გურიაში, ოზურგეთის მუნიციპალიტეტის სოფელ ნარუჯაში, კენკროვანი კულტურების ფორუმზე, პარლამენტის აგრარული კომიტეტის თავმჯდომარე ნინო წილოსანმა სიტყვით გამოსვლისას აღნიშნა, რომ ძალიან გახარებულია, რადგან გურია მძლავრ ეკონომიკურ ნაბიჯებს დგამს.
„ჩემთვის ემოციურია , რომ დღეს გურიაში კენკროვანთა ფორუმი იმართება. ძალიან მიხარია, რომ გურია, სოფლის მეურნეობის მხრივ, მძლავრ ეკონომიკურ ნაბიჯებს დგამს“.
„გურია ნიუსი“ პარლამენტარს ესაუბრა გურიაში მოცვის კულტურის გაშენების შუქ-ჩრდილებზე, რასაც ადგილობრივი მცხოვრებლები _ ყველაზე სანდო და ობიექტური შემფასებლები ამჩნევენ. ასევე, ვესაუბრეთ მოცვის კულტურის გაშენების პარალელურად, იგივე დაფინანსებაზე თუ იფიქრებს ხელისუფლება, ოღონდ ჩაის რეაბილიტაციის კუთხით.
„გურია ნიუსმა“ კარგად შეისწავლა, ადგილობრივი მცხოვრებლების აზრი, გაეცნო მათი თვალით დანახულ პრობლემებს. ისინი ხშირად საუბრობენ ჩვენთან, რაში ხედავენ გურიის სოფლის მეურნეობის აღორძინების და ეკონომიკურად გაძლიერების საფუძველს.
_ ქალბატონო ნინო, რა გიხარიათ ასე ძალიან, როგორ ხედავთ გურიაში სოფლის მეურნეობის საქმეს, რომელიც, თქვენი თქმით, ძლიერდება. მე კი გეტყვით, რომ სოფლის ეკონომიკური ყოფა ყოველ წელს უკან მიდის…
_მე ეს ვთქვი, მოცვთან დაკავშირებით. მოცვი არის მომგებიანი კულტურა. ჩვენ ეს შესწავლილი გვაქვს და ვიცით, რომ აქვს პერსპექტივა. გამოჩნდა კიდეც. ამიტომ ვამბობ, რომ უნდა მოხდეს მაქსიმალური ხელშეწყობა, დახმარება უნდა გაიზარდოს. დღევანდელი ფორუმიც ამას ეძღვნება.
_ გურულები მოცვის გაშენების წინააღმდეგი არ არიან. თუმცა, მათი ვარაუდი, რომ მოცვს ჩიტები შეესეოდნენ, გამართლდა. ზოგადად, ჩაის რეაბილიტაციაზე იყო საჭირო მეტი აქცენტი და მთავრობამ ყური არ გვიგდოო, ბრაზობენ…
_ როცა ჩვენ საკითხი განვიხილეთ და ჩაის სარეაბილიტაციო პროგრამა წარვადგინეთ, აღმოჩნდა, რომ შეთავაზება ნაკლები იყო ჩაიზე, მოცვზე კი უფრო მეტი. ამიტომ გადაწყდა ასე!
_ ქალბატონო ნინო, თუ იცით, რატომ არ მოეწონათ ჩაის რეაბილიტაციის ის პროგრამა გურულებს, რომელზეც თქვენ მიანიშნეთ? _ უვარგისად მიიჩნიეს და იმიტომ. გარკვევით ამბობენ, როგორც მოცვს აფინანსებთ, ისეთივე პროგრამაა განავითარეთ ჩაიზეო…
_ ჩემს პოზიციას მოგახსენებთ. ერთ-ერთი მთავარი ფაქტორი, რის გამოც გურიას ვგულშემატკივრობ, ჩაია. სხვათა შორის, უნდა გითხრათ, რომ სამინისტრო ახლა ატარებს კვლევას ჩაის კულტურის განვითარებასთან დაკავშირებით. თუ ეს კვლევა აღმოაჩენს, რომ მომგებიანია ჩაის კულტურა, განიხილავს საკითხს და ამ კვლევას დაეფუძნება სახელმწიფო პოლიტიკა.
_ გურულები გეუბნებიან, რომ ამას კვლევა არ სჭირდება, ჩაი უალტერნატივოა გურიაში ეკონომიკის ასაღორძინებლადო…
_ ვნახოთ, გითხარით, რომ კვლევა ტარდება.
_ ქალბატონო ნინო, გურიას ტურიზმის და სოფლის მეურნეობის განვითარების მხრივ საგრანტო პროგრამები არ გააჩნია. ანუ ის, რაც რეგიონს ავითარებს. მეთანხმებით თუ არა?
_ დიახ ასეა.
_ აბა, სოფლის მეურნეობის მინისტრმა „გურია ნიუსის“ კითხვის პასუხად რატომ თქვა, რომ ამ კუთხით მთელი საქართველო დაფარულია?
_ გურიაში რომ არ არის, ვიცი…
_ ამიტომ გურიას სჭირდება ლობისტი ამ მხრივ! გაუწევთ თუ არა რეგიონს ლობირებას?
_ კი, აუცილებლად.
_ მეც აუცილებლად შეგახსენებთ!
პ.ს. ქალბატონმა ნინომ გვითხრა, რომ ძალიან უყვარს „გურია ნიუსი“ და მოიკითხა ყველა.
ავტორი: მარინა ჩიხლაძე
