დღეს, “ხალხის ძალამ” საქართველოს პარლამენტს წარუდგინა კანონპროექტი „უცხოური გავლენის გამჭვირვალობის შესახებ“. მათი თქმით, ეს კანონი “გამჭვირვალობის უზრუნველყოფის მიზნით აწესრიგებს სუბიექტის უცხოური გავლენის აგენტად რეგისტრაციას.”
“ხალხის ძალის” კანონპროექტის მიხედვით, “უცხო აგენტად” დასახელდებიან იურიდიული პირები, მათ შორის, მედიასაშუალებებიც, რომელთა შემოსავლის 20%-ზე მეტის წყარო “უცხოური ძალაა”, ანუ საგრანტო პროექტებია.
საქართველოში დამოუკიდებელი მედიის უდიდესი ნაწილი სწორედ უცხოური არასამთავრობო და დონორი ორგანიზაციებიდან მიღებული გრანტებით ფინანსდება.
კანონპროექტის მიხედვით, “შემოსავალში” იგულისხმება არა მხოლოდ თანხა, არამედ ნებისმიერი მოძრავი ან უძრავი ნივთი, რომელიც მედიასაშუალებამ უცხოური დაფინანსებით შეიძინა.
“იმ შემოსავლის ღირებულება, რომელიც არ არის ფულადი თანხა, მისი საბაზრო ფასით გამოითვლება“, _ წერია კანონპროექტში.
მედიას მოუწევს უცხო აგენტად რეგისტრაციისათვის მიმართოს იუსტიციის სამინისტროს იმ შემთხვევაშიც, თუ “პირდაპირ ან არაპირდაპირ მიიღო შემოსავალი იმ იურიდიული პირისგან, რომელმაც უცხოური ძალისგან პირდაპირ ან არაპირდაპირ მიიღო შემოსავალი.”
კანონპროექტში ნათქვამია, რომ უცხოური გავლენის აგენტად რეგისტრაციისთვის თავის არიდება ან საფინანსო დეკლარაციის წარუდგენლობა გამოიწვევს დაჯარიმებას 25 000 ლარით.
კიდევ ვის მიიჩნევენ კანონპროექტის ავტორები “უცხოურ ძალად”? ფონდებს, ასოციაციებს, კორპორაციებს, კავშირებს, და სხვა ორგანიზაციებს, ან გაერთიანებას, რომელიც სხვა სახელმწიფოს სამართლის საფუძველზეა დაფუძნებული.
კანონპროექტი “უცხოურ ძალად” განსაზღვრავს:
_ უცხო ქვეყნის ხელისუფლების წარმომადგენელს;
_ ფიზიკურ პირს, რომელიც არ არის საქართველოს მოქალაქე;
_ იურიდიულ პირს, რომელიც არ არის დაფუძნებული საქართველოს კანონმდებლობის საფუძველზე.
