ზაფხულის სეზონზე ხშირია სხვადასხვა ინფექციები და ვირუსები, რაც, ხშირ შემთხვევაში, ისედაც ცხელი დღეების დროს, კიდევ უფრო დიდ დისკომფორტს უქმნის ადამიანებს.
რა უნდა გავითვალისწინოთ, სანამ დასასვენებლად წავალთ და როგორ უნდა დავიცვათ თავი სხვადასხვა ინფექციისა თუ სეზონური ვირუსებისგან _ ამის შესახებ ოზურგეთის საზოგადოებრივი ჯანდაცვის ცენტრის ეპიდემიოლოგს, ელზა სიმონიშვილს ვესაუბრეთ.
ეპიდემიოლოგის თქმით, აუცილებელია, ჰიგიენის წესების დაცვა და დისტანციის შენარჩუნება, რადგან ვირუსები, ინფექციები, ნერწყვით ვრცელდება.
“ბაქტერიების გადაცემის ფაქტორებია წყალი, საკვები, მიკროორგანიზმებით დაბინძურებული ნივთები და ხელები. ინფექციის გადაცემის ამგვარ მექანიზმს ფეკალურ-ორალური ეწოდება.
ამ ბოლო პერიოდში არის გავრცელებული სხვადასხვა სახის ვირუსი _ გრიპისმაგვარ დაავადებებს მიკუთვნებული, ადენოვირუსული ინფექციები, ასევე, სხვადასხვა კონტაქტური გზით გადამდები ინფექციები.
ყველა მათგანის გადადების გზა მსგავსია. ამიტომ სასურველია, რომ ადამიანებმა ერთმანეთთან ურთიერთობისას დაიცვან დისტანცია და ერთმანეთი არ გადაკოცნონ, რადგან ნერწყვი შეიცავს ვირუსსაც და ბაქტერიასაც.
სველი წერტილებით სარგებლობის შემდეგ და ჭამის წინ, აუცილებელია ხელის დაბანა თხევადი საპნით. თუ გამდინარე წყლით ხელის დაბანის საშუალება არ არის, მხოლოდ ამ შემთხვევაში უნდა გამოიყენოთ სადეზინფექციო ხსნარი”, _ ამბობს ეპიდემიოლოგი.
პირადი ჰიგიენის წესების დაცვის გარდა, არსებობს სხვა ფაქტორებიც, რაც ელზა სიმონიშვილის თქმით, როცა დასასვენებლად მივდივართ, უნდა გავითვალისწინოთ _ მაგალითად, ის, რომ მცირეწლოვანი ბავშვების და ხანდაზმული ადამიანების დასასვენებლად წასვლა მაღალმთიან ადგილებში, რეკომენდებული არ არის.
“რაც შეეხება დასვენებას, გათვალისწინებული უნდა იყოს აუცილებლად, რომ თუ დამსვენებელი ხანდაზმული ადამიანი ან მცირეწლოვანი ბავშვია, ამ შემთხვევაში ნაკლებადაა რეკომენდირებული მაღალმთიანი კურორტები, როგორიცაა გუდაური, ბახმარო, გომისმთა, რადგან ატმოსფერული წნევა ასეთ ადგილებში გაიშვიათებულია და უარყოფითი ზემოქმედება აქვს გულსისხლძარღვთა დაავადებების მქონე ადამიანებზე და მცირეწლოვნებზე.
სხვა შემთხვევაში, ზღვის კურორტების მონახულებისას, ვისაც აქვს გულსისხლძარღვთა და ძვალსახსროვანი სისტემის პრობლემები, რეკომენდებულია ზღვის სანაპირო, ფიჭვნარი და ზოგადად ყველა ის ადგილი, სადაც შეიძლება მიიღონ მზის სხივები D ვიტამინის დეფიციტის აღმოსაფხვრელად. ასევე, ძალიან სასარგებლოა ჟანგბადით გაჯერებული სუფთა ჰაერი, რაც გააკაჟებს იმუნიტეტს და შემდგომი დაავადებების ერთგვარი პრევენციაა”, _ ამბობს სიმონიშვილი.
“თუმცა, დასასვენებლად ზღვაზე წავალთ თუ მთაში, აუცილებელია პირადი ჰიგიენის წესების დაცვა. გარდა ამისა, ზღვაზე წასვლის შემთხვევაში დიდი ყურადღება უნდა მივაქციოთ, თუ დღის რომელ მონაკვეთში გავდივართ პლაჟზე, მშობლებმა კი უნდა გააკონტროლონ, რომ მცირე ასაკის ბავშვებმა ზღვის ბინძური წყალი არ დალიონ.
ზღვის აბაზანა, დიდმაც და პატარამაც დილის 11 საათამდე ან საღამოს 5-6 საათის შემდეგ უნდა მიიღონ, რადგან ამ პერიოდში მზის გამოსხივება, რომელსაც კანის დაზიანება და დამწვრობის გამოწვევა შეუძლია, შედარებით ნაკლები ინტენსივობისაა.
პლაჟზე ყოფნის დროს, მშობელი უნდა იყოს ყურადღებით, რომ არ მცირე ასაკის ბავშვებმა არ დალიონ ზღვის წყალი, არ ჭამონ გაურეცხავი საჭმელი. წყალი უნდა დავლიოთ სუფთა და დაცული ჭურჭლიდან.
განსაკუთრებით ყურადღება უნდა მიექცეს იმას, რომ ზღვის აბაზანები არ უნდა მივიღოთ, თუ კანზე გვაქვს რაიმე სახის დაზიანება.
ზღვის აბაზანის შემდეგ აუცილებელია სუფთა წყლის შხაპის მიღება.
ნებისმიერ კურორტზე, დასასვენებელ ადგილზე, დიდი ყურადღება უნდა მიექცეს ხელების ჰიგიენას, რადგან ამ პერიოდში განსაკუთრებით ვრცელდება ჰელმითოზები, რომელიც დაბინძურებული ხელებიდან და საგნებიდან გადადის პირის ღრუში და შემდეგ ხვდება ადამიანის ორგანიზმში. ამიტომ დიდი მნიშვნელობა აქვს გამდინარე წყლითა და თხევადი საპნით ხელების დაბანას”, _ ამბობს სიმონიშვილი.
ჩვენს კითხვაზე, როგორ მივხვდეთ სეზონური ვირუსი გვაქვს თუ ინფექცია, ეპიდემიოლოგი გვპასუხობს, რომ ამის დადგენა მხოლოდ ლაბორატორიული გზით არის შესაძლებელი. ამიტომ ჩივილების შემთხვევაში მედიკამენტების თვითნებურად მიღება არ შეიძლება:
“განსხვავების დანახვა ინფექციასა და სეზონურ ვირუსს შორის ზედაპირული გასინჯვით პროფესიონალისთვისაც კი ძალიან ძნელია. ამიტომ, თუ რაიმე ჩივილი აქვს ადამიანს, თვითმკურნალობას არ უნდა მიმართოს და უნდა მიაკითხოს სპეციალისტს, რომელიც დაუნიშნავს გარკვეულ ლაბორატორიულ კვლევას”, _ ამბობს ეპიდემიოლოგი.
ავტორი
