რას ამბობენ გურიაში გახარიას და “ლელოს” შეთანხმების შესახებ

პარტია “გახარია საქართველოსთვის” და “ლელო – ძლიერი საქართველო” თვითმმართველობის არჩევნებთან დაკავშირებით თანამშრომლობაზე შეთანხმდნენ.

პარტიებს შორის თანამშრომლობის შესახებ მემორანდუმს ხელი “გახარია საქართველოსთვის” აღმასრულებელმა მდივანმა ბერდია სიჭინავამ და “ლელო – ძლიერი საქართველოს” გენერალურმა მდივანმა, ირაკლი კუპრაძემ მოაწერეს.

“ქვეყანაში გვაქვს სერიოზული პოლიტიკური კრიზისი, ფაქტობრივად, ყველა სახელმწიფო ინსტიტუტი არის მიტაცებული. მმართველი პარტია გასულია სახელმწიფოს მართვის კონსტიტუციური ჩარჩოებიდან და ამ პირობებში განსაკუთრებულ მნიშვნელობას იძენს პრაგმატული თანამშრომლობა და ურთიერთკოორდინაცია. სწორედ ამ მიზნით, ჩვენი პოლიტიკური გაერთიანება და კოალიცია “ძლიერი საქართველო” აცხადებს შეთანხმების, მემორანდუმის, თანამშრომლობის საწყის პრინციპებს, რაც გულისხმობს საერთო ბრძოლას, კოორდინაციას ადგილობრივი თვითმმართველობის არჩევნებზე, იმიტომ, რომ ეს არ არის სტანდარტული არჩევნები, შესაბამისად, ჩვენ უნდა გამოვრიცხოთ ურთიერთკონკურენცია ამ არჩევნებზე, ამიტომ მერობის არაპარტიულ ნეიტრალურ კანდიდატზე ვეცდებით შეთანხმება დავდოთ.

ასევე, მაჟორიტარობის დეპუტატობის კანდიდატებზე, ანდა საერთო პარტიულ კანდიდატებზე, რაც, რა თქმა უნდა, არ ნიშნავს იმას, რომ რაიმე ფორმით ნორმალიზებას ვახდენთ რაიმე პროცესის. ეს პირიქით, პროტესტის გაფართოების და ახალი მუხტის მიცემის დამატებითი საბრძოლო ხაზია. სამწუხაროდ, დღეს ქვეყანაში “ოცნებას” ჯერ კიდევ ჰყავს მხარდამჭერთა რაოდენობა, ამიტომ განსაკუთრებულ მნიშვნელობას იძენს თითოეულ ადამიანთან მისვლა, რომლებიც უნდა დავარწმუნოთ, რომ “ოცნება” არის ანტიეროვნული, ანტისახელმწიფოებრივი პოლიტიკის მატარებელი პოლიტიკური ძალა, რომელიც აუცილებლად უნდა იყოს ოპოზიციაში. არჩევნები არის, რა თქმა უნდა, ერთ-ერთი ასეთი გზა.

მე ვფიქრობ, ჩვენ პრაგმატული თანამშრომლობის კარგი მაგალითი ვაჩვენეთ სხვა დანარჩენ ოპოზიციურ პოლიტიკურ სპექტრს და ამიტომ ჩვენ ამ თანამშრომლობისთვის, მემორანდუმში ასახულ პრინციპებზე დაყრდნობით, რა თქმა უნდა, მზად ვართ, ნებისმიერ პოლიტიკურ პარტიასთან, საზოგადოებრივ მოძრაობასთან, სტუდენტურ მოძრაობასთან, ცალკეულ ინდივიდებთან, თუ პროტესტში ჩართულ გმირ ადამიანებთან”, _ განაცხადა სიჭინავამ “ლელო – ძლიერ საქართველოსთან” მემორანდუმის გაფორმების შემდეგ.

