საქართველოს უზენაესი სასამართლოს თავმჯდომარემ, ნინო გვენეტაძემ, 2016 წლის განმავლობაში შემოსავლის სახით 129 445 ლარი აიღო, რაც წინა წლის შემოსავალს 27 246 ლარით აღემატება, ხოლო 2014 წლის შემოსავალზე 10 022 ლარით ნაკლებია_ ამის შესახებ გვენეტაძის ქონებრივ დეკლარაციაშია აღნიშნული.
საჯარო სამსახურის ბიუროს ვებ-გვერდზე გამოქვეყნებული ქონებრივი დეკლარაციებიდან ირკვევა, რომ 2015 წელს, გვენეტაძის შემოსავალი საქართველოს უზენაესი სასამართლოდან 102199.36 ლარი იყო.
რაც შეეხება 2014 წლის შემოსავალს, გვენეტაძის დეკლარაციიდან ირკვევა, რომ მას ჯამში შემოსავლის სახით 139 467 ლარი აქვს მიღებული.
სანამ ნინო გვენეტაძე უზენაესი სასამართლოს თავმჯდომარე გახდებოდა, სოლიდური შემოსავლები მისი სამეცნიერო საქმიანობიდან აქვს მიღებული.
კერძოდ,შპს ქართულ-ამერიკული უნივერიტეტის სრული პროფესორის, სადოქტორო და სამაგისტრო პროგრამების ხელმძღვანელის თანამდებობიდან – 98225.00 ლარი;
იუსტიციის სასწავლო ცენტრის საექსპერტო მომსახურებიდან – 8080 ლარი;
იურიდიული განათლების ხელშეწყობის ფონდიდან (სისხლის სამართლის ლექტორი) 1879.00 ლარი;
EU პროექტის „ჰუმან დაინამიქსიდან“ გრანტის სახით – 23454.00 ლარი;
საია-ს განათლების ფონდის პროექტიდან – 4265.00 ლარი, ხოლო „ფონდი ღია საზოგადოება -საქართველოდან გრანტის სახით –3564.00 ლარი.
2017 წელს შევსებული დეკლარაციის თანახმად, ნინო გვენეტაძის ქონებრივი მდგომარეობა გასულ წლებთან შედარებით არ შეცვლილა. ის თბილისში მდებარე ორ ბინას და მიწის ნაკვეთს ფლობს. კერძოდ, ნინო გვენეტაძის საკუთრებაშია 2007 წელს, 49000,00-დოლარად ნაყიდ, 70,00 კვ.მ-ის ფართობის ბინას თბილისში, პანკისის 3 ნომერში, ასევე, 2010 წელს, 90000,00-დოლარად ნაყიდ 140,00 კვ.მის ფართობის ბინას პანკისი-ბოლქვაძის ქუჩების კვეთაზე და 2014 წელს, 5500,00-დოლარად შეძენილ 11,00 კვ.მ-ის ფართობის მიწის ნაკვეთს დიღომში, “დიღმის სავანეში“.
რაც შეეხება მის ფინანსურ მდგომარეობას, 2017 წელს, დეკლარაციის შევსების მომენტში, ნინო გვენეტაძეს „რესპუბლიკა ბანკის“ სახელფასო ანგარიშზე 2261,11 ლარი ჰქონდა.
აქვე უნდა აღინიშნოს, რომ გვენეტაძის სახელზე სამი სესხია, კერძოდ, 60000,00– დოლარიანი სესხი მას 2007 წელს აუღია და ვადა 2017 წლის დეკემბერში ეწურება, „რესპუბლიკა ბანკისთვის“ კი, გასულ წელს 7668,00 დოლარი გადაუხდია.
10000,00-ლარიანი სესხი ამავე ბანკიდან 2014 წელს აქვს აღებული და ვადა 2017 წლის 30 სექტემბერს ეწურება, გასულ წელს კი, ბანკს 4044,00 ლარი გადაუხადა.
რაც შეეხება 30000,00-დოლარიან სესხს, ის გვენეტაძეს „რესპუბლიკა ბანკიდან“ 2014 წლის 12 თებერვალს აუღია ვადაა 2019 წლის 12 თებერვალს ეწურება და ბანკისთვის გასულ წელს 8319,00 დოლარი აქვს გადახდილი.
