ოზურგეთში, ისევე როგორც მთელ ქვეყანაში, დასრულდა მასწავლებელთა კომპეტენციის დამადასტურებელი გამოცდები, რომელიც მეორე საჯარო სკოლაში ტარდებოდა.
უნარ-ჩვევების თუ საგნობრივი გამოცდების მსვლელობისას, “გურია ნიუსი” უამრავ უკმაყოფილო მასწავლებელს ხვდებოდა, რომლებიც გამოცდებზე შედიოდნენ ან პირიქით, გამოდიოდნენ გამოცდიდან. უმეტესად უკმაყოფილების მიზეზი, მათი აზრით, სამინისტროს მიდგომაა მასწავლებელთა მიმართ. ამასთანავე, ხმაურია, განსაკუთრებით დაწყებითი კლასების საგამოცდო ტესტებში მაღალი კლასების მასალის შეტანის გამო.
_ რატომ უნდა მოვიდეს დაწყებითი კლასების გამოცდაზე “ჯაყოს ხიზნები”? ვინ ადგენს ამ ყველაფერს, რა მიზანს ემსახურება? ეს თუ სხვა მასალა დაწყებით კლასებში არც ისწავლება და ჩვენც დიდი ხანია, არც წაგვიკითხავს, არც მის სიავკარგეზე გვიმსჯელია. მით უფრო, როცა ყველაფერზე ახლებური მიდგომებია, რატომ უნდა დაგვწიოს უკან ასეთმა ქმედებამ? _ ამბობენ ჩვენთან საუბრისას მასწავლებლები, რომლებიც საკუთარი ვინაობის დასახელებას ერიდებიან, _ ისედაც არ გვაქვს ნერვები ამ ორომტრიალის გამო და ნუ დავკონკრეტდებით _ საბოლოოდ მაინც ყველაფერს ჩვენ გვაბრალებენ, _ გვითხრეს პედაგოგებმა.
კიდევ ერთი საკითხი სამრევლო სკოლების პედაგოგთა აქტივობაა _ ისინი ყოყმანის გარეშე ტოვებენ აღნიშნულ სკოლებს, აბარებენ გამოცდებს, რომ შემდეგ საჯარო სკოლებში დასაქმდნენ.
_ შერჩეული მიდგომაა, თუ რა შეიძლება დავარქვათ ამას, სამრევლო სკოლებისა და საჯარო სკოლების სივრცეში მომუშავე პედაგოგებისადმი.? ეს გამოიხატება ბევრ რამეში, კერძოდ, ყველა იმ სიკეთით, რითაც სახელმწიფო აწესებს საჯარო სკოლის პედაგოგებისთვის, სასულიერო სკოლების მასწავლებლები და ასევე, მოსწავლეებიც ვერ სარგებლობენ. ეს ეხება როგორც ხელფასებს, ისე ტრენინგებს, რომელიც მათთვის ტარდება. სწორედ ამიტომ, ამ სიკეთეებზე რაკი წვდომა აღარ აქვთ, სამრევლო სკოლების პედაგოგთა ნაწილმა უკვე ჩააბარა გამოცდები და გადაინაცვლეს საჯარო სკოლების სივრცეში. საჯარო სკოლების პედაგოგებს უკვე მიეცათ შანსი, ერთდროულად იმუშაონ რამდენიმე სკოლაში, ამასთანავე სახელფასო დანამატი, რომელიც კატეგორიების მიხედვითაა განსაზღვრული, ეძლევათ ყველგან, სადაც კი იმუშავებენ. ანუ ერთდროულად თუ მუშაობს სამ სკოლაში, სამივეგან ხელფასზე დანამატს მიიღებს. გაიქცევა სამრევლო სკოლიდან მასწავლებელი, აბა, რას იზამს? _ გვეუბნება სასულიერო სკოლის პედაგოგი, რომელიც, ასევე, ვინაობის დასახელებას ერიდება, თუმცა, გვთხოვს, თემის აქტუალობიდან გამომდინარე, ეს საკითხი აქტიურად გავაშუქოთ.