“ლელო – ძლიერი საქართველოს” ჩოხატაურელი ლიდერი მალხაზ ჩხიკვაძე ჩვენი კითხვის პასუხად, თუ რა მოლოდინები აქვს თვითმმართველობის არჩევნებზე გახარიას პარტიასთან თანამშრომლობის შედეგად, გვპასუხობს:

_ მოკლედ, რომ გიპასუხოთ, აქტიური წინააღმდეგობის გაძლიერების მოლოდინი გვაქვს.

უფრო ვრცლად კი, მოლოდინი გვაქვს, რომ გაძლიერდება საზოგადოების წინააღმდეგობა მთელი ქვეყნის მასშტაბით იმისათვის, რომ საქართველო დაუბრუნდეს დემოკრატიულ და ცივილური განვითარების გზას, რომ ქვეყანაში, ყველა დონეზე, არ მოხდეს ერთპარტიული ავტოკრატიული რეჟიმის ჩაბეტონება. ეს შეთანხმება მარტო ორ პარტიას შორის შეთანხმება არაა _ ესაა პარტიებსა და საზოგადოებრივ ჯგუფებს შორის და რაც მთავარია, ყველა იმ მოქალაქეს შორის შეთანხმება, ვისაც სურვილი და ბრძოლის ჟინი აქვს წინააღმდეგობა გაუწიოს და დაამარცხოს “ქართული ოცნება”.

კონსტიტუციით განსაზღვრული ადგილობრივი არჩევნები, რომელმაც რეალურად სულ სხვა ფუნქცია შეიძინა და გახდა წინააღმდეგობის და ბრძოლის ერთ-ერთი დამატებითი ველი, რუსთაველის გამზირზე უწყვეტად მიმდინარე პროტესტის მოთხოვნების და სულისკვეთების ყველა სოფელში გავრცელების საშუალებად იქნება გამოყენებული, რაც ჩვენი მთავარი მოთხოვნების _ ახალი საპარლამენტო არჩევნების დანიშვნას და პოლიტპატიმრების გათავისუფლებას, ხელს შეუწყობს.

ჩემი აზრით, პარტია ვალდებულია, ამომრჩეველი არ დატოვოს არჩევნის გარეშე.  “ქართული ოცნების” მოწინააღმდეგეებს ყველგან უნდა მიეცეთ საშუალება, დააფიქსირონ თავიანთი პროტესტი. პროტესტის დაფიქსირების ყველაზე შედეგიან და მძლავრ იარაღად არჩევნებში მონაწილეობა და ოპოზიციისთვის ხმის მიცემა მიმაჩნია, _ გვითხრა ჩხიკვაძემ.

გახარიას პარტიის და “ლელო – ძლიერი საქართველოს” მიერ თვითმმართველობის არჩევნებში მონაწილეობის გადაწყვეტილებას, რომელიც ცნობილის ცოტა ხნის წინ გახდა, კრიტიკა მოჰყვა სხვა ოპოზიციური პარტიების მხრიდან, რომლებიც გასულ წელს ჩატარებული საპარლამენტო არჩევნების შედეგებს არ ცნობენ და ბოიკოტის ნიშნად არც თვითმმართველობის არჩევნებში გეგმავენ მონაწილეობას.

“გურია ნიუსთან” ჩოხატაურის მუნიციპალიტეტის საკრებულოს წევრი, კოალიცია “ცვლილებებისთვის” წარმომადგენელი ბაჩო ახალაძე ამ გადაწყვეტილებას პოლიტიკურად გაუმართლებელს უწოდებს:

“გახარიას პარტიასა და “ლელოს” შორის თანამშრომლობის შეთანხმება თვითმმართველობის არჩევნებთან დაკავშირებით, იმ პირობებში, როდესაც ოპოზიციის ძირითადი ნაწილი ბოიკოტის რეჟიმშია, პოლიტიკურად გაუმართლებელი და მორალურად პრობლემური ნაბიჯია.

ამ ეტაპზე, როდესაც ქვეყანაში დაახლოებით 60-მდე პოლიტპატიმარია, სასამართლო სისტემა სრულად პოლიტიზებულია და ძირითადი ოპოზიციური ძალები არალეგიტიმურ საარჩევნო გარემოს უპირისპირდებიან, ამგვარი შეთანხმება რეალურად ხელს უწყობს არა დემოკრატიული პროცესის გაძლიერებას, არამედ ხელისუფლების თამაშის წესების ლეგიტიმაციას.

