„2025 წლის 1 ივლისს გარემოს დაცვისა და სოფლის მეურნეობის სამინისტროს სსიპ გარემოსდაცვითი ინფორმაციისა და განათლების ცენტრმა გამოაქვეყნა ჩოხატაურის მუნიციპალიტეტში, მდინარე სუფსაზე დაგეგმილი 15 მგვტ სიმძლავრის „სურები 2 ჰესის“ მშენებლობისა და ექსპლუატაციის პროექტის სკოპინგის ანგარიში. დოკუმენტის საჯარო განხილვა 17 ივლისს, სოფელ ზემო სურებში შედგა. წარმოდგენილი სკოპინგის ანგარიში წარმოადგენს ერთ-ერთ მნიშვნელოვან ეტაპს გარემოზე ზემოქმედების შეფასების პროცესში, რომლის საფუძველზეც უნდა განისაზღვროს პროექტის გარემოსდაცვითი რისკები, ალტერნატივები და შესაბამისობა მოქმედ საკანონმდებლო მოთხოვნებთან. თუმცა, ანგარიშის ანალიზმა გამოავლინა არაერთი კრიტიკული ხარვეზი, რაც საფრთხეს უქმნის როგორც გარემოსდაცვითი გადაწყვეტილების სიზუსტეს, ისე ადგილობრივი მოსახლეობისა და დაინტერესებული მხარეების ინტერესების დაცვას“ – ავრცელებს ინფორმაციის სახით არასამთავრობო ორგანიზაცია „მწვანე ალტერნატივა.
„მწვანე ალტერნატივას“ ერთ-ერთი წარმომადგენელი დავით ჭიპაშვილი ზემო სურებში „სურების ჰესის“ სკოპინგის ანგარიშის განხილვას ესწრებოდა.
ორგანიზაციის მიერ გავრცელებულ შენიშვნებში და რეკომენდაციებში აღნიშნულია, რომ: სურები 2 ჰესის შეფასება განხორციელდეს ყველა ტექნიკურად და ფუნქციურად დაკავშირებულ კომპონენტთან ერთად (35 კვ გადამცემი ხაზი, ქვესადგური და სხვა ინფრასტრუქტურა), ერთიანად, როგორც ამას ითხოვს გარემოზე ზემოქმედების შეფასების კოდექსის მე-5 მუხლის მე-14 პუნქტი და არ მოხდება პროექტის ხელოვნური დაყოფა გზშ პროცესში, რაც შეზღუდავს ზემოქმედების სრულფასოვან შეფასებას. · გზშ ანგარიშში დეტალურად უნდა იყოს განხილული ყველა გონივრული ალტერნატივა, მათ შორის, უმოქმედობის (ნულოვანი) ალტერნატივა, შესაბამისი დასაბუთებითა და გარემოზე მათი ზემოქმედების ანალიზით. · პროექტის საჭიროების, ენერგეტიკული ეფექტიანობისა და სოციალურ-ეკონომიკური სარგებლის დეტალური ანალიზი, მათ შორის ენერგეტიკულად დეფიციტური პერიოდებისთვის. მოძიებულ იქნას ინფორმაცია მდინარე სუფსისა და მის შენაკადებზე დაგეგმილი ყველა არსებული და მომავალი ინფრასტრუქტურული პროექტის შესახებ (ჰესები, გადამცემი ხაზები, გზები და სხვ.) და გაკეთდეს დეტალური კუმულაციური ზემოქმედების ანალიზი – შეფასდეს, რა გრძელვადიან და შეუქცევად ზემოქმედებას მოახდენს დაგეგმილი ჰესი და მისი ინფრასტრუქტურა მდინარის ეკოსისტემასა და ადგილობრივ მოსახლეობაზე. · გზშ ანგარიშში იყოს წარმოდგენილი პროექტის ზემოქმედება მდინარის ჰიდროლოგიურ რეჟიმზე და ბიომრავალფეროვნებაზე, მათ შორის, თითოეული სახეობის საფრთხეების და ეკოსისტემური სერვისების დეტალური აღწერა. · დაზუსტდეს, თუ რა მეთოდოლოგიით განისაზღვრა დასატოვებელი წყლის (ეკოლოგიური ხარჯის) მოცულობა და რამდენად შეესაბამება ეს მოცულობა საერთაშორისო სტანდარტებს. · გარემოსდაცვითი ხარჯის განსაზღვრისთვის გამოყენებულ იქნას საქართველოში შემუშავებული, საერთაშორისო საუკეთესო პრაქტიკებზე დაფუძნებული მეთოდოლოგია, რომელიც ითვალისწინებს კომპლექსურ ეკოსისტემურ მიდგომებს და არა მხოლოდ საბჭოთა „სანიტარულ ხარჯს“. · გზშ ანგარიშში უნდა იყოს ასახული პროექტთან დაკავშირებული ყველა ძირითადი შეთანხმების (ენერგიის შესასყიდი ფასი, სახელმწიფო ქონების გადაცემა, სუბსიდიები, სახელმწიფოს ვალდებულებები) პირობები, რაც ხელს შეუწყობს პროექტის ეკონომიკური და სოციალური სარგებლის ობიექტურ შეფასებას.
(სრული ტექსტი შეგიძლიათ იხილოთ აღნიშნულ ბმულზე – https://greenalt.org/library/comment_surebi2_hp/).
„გურია ნიუსმა“ „სურების ჰესის“ ფეისბუქგვერდის საშუალებით ორი კითხვით მიმართა შპს “ენერჯი დეველოფმენტ ჯორჯიას” წარმომადგენლებს: – რამდენად მოხდა „მწვანე ალტერნატივას“ მიერ შენიშვნების და რეკომენდაციების გათვალისწინება სკოპინგის ანგარიშში და ასევე როდის არის სკოპინგის ანგარიშის განხილვა დაგეგმილი.“
„ეს არის პროექტის ერთ-ერთი ყველაზე მნიშვნელოვანი და მასშტაბური ეტაპი, რომელზეც ჩვენი ექსპერტები დეტალურად მუშაობენ. გვინდა გაცნობოთ, რომ ანგარიშის მომზადებისას გათვალისწინებული იქნება ყველა ადეკვატური და კონსტრუქციული შენიშვნა (?!), რომელიც საჯარო განხილვების პროცესში დაფიქსირდა. ჩვენი მიზანია, შეიქმნას მაქსიმალურად სრულყოფილი დოკუმენტი, რომელიც ასახავს პროექტის ყველა ასპექტს. გზშ-ის ანგარიში დასრულებისთანავე გახდება სრულად საჯარო და ხელმისაწვდომი ყველა დაინტერესებული პირისა თუ მხარისთვის. დოკუმენტის საჯარო განხილვებიც მოეწყობა. დღევანდელი მოცემულობით, ანგარიშის დასრულების სავარაუდო თარიღი მიმდინარე წლის ბოლოა.“
ამავე თემაზე: სურები ჰესის პროექტი ახალ ეტაპზე გადადის
