ბოლო პერიოდში სეზონურ ვირუსებთან ერთად ოზურგეთის მუნიციპალიტეტში ფიქსირდება ე.წ. კოქსაკის ვირუსით გამოწვეული დაავადება.
რა უნდა იცოდეს საზოგადოებამ ამ ვირუსის შესახებ და როგორ უნდა მოიქცეს დაავადების თავიდან ასაცილებლად – ამ საკითხებზე “გურია ნიუსი” ოზურგეთის საზოგადოებრივი ჯანდაცვის ცენტრის ეპიდემიოლოგს, ელზა სიმონიშვილს ესაუბრა.
როგორც ეპიდემიოლოგი ამბობს, ეს არის ძირითადად ბავშვთა ასაკში გავრცელებული დაავადება, თუმცა, ინფექცია შეიძლება განვითარდეს მოზარდებსა და მოზრდილებშიც. ხასიათდება ტემპერატურული რეაქციით, მტკივნეული წყლულებით პირის ღრუში და ვეზიკულებით (ბუშტუკოვანი გამონაყარით) ხელის მტევნებსა და ტერფებზე.
“დაავადების ყველაზე ხშირი გამომწვევი – კოქსაკის ვირუსია, იგი 6 თვემდე ბავშვებს თითქმის არასოდეს ემართებათ, რაც დედისგან მიღებულ იმუნიტეტს უკავშირდება.
დაავადებისათვის დამახასიათებელია ზაფხულ-შემოდგომის სეზონურობა. ტოვებს ხანგრძლივ იმუნიტეტს. ამ ინფექციის ერთ-ერთი თავისებურებაა ჯანმრთელი ვირუსმატარებლობა, რაც განაპირობებს სპორადული ფორმების მუდმივ აღმოცენებას და მასობრივ დაავადებებს”,_ ამბობს ელზა სიმონიშვილი.
ელზა სიმონიშვილის თქმით, ინფექციის წყარო – დაავადებული ან რეკონვალესცენტი(გამოჯანმრთელების ფაზაში მყოფი) ადამიანია. ვირუსის გადაცემა კი ინფიცირებული ადამიანის პირის, ცხვირისა და ხახის გამონადენთან, ნერწყვთან, გამონაყარის ბუშტუკის სითხესთან ან ფეკალურ მასებთან პირდაპირი კონტაქტით ხდება.
“ჩვენში დაავადება ძირითადად გვხვდება სპორადული-ერთეული შემთხვევების სახით, თუმცა დღეის მდგომარეობით ბავშვთა დაწესებულებებში გვაქვს მცირე, ჯგუფური შემთხვევებიც”,_ ამბობს ოზურგეთის საზოგადოებრივი ჯანდაცვის ცენტრის ეპიდემიოლოგი.
ელზა სიმონიშვილის თქმით, დაავადების ძირითადი კლინიკური ნიშნებია: სუბფებრილური-დაბალი ტემპერატურა, უმადობა, ყელის ტკივილი, ხველა, მუცლის ტკივილი, დიარეა და ზოგადი სისუსტე, ზოგჯერ ვლინდება სახსრების ტკივილი.
“ეს პერიოდი შეიძლება გაგრძელდეს 3-4 დღეს, ამის შემდეგ პირის ღრუს ლორწოვან გარსზე ჩნდება წყლულები, გამონაყარი ხელისგულებზე, ფეხისგულებსა და დუნდულებზე შეიძლება განვითარდეს 1-2 დღეში.
დაავადება შეიძლება ვლინდებოდეს ყველა ზემოთ ჩამოთვლილი ნიშნითა და სიმპტომით, ან მხოლოდ რამდენიმე მათგანით. ასევე უფრო მძიმე(რომელიც ენტეროვირუსული ვარიანტია) ან ნაკლებად მძიმე ფორმით”,_ ამბობს ელზა სიმონიშვილი.
ოზურგეთის საზოგადოებრივი ჯანდაცვის ცენტრის ეპიდემიოლოგი ამბობს, რომ ოზურგეთის მუნიციპალიტეტში კოქსაკის ვირუსით ინფიცირების საპრევენციო ღონისძიების ფარგლებში ყველა ბ/ სკოლამდელი აღზრდის დაწესებულებაში განხორციელდა გეგმიური სადეზინფექციო სამუშაოები, ბაღების გაერთიანებას, კონკრეტული ბ/ბაღების მენეჯერებს, ასევე, რესურს ცენტრის ხელმძღვანელობას მიეცათ რეკომენდაციები, თუ რა ღონისძიებებს მიმართონ ინფიცირების შემთხვევებში.
რაც შეეხება პროფილაქტიკას, ინფიცირებისა და დაავადების შემდგომი აღმოცენება-გავრცელების თავიდან ასაცილებლად აუცილებელია გარკვეული პროფილაქტიკური-პრევენციული ღონისძიებების დაცვა:
ბავშვთა დაწესებულებებში სამედიცინო პერსონალის მიერ უნდა ხორციელდებოდეს რუტინული(მუდმივი) მონიტორინგი სიმპტომებიანი აღსაზრდელების გამოსავლენად;
ინფიცირების გამოვლენისთანავე მოხდეს ინფიცირებულთა იზოლაცია და კონტაქტირებულთა გამოვლენა;
ინფექციის კერა (განსაკუთრებით სველი წერტილები), ასევე ბ/დაწესებულებები ზოგადად, დალაგდეს სველი წესით, სადეზინფექციო ხსნარების გამოყენებით და აუცილებლად განიავდეს.
ვირუსის გამოყოფას რეკონვალესცენტი (უკვე გამოჯანმრთელების ეტაპზე მყოფი ადამიანი) განავალთან ერთად განაგრძობს დაახლოებით 1 თვის განმავლობაში, ამიტომ ინფექციის გავრცელების თავიდან ასაცილებლად განსაკუთრებული ყურადღება უნდა მიექცეს ინფიცირებულის პირად ჰიგიენას, აუცილებელია ხელების ხშირი დაბანა, სასურველია ისარგებლოს კონკრეტულად მისთვის გამოყოფილი პირადი ნივთებით.
დამახასიათებელი სიმპტომების გამოვლენისას ინფიცირებულმა ადამიანმა, ან ბავშვის მშობელმა აუცილებლად მიმართოს ექიმს და არ დაუშვას თვითმკურნალობა.
