ზაფხულის დადგომასთან ერთად, სამწუხაროდ, იმატებს შემთხვევები, როდესაც კარგი მოცურავეებიც კი იხრჩობიან. სწორედ ამიტომ ამბობენ, რომ „სიფრთხილეს თავი არ სტკივა“, მით უმეტეს მაშინ, როდესაც საქმე წყალს ეხება. შესაბამისად, აუცილებელია დავიცვათ წესები, რომლებიც ზღვასა თუ მდინარეში დახრჩობის საფრთხეს თავიდან აგვარიდებს.
კარგად დაფიქრდით, სანამ ჩაყვინთავთ!
დაიმახსოვრეთ, რომ კარგად ნაცნობ ადგილებშიც კი ფსკერი შეიძლება შეიცვალოს. შესაბამისად, თუ გასულ სეზონზე ის ღრმა არ იყო, წელს შეიძლება აბსოლუტურად სხვა მოცემულობა დაგხვდეთ. ერთი დღეც კი შეიძლება საკმარისი აღმოჩნდეს იმისთვის, რომ თქვენთვის კარგად ნაცნობ ადგილზე გაჩნდეს დიდი მოცულობის მქონე საგნები, რომლებიც დინებამ ან ადამიანებმა (ტოტები, ნაგავი და ა.შ.) დატოვეს. აღნიშნულმა ცვლილებამ კი, შესაძლოა, სერიოზული ტრავმა აპროვოციროს. განსაკუთრებით სახიფათოა თავით ჩაყვინთვა. ასეთ დროს შეიძლება ხერხემალი დაიზიანოთ ან დაიხრჩოთ, ან კისრის ქვემოთ მგრძნობელობა დაკარგოთ და შედეგად, სიცოცხლის ბოლომდე ეტლის მეშვეობით მოგიწიოთ გადაადგილება. თუ მდინარეში აპირებთ გადახტომას, ფსკერი ჩაყვინთვის წინ ყოველდღე შეამოწმეთ. ეს უნდა გააკეთოთ მაშინაც კი, თუ თავით გადახტომას არ აპირებთ.
ყველაზე ნაკლები დაზიანებაა მოსალოდნელი, თუ ინსტრუქტორთან ერთად ჩაყვინთავთ წყალში, სადაც სიღრმე არის, სულ ცოტა, 2,7 მეტრი. ამასთანავე, უმჯობესია ის თქვენს სიმაღლეს 2-ჯერ აღემატებოდეს. თუმცა აქ სხვა ფაქტორებიც არის გასათვალისწინებელი: ადამიანის წონა, იმ ადგილის სიმაღლე, საიდანაც ხტება და სხვ. თავით ჩაყვინთვა მხოლოდ მათთვის არის რეკომენდირებული, ვინც საჭირო მომზადება გაიარა და დარწმუნებულია, რომ სიღრმე საკმარისია. ამასთანავე, წყალი უნდა იყოს გამჭვირვალე. ყველა სხვა შემთხვევაში, სასურველია, ფეხებით გადახტომა.
დინების საწინააღმდეგოდ ცურვას ნუ ეცდებით!
ზღვებსა და მითუმეტეს, მდინარეებში დინება შეიძლება იყოს ბევრად უფრო ძლიერი, ვიდრე – თუნდაც ძალიან კარგი მოცურავე. გარდა ამისა, ზღვაზე არსებობს საშიშროება, რომ დინება ჩნდება და ქრება. შესაბამისად, ადამიანმა არ შეიძლება იცოდეს, კონკრეტულ სანაპიროზე რა ხდება, ამიტომაც მუდმივ მზადყოფნაში უნდა იყოს. ამასთანავე, მდინარეებში წყალი შეიძლება მშვიდი მოგეჩვენოთ, მაგრამ რეალურად მისი დინება საკმარისად ძლიერი აღმოჩნდეს და წინააღმდეგობის გაწევაც გაგიჭირდეთ.
თუ ზღვაზე ხართ, ყურადღება მიაქციეთ ადგილებს, სადაც წყალი ნაპირიდან სწრაფად მოედინება და სხვა ფერის ზოლის ვიზუალი აქვს. გახსოვდეთ, ამ ადგილთან ახლოს არ უნდა იბანაოთ. თუ მაინც მოჰყევით დინებაში, პირველ რიგში, ხელები აწიეთ და დახმარება ითხოვეთ. ნუ ეცდებით დინების საწინააღმდეგოდ ცურვას, ეს მხოლოდ ძალას წაგართმევთ. თუ დინება ნაპირს გაშორებთ, იცურეთ ნაპირის პარალელურად, რათა დინებიდან გამოხვიდეთ.
თუ მდინარის დინებაში მოჰყევით, საუკეთესო გამოსავალია, რომ ზურგზე დაწვეთ და ფეხები წინ გქონდეთ. ეცადეთ, პერიოდულად თავი მაღლა აწიოთ, რათა დაინახოთ, დინება საით მიგაქანებთ. თუ ფეხზე წამოდგომას ეცდებით, ფეხი შეიძლება ქვებში გაგეჭედოთ და დახრჩობის საფრთხე შეგექმნათ. თუ დინებას გაჰყვებით, რაღაც მომენტში იგრძნობთ, რომ ის ისეთი ძლიერი აღარ არის და ნაპირისკენ დამოუკიდებლად გაცურავთ ან თუ ნაპირზე გასასვლელად შესაფერის ადგილს შეამჩნევთ, მიმართულების შეცვლა ხელების მოძრაობით სცადეთ.
მიჰყევით ტალღებს!
ტალღამ შეიძლება ადამიანს ძლიერად დაარტყას, რამაც, შესაძლოა, ხერხემლის დაზიანება ან სიკვდილიც კი გამოიწვიოს. ამიტომაც თქვენ მუდმივად უნდა აკონტროლოთ ტალღები. თუ ის თქვენკენ მოდის, სახით მისკენ უნდა მიტრიალდეთ. ასევე რეკომენდებულია, რომ როდესაც ნაპირზე დგახართ, უყუროთ ტალღებს და წარმოიდგინოთ ის იმაზე ორჯერ დიდად, ვიდრე ხედავთ. თუ ეს სიმაღლე თქვენთვის მისაღები გეჩვენებათ, შეგიძლიათ შეცუროთ. წინააღმდეგ შემთხვევაში, დარჩით ნაპირზე.
წინასწარ უნდა იცოდეთ, რომელ ცხოველებს შეხვდებითწყალში შეიძლება იყვნენ ცხოველები, რომელთაც ადამიანისთვის ზიანის მიყენება შეუძლიათ. მედუზებისა და ზვიგენების გარდა, საშიში შეიძლება იყოს ზოგიერთი სახეობის თევზი და წავიც კი. ეს ყველაფერი ადგილზეა დამოკიდებული. ძირითადად, ცხოველები, რომელთაც წყალქვეშ ადამიანისთვის ზიანის მიყენება შეუძლიათ, ტროპიკებში ბინადრობენ. ამიტომაც უმჯობესია, წინასწარ იცოდეთ ადგილობრივი ცხოველების შესახებ და ასევე პირველადი დახმარების მოკლე ინსტრუქტაჟი ჩატარებული გქონდეთ.
