ლანჩხუთში, ქალაქის ცენტრალური სკვერის მიმდებარედ მდებარე მრავალბინიანი საცხოვრებელი სახლის მაცხოვრებლები შიდა ეზოში მდგარი ჭადრის ხის მოჭრას ითხოვენ. მათი თქმით, ხე საფრთხეს უქმნის იქაურ მაცხოვრებლებს.
„ეს ჭადრის ხე ძალიან ცუდ მდგომარეობაშია, სპეციალისტების დასკვნაც არსებობს, რომ იგი მოსაჭრელია. წელიწადზე მეტია, რაც ყურადღებას ვითხოვთ ადგილობრივი ხელისუფლებისგან, არაერთხელ მივმართეთ გამგეობას წერილობით, თუმცა, შედეგი ამ დრომდე არ ჩანს.
იყვნენ მოსულები, დაათვალიერეს აქაურობა, თქვეს მდგომარეობა საგანგაშოა, მაგრამ საჭირო ფინანსები არ გვაქვს და ვერ მოვჭრითო. თურმე ათასი ლარი ყოფილა საჭირო ამ ხის მოსაჭრელად.
აქვე ქალაქის ცენტრალური პარკია, სადაც ბავშვები ხშირად თამაშობენ და ღმრთმა ნუ ქნას რამე უბედურება დატრიალდეს. მერე ვინ იქნება პასუხისმგებელი, ან რა თანხით ანაზღაურდება?!“, _ ამბობენ აქაური მობინადრეები.
მათივე თქმით, გასულ წელს ამ ხის თაობაზე საგანგებო სიტუაციების მართვის ცენტრის ცხელ ხაზზეც დარეკეს და დახმარება ითხოვეს.
“იყვნენ მოსულები, გვითხრეს ხე სასწრაფოდ მოსაჭრელია, მაგრამ ამის შესაძლებლობა არ გვაქვსო. სხვა გზა რომ არ დაგვრჩა, თავად მოვნახეთ ადამიანი, რომელიც მოჭრის ამ ხეს, თუმცა, ამისთვის ნებართვაა საჭირო და ვცდილობთ, მივიღოთ ეს ნებართვა.
ძალიან ცუდ დღეში ვართ, ყოველი ქარის დაბერვაზე შიშის ქვეშ ვართ, არ ვიცით როდის მოსკდება ეს ხე და დაგვემხობა თავზე. ჯობია ახლა მოგვხედონ, თორემ ეს ხე რომ წაიქცევა და ფუნგად აქცევს აქაურობას, მერე რამდენი ათასი ლარი იქნება საჭირო ზიანის ასანაზღაურებლად დაიანგარიშონ?!“
მრავალბინიანი საცხოვრებელი სახლის მობინადრეების საპასუხოდ მუნიციპალიტეტის გამგეობაში ამბობენ, რომ დაზიანებული ჭადრის ხის მოჭრა მომდევნო კვირაშია დაგეგმილი.
„მოგეხსენებათ, ეს საკმაოდ დიდი ზომის ხეა და მისი მოჭრა ბევრ სირთულესთანაა დაკავშირებული. იგი ძალიან ახლოს დგას შენობასთან, სადაც გადის გაზის მილები და ელექტროსადენები, ამიტომ საჭიროა სხვადასხვა სამსახურების ჩართვა ამ საქმეში. უკვე მობილიზებულია შესაბამისი სამსახურები და მომავალ კვირაში მოხდება ხის მოჭრა, ისე რომ არ დაზიანდეს მიმდებარე ტერიტორია. სამუშაოებს ა(ა) იპ „ლანჩხუთი-სერვისი“ შეასრულებს“, _ ნათქვამია გამგეობიდან მიღებულ პასუხში.
