დიდ დიღომში გარდაცვლილი, 12 წლის ანის დედა, ნატო ხუტაშვილი, ყოველდღე მიდის იმ ადგილას, სადაც ორი თვის წინ, 17 მარტის ღამეს, უგონოდ მყოფი შვილი იპოვა. მიდის დღის სხვადასხვა მონაკვეთში, სხვადასხვა მარშრუტით, აანალიზებს თითოეულ ტრაექტორიას, ცდილობს, შვილის გარდაცვალების საქმეში არსებული მასალების მიხედვით აღადგინოს იმ ღამის სურათი, როცა რამდენიმე საათის განმავლობაში, დაკარგულ შვილს ეძებდა და ბოლოს სახლთან ახლოს, ჯაგნარით სავსე და ნაგავსაყრელად ქცეულ ტერიტორიაზე იპოვა.
შვილის გარდაცვალების საქმის მასალებზე წვდომა მან 6 აპრილს, მას შემდეგ მოიპოვა, რაც პროკურატურამ ის დაზარალებულის უფლებამონაცვლედ ცნო. იმ დღიდან მოყოლებული, ანი იანუშაიტიტეს დედა გამოძიების პარალელურად, საკუთარი ძალებით ცდილობს დაადგინოს სიმართლე, რომელიც მისთვის ერთადერთია – ანი მოკლულია.
ამაში მას ეჭვი იმ მომენტიდან არ ეპარება, როცა ექსპერტიზის ბიუროდან მოსვენებული საკუთარი შვილის ცხედარი დეტალურად შეისწავლა და მასზე ათობით დაზიანება აღმოაჩინა.
12 წლის მოზარდის სხეულზე დაზიანებების არსებობა თვენახევრის თავზე სამედიცინო ექსპერტიზის დასკვნამაც დაადასტურა. ექსპერტებმა ბავშვის სხეულზე 39 სხვადასხვა სახის დაზიანება აღრიცხეს. დაზიანებები ბავშვს სიცოცხლის პერიოდში აქვს მიღებული და ემთხვევა მისი გარდაცვალების დროს – სისხლაჟღენთები და ნაჭდევები სახეზე, ზედა და ქვედა კიდურებზე, ზურგზე.
მართალია შინაგან საქმეთა სამინისტრომ გამოძიება სისხლის სამართლის კოდექსის 109-ე მუხლით დაიწყო, რაც დამამძიმებელ გარემოებაში განზრახ მკვლელობას გულისხმობს და გამოძიება დღესაც ამ მუხლით მიმდინარეობს, მაგრამ, ანის გარდაცვალების დღესვე, მედიაში გავრცელდა ინფორმაცია, რომ ბავშვი, შესაძლოა, არა განზრახ მკვლელობის, არამედ საკვების მიღების შედეგად გამოწვეული პირღებინებით, ასფიქსიით იყო გარდაცვლილი. არაოფიციალური ინფორმაციით, არც ის იყო გამორიცხული, რომ გამოძიებას კვალიფიკაცია შეეცვალა.
ანის მშობლებისთვის ვერსია, რომ ბავშვი, შესაძლოა, პირღებინებით გამოწვეული ასფიქსიით იყოს გარდაცვლილი, აბსურდულია. ანის დედის თქმით, ამას არაერთი გარემოება გამორიცხავს. ამ გარემოებების შესახებ მან ვრცლად ილაპარაკა რადიო თავისუფლებასთან ჯერ კიდევ აპრილის დასაწყისში. ამას იმეორებს დღესაც და გამოძიების პარალელურად, თავად, ცდილობს კითხვებზე პასუხების პოვნას.
სწორედ ამ საბაბით გამოაქვეყნა რამდენიმე დღის წინ მან საკუთარ სოციალურ ქსელში ორი ფოტო, რომელზეც ანის დედის თქმით, ის პირები იყვნენ აღბეჭდილები, რომლებსაც შესაძლოა, რაიმე ინფორმაცია ჰქონოდათ მისი შვილის გარდაცვალების საქმეზე, რადგან ისინი გარე, სათვალთვალო კამერებმა სწორედ იმ ტერიტორიის სიახლოვეს დააფიქსირეს, სადაც უგონოდ მყოფი ანი იპოვეს.
რადიო თავისუფლება წერს, რომ სათვალთვალო კამერებიდან ამოღებული ფოტოების სოციალურ ქსელში გამოქვეყნების შემდეგ, აღმოჩნდა, რომ ამ პირებს ეძებდნენ სამართალდამცავებიც. ფოტოების ქვეშ დაწერილი კომენტარების თანახმად, დიდ დიღომში, იმ ტერიტორიის სიახლოვეს, სადაც ანი იპოვეს, რამდენიმე ხნის წინ, სამართალდამცავები მოსახლეობის გამოკითხვით ცდილობდნენ ფოტოზე აღბეჭდილი პირების ვინაობის დადგენას.
ერთ-ერთ ფოტოზე აღბეჭდილი ახალგაზრდა თავად დაუკავშირდა ანის დედას. კომენტარს რადიო თავისუფლება აქვეყნებს:
„მითხრა, რომ ფოტოზე ნამდვილად ის იყო და იმ საღამოს რამდენიმე მეგობართან ერთად გაიარა სწორედ იმ ტერიტორიაზე, თუმცა, მას არანაირი ხმა არ გაუგია. მითხრა, აუცილებლად დაგეხმარებოდით, მაგრამ, სამწუხაროდ, არანაირი საეჭვო ხმა არ გაგვიგიაო. ოთხი მეგობარი იყო ერთად, ხმაურით მიდიოდნენ, მეგობარს აცილებდნენ“.
ანის დედა ეუბნება რადიო თავისუფლებას, რომ მისთვის, ამ ეტაპზე, უცნობია, ხომ არ ჰყავს გამოძიებას იდენტიფიცირებული პირი, რომელსაც შესაძლოა ჩაედინა მისი შვილის მკვლელობა:
„ვინმე ასეთი რომ მეგულებოდეს, სხვანაირად მოვიქცეოდი. ასეთი ადამიანის სიცოცხლე არ ღირს. მე ჩემს ანის დავპირდი, რომ როგორც კი მსგავსი ვინმე გამოჩნდება, თუ მეუღლემ არ დამასწრო, მე პირადად გავაკეთებ ჩემს გასაკეთებელს. მანამდე, მთავარია, დროულად გავიგოთ სრულყოფილი ექსპერტიზის პასუხები, რაც ძალიან ბევრ კითხვას გასცემს პასუხს“.
როგორც რადიო თავისუფლება წერს, ანი იანუშაიტიტეს ლიეტუვისა და საქართველოს ორმაგი მოქალაქეობა ჰქონდა. ამიტომ, ანის გარდაცვალების საქმე მაშინვე მოექცა ლიეტუვის გენერალური პროკურატურის ინტერესის არეალში.
მედია-პორტალის ცნობითვე, რომელიც ლიეტუვის პროკურატურიდან გამოთხოვილ ინფორმაციას ეყრდნობა, „მას შემდეგ, რაც გარდაცვლილი ბავშვის ოჯახის წევრებმა გამოთქვეს გარკვეული ეჭვები გამოძიების მიმდინარეობასთან დაკავშირებით, საქართველოში ლიეტუვის ელჩი, ანდრიუს კალინდრა, ბავშვის ოჯახის წევრების თხოვნის საფუძველზე, დაუკავშირდა ლიეტუვის პროკურორს და მიმართა თხოვნით, რომ საქმეში ჩართულიყვნენ ლიეტუველი ექსპერტები“.
