სოციალურ ქსელში ვრცელდება ხონის მკვიდრის, მალხაზ ძიძიგურის სტატუსი ფოტოებით, სადაც ავტორი საუბრობს ყოფილი პარლამენტარის კაკო ბობოხიძის და მისი ძმის და ლევან ბობოხიძის მიერ ათეულობით ნაძვის ხის მოჭრაზე. მარადმწვანე მრავალწლოვანი წიწვოვანები, მისი თქმით, მოჭრილია ხონში, ყოფილი ქიმიური ქარხნის საერთო საცხოვრებლის მიმდებარე ტერიტორიაზე.
„სიტყვები არ მყოფნის, მაგრამ მოვახლაფორთებ რაღაცას:
_ ხონში გახლდით მეზობლის დასაფლავებაზე, სადაც ერთი ახლობელი შემხვდა და ისეთი რამ მაცნობა, ჯერ თმები ყალყზე დამიდგა, მერე კი აღშფოთებისგან სუნთქვა შემეკრა, თუმცა კითხვის დასმა კი მოვასწარი:
_ ეს მართალია?
_ სრულიადო, _ მითხრა თვითონაც გაბრაზებულმა, ჩამსვა მანქანაში და იქვე, რამდენიმე კილომეტრში მიმიყვანა.
_ ყველა ხონელმა კარგად იცის ეს ადგილი: ყოფილი ქიმიური ქარხნის ყოფილი საერთო საცხოვრებლის მიმდებარედ მდებარე ყოფილი სტადიონი, სადაც ბევრი მრავალათეულწლოვანი ნაძვი იზრდებოდა, საიდანაც მხოლოდ რამდენიმე ათეული დატოვეს მოუჭრელი და მასაც მალე მიადგებიან“, _ წერს ძიძიგური და იქვე ფოტოებს აქვეყნებს.
„გურია ნიუსი“ მალხაზ ძიძიგურს ესაუბრა.
მან დაგვიდასტურა, რომ ასეთი ფაქტი ნამდვილად მოხდა. თქვა ისიც, რომ მერიის თანამშრომლებიც ვერაფერს ეუბნებიან, ბობოხიძეებს ეს „მათი ზეობისას ჩაუგდიათ ხელში და საჯარო რეესტრში ფიქსირდებაო“.
„რუსეთთან ომის დროს შეუსყიდია ეს ტერიტორია ლარად და ახლა მიადგა მოსაჭრელად“, _ წერს ძიძიგური.
„გურია ნიუსი“ გარემოს დაცვის და სოფლის მეურნეობის სამინისტროს დაუკავშირდა.
გარემოს დაცვის დეპარტამენტის პიარსამსახურში გვითხრეს, რომ გადაამოწმებენ და პასუხს მალე შეგვატყობინებენ.