 “ლელოსა” და გახარიას ამ ნაბიჯს შეიძლება დავარქვათ ბოიკოტის რღვევა და ოპოზიციური ერთობის მიზანმიმართული საბოტაჟი.

შეიძლება ითქვას, რომ “ლელოსა” და გახარიას ალიანსი ამ ეტაპზე არ ემსახურება არც დემოკრატიულ მიზნებს, არც ამომრჩევლის ინტერესებს….

ასეთ ფონზე, ამ შეთანხმებას ვერ ვუწოდებთ პასუხისმგებლიან ოპოზიციურ ქმედებას – ეს არის ინსტრუმენტი ხელისუფლების ინტერესების მომსახურების, რომლებიც ცდილობენ შექმნან “დემოკრატიის” დეკორაცია და დაფარონ რეალური კრიზისი ქვეყანაში”, _ ამბობს ბაჩო ახალაძე.

“ერთიანი ნაციონალური მოძრაობის” ლანჩხუთის რაიონული ორგანიზაციის თავმჯდომარე კახა ასკურავა კი პოლიტიკური პარტიების მიერ მიღებული გადაწყვეტილების შეფასებისას გვეუბნება:

“არჩევნები არის მიტაცებული და ჩვენ ამ არჩევნებზე არ გავდივართ. სამწუხაროდ, “ლელოს” მივიჩნევდით კოალიციურ პარტნიორად, გახარია კი”ნაციონალური მოძრაობისთვის” ყოველთვის იყო ქოცი და რჩება ქოცად, “ლელომაც” სამწუხაროდ მათი გზა აირჩია და დარწმუნებული ვარ, რომ ამ გადაწყვეტილებას აუცილებლად ინანებენ”, _ ამბობს ასკურავა.

“ლელო – ძლიერი საქართველოს” და გახარიას პარტიებს შორის თანამშრომლობის შეთანხმების შესახებ გაკეთებულ განცხადებას გამოეხმაურა “ნაციონალური მოძრაობის” თავმჯდომარე თინა ბოკუჩავა:

“მინდა გამოვეხმაურო იმ პოლიტიკურ ქორწინებას, რომელიც როგორც ჩანს, შედგა გიორგი გახარიას და “ლელოს” შორის. სამწუხაროდ, ჩემი შეფასებით, ეს არ არის თანამშრომლობის პაქტი გიორგი გახარიასა და მამუკა ხაზარაძეს შორის, ეს არის თანამშრომლობის პაქტი ამ ორ პოლიტიკურ ძალასა და ბიძინა ივანიშვილს შორის. დღეს გაფორმდა ეს პაქტი, სამწუხაროდ და ჩვენ ყველაფერს უნდა დავარქვათ თავისი სახელი”, _ განაცხადა ბოკუჩავამ.

“ოცნებაში” კი მიაჩნიათ რომ ოპოზიცია მარცხისთვის არის განწირული:

“ხედავთ, რამდენად მძიმე მდგომარეობაა რადიკალურ ოპოზიციაში, ერთმანეთთანაც არიან დაპირისპირებული _ ორი პარტია ორ პარტიას აგინებს იმის გამო, რომ მათ გადაწყვიტეს ადგილობრივ თვითმმართველობის არჩევნებში მონაწილეობა”, _ ამის შესახებ ოფიციალური ინფორმაციით პრემიერ-მინისტრმა, ირაკლი კობახიძემ ჟურნალისტებთან განაცხადა.

კობახიძის თქმით, ოპოზიცია დღეს კიდევ უფრო დასუსტებულია, ამიტომ, ნებისმიერი კონფიგურაციით განწირულია ძალიან მძიმე მარცხისთვის.

ცნობისთვის, მუნიციპალიტეტის წარმომადგენლობითი ორგანოს – საკრებულოს და თვითმმართველი ქალაქის/თვითმმართველი თემის მერის არჩევნები 2025 წლის 4 ოქტომბერს არის ჩანიშნული.