დეკანოზი კონსტანტინე პაიჭაძე ფეისბუქის საკუთარ გვერდზე პოსტს აქვეყნებს.
დეკანოზის პოსტს “გურია ნიუსი” უცვლელად გთავაზობთ.
“ყოველთვის და რამდენჯერც კარგი რამ დავწერე ამერიკელებზე და კარგად მოვიხსენე ამერიკა, იმდენჯერ იყო საპასუხოდ, რომ ქართველები ყველაზე ღვთის მოყვარე ერი ვართ, ჩვენ გამორჩეულად ვუყვარვართ ღმერთს, რომ ამერიკა მასონებისაა და ჩაიძირება, დაიწვება და საქართველო გაბრწყინდება.
გაუგონარი რელიგიური უმეცრების შედეგია, ასე გეგონოს ადამიანს, რომ ღმერთში სიყვარულის გრძნობები ისეა დაყოფილი, რომ მე პაიჭაძეობის გამო, უფრო ვუყვარვარ უფალს, ვიდრე რომელიმე მართლმადიდებელი სმიტი.
გარდა ამერიკელებისა, ამ კონტინეტზე უზარმაზარი მართლმადიდებლური დიასპორებია _ ბერძნების, უკრაინელების, რუსული ემიგრაციული, სერბული და ა.შ. გასაოცარი კომუნიკაცია აქვთ მართლმადიდებელ ეპისკოპოსებს, რომლებსაც შექმნილი აქვთ მართლმადიდებელ მღვდელმთავართა ანსამბლეა, რომლის წევრიც არის ჩვენი მღვდელმთავარი მეუფე საბა (ინწკირველი). აქვთ მუდმივი კომუნიკაცია, იკრიბებიან წელიწადში რამდენჯერმე, განიხილავენ მიმდინარე საკითხებს და ერთიან შეჯერებულ პასუხებს დებენ.
გარდა ამისა, საქართველოში, რელიგიურ საზოგადოებაში ძალიან ცნობილია და რამდენიმე გზის ითარგმნა სერაფიმ როუზის, ეფრემ არიზონელის შრომები. ცნობისთვის, ესენი ამ კონტინენტზე მოღვაწე სასულიერო პირები იყვნენ. ეფრემ არიზონელის საძმომ მთელ ამერიკაში 18 მონასტერი დააარსა. უნდა ნახოთ, როგორი სამონასტრო ცხოვრებაა, როგორი გაწყობილი ტიბიკონით. ასევე, ალასკის არქიპელაგის კუნძულებზე არის ბულგარელების, სერბების და ამერიკის ავტოკეფალური ეკლესიის მონასტრები.
საღვთისმსახურო და ლოცვების წიგნი პირველად აქ ვნახე ბრაილის შრიფტით დაბეჭდილი. ბეჭდურ ნაშრომებს, წიგნებს თვლა და სათვალავი არ აქვს. რატომ უნდა გვეგონოს, რომ ეს ხალხი არ ეყვარება ღმერთს, რომ ჩაძირავს და დაბუგავს???
10 წელია, ჩვენი ეპარქია არსებობს ამ კონტინენტზე. ეს ქვეყანა გვაძლევს საშუალებას ჩვენს ენაზე ვიმსახუროთ, გვიწყობს ხელს, გვქონდეს ჩვენი კერა და არასოდეს არავისგან შევზღუდულვართ.
შევეცდები გზადაგზა მოგიყვეთ იმ მონასტრებსა და სამონასტრო ცხოვრებაზე, რაც მე თვითონ მინახავს აქ.
p.S. წინასწარ ვწერ _ მიყვარს საქართველო და არაფერი დამვიწყებია და არც გადავგვარებულვარ. აქაც მართლმადიდებელი ქართველი ვარ. ვცდილობ, კი არ ვაქო, არამედ ობიექტური ვიყო. იმსახურებს ეს ქვეყანა მადლობას ქართული დიასპორისგან“, _ წერს დეკანოზი კონსტანტინე პაიჭაძე.
ცნობისთვის, რამდენიმე დღის წინ, აღდგომის დღესასწაულთან დაკავშირებით, დეკანოზი კონსტანტინე ალასკის შტატის კუნძულ კოდიაკზე იმყოფებოდა, სადაც წმიდა იოანე სანფრანცისკოელის სახელობის ეკლესიაში მსახურობდა.
სწორედ, კუნძულზე ყოფნისას მიღებული შთაბეჭდილების გაზიარებას მოჰყვა სოციალური ქსელის მომხმარებელთა არაერთგვაროვანი რეაქცია.
ამავე თემაზე: ჩოხატაურიდან ალასკამდე _ კუნძულზე მცხოვრები ერთადერთი ქართველი
