დღეს, პარლამენტის საფინანსო-საბიუჯეტო კომიტეტის სხდომაზე ადამიანის უფლებათა დაცვისა და სამოქალაქო ინტეგრაციის კომიტეტის ინიციატივა განიხილეს, რომლის მიხედვითაც, სახალხო დამცველის ინსტიტუტის გაძლიერება იგეგმება.
კანონპროექტები „საქართველოს სახალხო დამცველის შესახებ” საქართველოს ორგანულ კანონში ცვლილების შეტანის თაობაზე” და „საქართველოს საბიუჯეტო კოდექსში ცვლილების შეტანის შესახებ”, რომელიც ამავე კომიტეტის თავმჯდომარემ სოფო კილაძემ წარადგინა.
დაგეგმილი ცვლილებებით, ძლიერდება აპარატის მართვის სისტემა და იქმნება ახალი თანამდებობა და საქართველოს სახალხო დამცველის აპარატს აპარატის უფროსი უხელმძღვანელებს. დღემდე აპარატს ხელმძღვანელობას სახალხო დამცველის პირველი მოადგილე უწევს. ამავდროულად, კანონპროექტი მიზნად ისახავს საქართველოს სახალხო დამცველის საბიუჯეტო ხელშეუხებლობის გარანტიების შექმნას – სახალხო დამცველის აპარატისთვის განკუთვნილი ხარჯების შემცირება წინა წლის დამტკიცებული ბიუჯეტით განსაზღვრულ მოცულობასთან შედარებით, მხოლოდ სახალხო დამცველის თანხმობით იქნება შესაძლებელი.
გარდა ამისა, კომიტეტმა საბოლოო- მესამე მოსმენით განიხილა მთავრობის საკანონმდებლო ინიციატივის წესით წარმოდგენილი კანონპროექტები: „საქართველოს საგადასახდო კოდექსში ცვლილების შეტანის შესახებ” და „საქართველოს სისხლის სამართლის კოდექსში ცვლილების შეტანის შესახებ”, რომლებიც სხდომაზე ფინანსთა მინისტრის მოადგილემ ლაშა ხუციშვილმა წარადგინა. კანონპროექტებიმოგების გადასახადის დაბეგვრის რეჟიმის, გადასახადების ადმინისტრირებისა და საბაჟო პროცედურების სრულყოფის მიზნით შემუშავდა.
კომიტეტმა წარმოდგენილ კანონპროექტებს მხარი დაუჭირა.
