დღეს ოზურგეთის მუნიციპალიტეტის მერმა თავის ფეისბუქგვერდზე გამოაქვეყნა ფოტოები, სადაც ქუჩის მხატვრობის ფარგლებში ქალაქ ოზურგეთში მდებარე შენობები და კედლები მოიხატა. ერთ–ერთ ფოტო გააზიარა ლანჩხუთის მუნიციპალიტეტის საკრებულოს და „ერთიანი ნაციონალური მოძრაობის“ წევრმა ირმა მგელაძემ.
“პირველი ფოტო ოზურგეთის ერთ-ერთი სკოლაა, მეორე ფოტოზე კი ჩვენი პირველი სკოლის მაკეტი. როგორც მაქვს ინფორმაცია ჩვენს სკოლას არ გააკეთებენ ასე, არ მოგვცეს უფლებაო… რატომ? თუ იმიტომ რომ ძველებურ იერსახეს უბრუნებენ, კარგია, მაგრამ მაშინ სხვა სკოლა მაინც მოხატონ,“ – წერს ირმა მგელაძე.
“გურია ნიუსი“ მეტი კომენტარისთვის ირმა მგელაძეს დაუკავშირდა.
ირმა მგელაძე: როცა სკოლების რეაბილიტაციაზე იყო საუბარი, ჩვენ, ფრაქციის სხდომაზე გავაჟღერეთ, რომ პირველ სკოლას დაბრუნებოდა პირვანდელი სახე, რადგანაც როცა გარემონტდა, ჩვენი ხელისუფლების დროს, შემდეგ არ მოგვეწონა, მაგრამ გვიანი იყო. ახლა ისევ იმ პირვანდელ სახეს თუ დაუბრუნებენ, ანუ აგურებით, იქნება კარგი. თან გავაჟღერეთ, რომ სკოლას ნოე ჟორდანიას სახელი ეწოდოს, დაწყებითი კლასი მანდ გაიარა ნოემ. ასეთ სიახლეს მივესალმებით, სხვა სკოლის შენობაზეც, თუმცა რამდენადაც ვიცი, ჩვენ უარი გვითხრეს.
ლანჩხუთის საგანმანათლებლო რესურსცენტრის უფროსი ნინო ჩიტაძე ჩვენთან საუბრის დროს ამბობს, რომ #1 საჯარო სკოლა ჩასმულია სარემონტო სკოლების სიაში.
„ლანჩხუთის მუნიციპალიტეტის საკრებულომ გააგზავნა თხოვნა, აგურის ფასადი გაკეთებულიყო და ამაზე მიიღეს პასუხი, კულტურული მემკვიდრეობის სააგენტოდან გვჭირდება დასკვნა, რომ ეს არის კულტურული მემკვიდრეობის ძეგლი და საჭიროა მისი პირვანდელი სახის შენარჩუნება. ზუსტად ამ საკითხთან დაკავშირებით პასუხი ჯერ, არ ვიცით”, – გვითხრა ნინო ჩიტაძემ.
ინფორმაციისთვის ლანჩხუთის #1 საჯარო სკოლა 150 წლის არის.
ავტორი
