუჯაში და ლაითურში მთელი დღის განმავლობაში იმყოფებოდა “ერთიანი ნაციონალური მოძრაობის” წევრი ბესო ქათამაძე.
“აქ ახლა სიწყნარეა და მშვიდ ვითარებაში მიმდინარეობს საარჩევნო პროცესები. რეალობაში ეს არ არის არჩევნები _ ადამიანები თავისუფალ ნებას ვერ გამოხატავენ. “ქართული ოცნება” ყველაფერს კადრულობს, მაგრამ მე, პირადად, ხალხის იმედი მაქვს, რომ ისინი სამართლიან გადაწყვეტილებას მიიღებენ.
ისეთი საარჩევნო გარემოა, რომ ადამიანებმა სახე დაკარგეს. ბოლო 9 წლის განმავლობაში ეს არის ყველაზე მძიმე არჩევნები, რომელსაც “ქართული ოცნება” ატარებს.
მიდის ადამიანების აქტიური კონტროლი, როგორც ყოველთვის,”ქართული ოცნების” კოორდინატორები საარჩევნო უბნებზე აქტიურად მუშაობენ”, _ გვითხრა ბესო ქათამაძემ.
მეორე ტურის დასრულებიდან რამდენიმე საათში ცნობილი გახდა, რომ დაბა ნარუჯის და დაბა ლაითურის დეპუტატი ოზურგეთის მუნიციპალიტეტის საკრებულოში “ნაციონალური მოძრაობის” კანდიდატი რაინდი დუმბაძე გახდა. არჩევნების დასრულების შემდეგ მან “გურია ნიუსთან” კომენტარი გააკეთა:
“არსებულმა პრობლემებმა და ცუდმა მდგომარეობამ, რაც დაბა ნარუჯაში და დაბა ლაითურში იყო, მიმაღებინა გადაწყვეტილება, რომ ჩავრთულიყავი არჩევნებში.
ყველაზე მეტად მოსაგვარებელია ინფრასტრუქტურული და სოციალური პრობლემები. როდესაც დაიწყებს საკრებულო მუშაობას, აუცილებლად გავაჟღერებ ამ საკითხებს და ლეგიტიმურად ვაპირებ დავიცვა ჩემი ამომრჩევლების უფლებები”, _ გვითხრა რაინდი დუმბაძემ.
არჩევნების ღამე
30 ოქტომბერს, გვიან ღამით ოზურგეთის საოლქო საარჩევნო კომისიასთან გამოჩნდნენ “ქართული ოცნების” წევრები და მათი მერობის უკვე გამარჯვებული კანდიდატი ავთანდილ თალაკვაძე. ახალმა მერმა პირველი კომენტარი გააკეთა მედიის წარმომადგენლებთან:
“მადლობა ჩვენს მხარდამჭერებს, კოორდინატორებს, “ქართული ოცნების” გუნდის წევრებს ნდობისთვის. განსაკუთრებულ მადლობას ვუხდი ახალგაზრდებს ასეთი ჩართულობისთვის. ჩვენ მოვიგეთ დიდი უპირატესობით და შემდეგი 4 წელი იქნება ოზურგეთისთვის აღმშენებლობის და განვითარების წლები”, _ თქვა ავთანდილ თალაკვაძემ.
_ როგორც კონსტანტინე შარაშენიძე ამბობს, ოზურგეთში წინასაარჩევნო გარემო არათანაბარი კონკურენციის პირობებში მიმდინარეობდა. როგორ ფიქრობთ, ჩატარდა თუ არა არჩევნები თანაბრად კონკურენტულ გარემოში?_ ვკითხეთ ავთანდილ თალაკვაძეს, რაზეც მან გვიპასუხა, რომ შარაშენიძეს და “ნაციონალურ მოძრაობას” ოზურგეთმა უარი უთხრა:
_ ეს არის, ცალსახად სიცრუე. საზოგადოებამ კარგად დაინახა, რომ კონსტანტინე შარაშენიძე “ნაციონალურ მოძრაობასთან” ერთად მთელი ძალით ებღაუჭებოდა მერის სკამს, თუმცა, ოზურგეთმა უარი განუცხადა მათ.
ოზურგეთს სჭირდება განახლება. მომდევნო 4 წელი იქნება განახლებისა და აღმავლობის წლები.
მედიასთან კომენტარის გაკეთების შემდეგ, არჩევნებში მოგებულმა კანდიდატმა და მისმა გუნდმა “ქართული ოცნების” ოფისთან გადაინაცვლეს. შემდეგ კი ე. წ. “თეატრალური მოედანთან” მოხდა შეკრება, სადაც ავთანდილ თალაკვაძემ, არჩილ თალაკვაძემ და ადგილობრივი ხელისუფლების ერთმა ნაწილმა მხარდაჭერისთვის მადლობა გადაუხადა ამომრჩეველს.
[sexy_author_bio]