ოზურგეთის საგანმანათლებლო რესურსცენტრის უფროსი, ლელა იმედაშვილი არ ეთანხმება პედაგოგთა ნაწილის იმ განცხადებებს, რომლებიც სასულიერო სკოლებიდან მასწავლებელთა გადინების მიზეზებზე საუბრობენ, ასევე, გამოცდების წესის და საგნობრივი სტანდარტები შესახებ მათ უარყოფთ მოსაზრებებს:
_ როცა მასწავლებლები საუბრობენ საჯარო და სამრევლო სკოლების განსხვავებულობაზე, ეს არაა მთლად დამაჯერებელი მიდგომა. სამწუხაროდ, სასულიერო სკოლების დაფუძნების ფორმა არის კერძო. შესაბამისად, კერძო სკოლა ამ სავალდებულო ჩარჩოში არ ზის. ისინი მათივე შემოსავლებიდან უზრუნველყოფენ მასწავლებელთა სქემატიკას და სქემის შესაბამის ანაზღაურებას. რაიმე პრინციპული მოთხოვნები სახელმწიფოსგან კერძო სკოლების მიმართ არ არის. მათი დაფუძნების ფორმა არის კერძო, და არ არიან საჯარო. ჩვენ სულ ვამბობთ, რომ სასულიერო სკოლები კერძო სტატუსის გამო, ვერ სარგებლობენ იმ სიკეთეებით, რასაც საჯარო სკოლების პედაგოგები და მოსწავლეები იღებენ. სავარაუდოდ, ამ ყველაფერზე საპატრიარქომ უნდა იზრუნოს. მეტს ვერაფერს გეტყვით, რადგან სამართლებრივად ჩემი კომპეტენცია არ არის, რომ ვიმსჯელო იმაზე, კერძო სტატუსი უნდა მოეხსნას თუ არა. ვიმეორებ, პრობლემის მოგვარების გზა საპატრიარქომ უნდა ეძებოს. ალბათ, უნდა მიმართონ საპატრიარქოს შესაბამის კურატორს, განათლების მიმართულებით. ჩვენი პრეროგატივა ეს არ არის, _ ამბობს ლელა იმედაშვილი.
მისივე განმარტებით, “მასწავლებლებს, რომლებიც უკმაყოფილო არიან გამოცდების შედეგებით, არათუ შვიდი-რვა წელი, კიდევ დამატებით ოთხი წელი ჰქონდათ დრო, რომ მინიმუმ, ერთი კრედიტი აეღოთ და ამ მდგომარეობამდე არ მისულიყვნენ. ახლა განმარტებებს ვერ გავაკეთებ, რას ნიშნავს ეს ერთი კრედიტი. იციან მათ, ვისაც ამდენი წელია, შეხება აქვს მიმდინარე გამოცდებთან და არსებულ წესებთან. დადგა ეს დრო, როცა აღმოჩნდნენ ამ მდგომარეობაში. რაც შეეხება ხელფასს, რაკი მასწავლებლები მუდამ წუწუნებდნენ, რომ მათი ანაზღაურება იყო მცირე, მათ მიეცათ შანსი, რომ რამდენიმე სკოლაში ასწავლონ. დიახ, ისინი ყველგან მიიღებენ კატეგორიის მიხედვით დანამატს”, _ ამბობს იმედაშვილი.
რაც შეეხება დაწყებით კლასებში გამოცდებზე მოსულ არაშესატყვის თემებს, ლელა იმედაშვილი ზოგად შეფასებას აკეთებს:
_ ვერ ვიმსჯელებ კონკრეტულად, რადგან ეს ჩემი კომპეტენცია არ არის. მე ნამდვილად არ ვიცნობ დაწყებითი კლასების საგნობრივ სტანდარტებს. თუმცა, ხშირად ძალიან მიკვირს, რომ თვით დაწყებითის პედაგოგები არ იცნობენ ამ სტანდარტს. მე ტრენერიც ვარ და შეხვედრებზე გაოცებული ვრჩები, როცა მასწავლებლები, რომლებიც მუშაობენ კონკრეტული სკოლის დაწყებითი კლასების პედაგოგებად, არ იცნობენ სტანდარტებს. ვიმეორებ _ სტანდარტი რას ითვალისწინებს, ვერ შევალ მსჯელობაში, თუმცა არ მგონია, რომ იქ სტანდარტებს ზევით იყოს რაიმე. ხომ ჩააბარა ბევრმა? ესე იგი, დაძლევას ექვემდებარება, ხომ? _ კითხვას სვამს იმედაშვილი.
კითხვაზე, სავარაუდოდ, რამდენი მასწავლებელი დატოვებს სკოლას მომავალი წლიდან, ანუ, სამწუხაროდ, რამდენმა პედაგოგმა ვერ ჩააბარა გამოცდა და მოუწევს სკოლების დატოვება, ლელა იმედაშვილი ამბობს, რომ ასეთ სტატისტიკას მოერიდებიან, რადგან მათზეა დამოკიდებული, ამ ინფორმაციას გააჟღერებენ თუ არა. თუმცა, ეს სკოლაში მათ საქმიანობაზე ისედაც აისახება:
_ რაც შეეხება, შედეგებს, ჩვენ თხუთმეტ დეკემბრამდე ველოდებით, ახლა ეს დაკონკრეტებით არ ვიცი, თუმცა, კიდევ რამდენი მასწავლებელი დაიწყებს სკოლაში მუშაობას და რამდენი წავა, ეს სტატისტიკა გვექნება, _ გვითხრა იმედაშვილმა.
