2 დღის წინ ოზურგეთის საგანმანათლებლო რესურსცენტრის ხელმძღვანელმა ლელა იმედაშვილმა სოციალურ ქსელში გააკეთა განცხადება. იმედაშვილი ამ განცხადებით პარტია ,,საქართველოსთვის“, ოზურგეთის მერობის კანდიდატის, გია ცეცხლაძის განცხადებას ოზურგეთში მასწავლებელთა სახლის შექმნის შესახებ.
როგორც იმედაშვილი ამბობს, იდეა ოზურგეთში მასწავლებლის სახლის გახსნის თაობაზე საქართველოს მთავრობას ეკუთვნის, მთავრობის მიერ შემუშავებულია პროექტიც და ადგილიც უკვე შერჩეულია.
“წინასაარჩევნო კამპანიის ფარგლებში, ოზურგეთში ოპოზიციის კანდიდატის მხრიდან გაჟღერდა დაპირება მასწავლებელთა სახლის შესახებ.
საზოგადოებამ უნდა იცოდეს, რომ ეს პროექტი საქართველოს მთავრობამ შეიმუშავა, ქალაქში ადგილიც შერჩეულია და ფართიც უკვე გადაცემულია სსიპ „მასწავლებელთა პროფესიული განვითარების ეროვნული ცენტრისთვის“. ამ პროექტზე ბევრი ვიმუშავეთ, მოვამზადეთ სტრუქტურაც და უახლოეს პერიოდში იგეგმება მშენებლობის დაწყება. განათლების და მეცნიერების მინისტრი ბატონი მიხეილ ჩხენკელი სახელისუფლებო გუნდთან ერთად, საზოგადოებას თავად წარუდგენს აღნიშნულ პროექტს.
ცენტრის ფუნქცია მასწავლებელთა პროფესიული განვითარების ხელშეწყობა, სასწავლო პროგრამების განხორციელება, კვლევითი პროექტები და კონფერენციების მოწყობა იქნება.
რამდენიმე დღის წინ ოზურგეთში, საბოლოო დეტალების შეთანხმებისთვის იმყოფებოდნენ „მასწავლებელთა პროფესიული განვითარების ცენტრის“ წარმომადგენლები.
სამწუხაროა, რომ „ყურმოკრული ამბის“ დონეზე ხდება ამ პროექტის გამოყენება საარჩევნო კამპანიის დროს, იმ ადამიანების მხრიდან, ვისაც არავითარი წვლილი არ შეუტანია მის შემუშავებასა და განხორციელებაში.
წარმატებები ოზურგეთს და განათლების სისტემას!
ლელა იმედაშვილის ეს განცხადება უყურადღებოდ არ დარჩენია მერობის კანდიდატს.
გია ცეცხლაძის თქმით, იდეა 2015 წელს მასწავლებელთა პროფესიული განვითარების ეროვნული ცენტრის დირექტორის გიორგი მაჩაბლის მიერ გაჟღერდა სამხარეო ადმინისტრაციაში, თუმცა ოზურგეთში “მსგავსი არაფერი შექმნილა”.
“ოზურგეთის საგანმანათლებლო რესურსცენტრის ხელმძღვანელი ლელა იმედაშვილი, დღეს საკუთარ ფეისბუქ გვერდზე ვრცელი პოსტით გამოეხმაურა ჩემი, როგორც პარტია ,,საქართველოსთვის“, ოზურგეთის მერობის კანდიდატის მიერ გუშინ ჩემს მასწავლებელთან სტუმრობისას გაჟღერებულ ინიციატივას (ოზურგეთში მასწავლებელთა სახლის შექმნის შესახებ) და ბრალი დამდო განათლების სამინისტროს მიერ ინიცირებული პროექტით მანიპულირებაში. ჩემთვის გასაკვირი და მოულოდნელი იყო ქალბატონი ლელას მხრიდან ჩემი დადანაშაულება…
ქალბატონო ლელა, ალბათ, გახსოვთ, რომ წლების წინ, 2015 წელს, მასწავლებელთა პროფესიული განვითარების ეროვნული ცენტრის დირექტორის გიორგი მაჩაბლის მიერ, გურიის სამხარეო ადმინისტრაციაში გამართული შეხვედრის დროს გაჟღერდა ინიციატივა ოზურგეთში, ახალციხეში, ზუგდიდსა და თელავში მასწავლებელთა სახლების ამოქმედების თაობაზე.
რასაც დღემდე ამაოდ ელიან მასწავლებლები. ფაქტია, რომ 6 წლის შემდეგაც, ვხედავთ, რომ ოზურგეთში მსგავსი არაფერი შექმნილა. ეს ნამდვილად ძალიან სამწუხაროა და სწორედ ამიტომ გაუგებარია, კონკრეტულად რაში გვადანაშაულებთ, მით უფრო, თუ ეს თემა 6 წლის განმავლობაში თქვენი მხრიდან აბსოლუტურად დახურული იყო და ამის შესახებ აღარავის არაფერი სმენია?
ამასთან, საზოგადოება შეცდომაში რომ არ შეიყვანოთ, კიდევ ერთხელ მოგახსენებთ ჩემს პედაგოგთან შეხვედრისას გაჟღერებული ჩვენი ინიციატივის შესახებ, რომელიც ჩემი დიდი ხნის ნაფიქრია იდეაა და რომელსაც აუცილებად ავასრულებ. ეს იქნება სივრცე ოზურგეთელი მასწავლებლებისთვის და აღმზრდელ-პედაგოგებისთვის, სადაც კომფორტული გარემო იქნება შექმნილი და სადაც პედაგოგებს შეხვედრების, ახალი იდეების გაცნობისა და ერთმანეთის გამოცდილების გაზიარების საშუალება ექნებათ. რაც შეეხება სსიპ მასწავლებელთა სახლის დაფუძნებას ოზურგეთში, რაც განათლების სამინისტოს პრეროგატივაა, კარგი იქნება თუ ოდესმე ისინი ამ დანაპირებს შეასრულებენ. და კიდევ, მოდით, იდეების გაჟღერების დასწრებაში ნუ შევეჯიბრებით ოზურგეთელები ერთმანეთს, არამედ იმაში შევეჯიბროთ, კარგი იდეების რეალიზებას ვინ უკეთ და დროულად შევძლებთ!” _ წერს ცეცხლაძე.
