გასული 24 საათის განმავლობაში, ოზურგეთში კორონავირუსის 92 ახალი შემთხვევა დაფიქსირდა, მაგრამ ოზურგეთის საზოგადოებრივი ჯანდაცვის ცენტრის ეპიდემიოლოგი ელზა სიმონიშვილი ამბობს, რომ დაფიქსირებული შემთხვევების რიცხვი შესაძლოა კიდევ უფრო გაიზარდოს.
„დადასტურებული 92 შემთხვევა მხოლოდ სწრაფი ტესტების შედეგებია, ველოდებით პსრ ტესტების პასუხებს, რის შედეგადაც შეიძლება ინფიცირებულთა რიცხვი გაიზარდოს“,_ ამბობს სიმონიშვილი.
ელზა სიმონიშვილის ჩვენთან საუბრისას ამბობს, რომ ინფიცირების შემთხვევების ზრდა აცრის დაბალმა ტემპმა და რეგულაციების დარღვევამ გამოიწვია.
მისი თქმითვე, კორონავირუსით ინფიცირების შემთხვევები ორჯერ აცრილ პირებშიც დაფიქსირდა.
„შემთხვევების ზრდა რეგულაციების დარღვევამ და აცრის დაბალმა ტემპმა გამოიწვია. განსაკუთრებით მინდა ავღნიშნო, რომ ორჯერ აცრილები ვინც არიან მათ შორისაც დადასტურდა რეინფიცირების შემთხვევები. გასული იყო ორ კვირაზე მეტი პერიოდი და მაინც დაინფიცირდნენ. აქედან გამომდინარე ეს ხალხი გათამამდა, არ იცავდნენ რეგულაციებს, არც პირად ჰიგიენას, არც დისტანციას და შედეგეგი არის ის რომ დაინფიცირდნენ, რა თქმა უნდა მსუბუქი ფორმით. ორჯერადი აცრა არ ნიშნავს იმას, რომ ადამიანი გათამამდეს და რეგულაციები აღარ დაიცვას. პირველ რიგში რეგულაციების დაცვა გვჭირდება ვაქცინაციასთან ერთად, რომ შევაჩეროთ ახალი ტალღა, რომელიც საოცარი მაჩვენებელია პატარა რაიონისთვის“,_ ამბობს სიმონიშვილი.
ეპიდემილოგი გვეუბნება, რომ ხალხმრავალი თავშეყრისგან თავისშეკავებაა საჭირო.
რაც შეეხება ეპიდვითარებას ოზურგეთში, სიმონიშვილის თქმითვე, ყველაზე მეტი შემთხვევა ამ ეტაპზე შრომაში, ლაითურში და ნარუჯაში ფიქსირდება.
„ინფიცირების შემთხვევები გაფანტულია მთელი რაიონის ფარგლებში. ეპიდაფეთქების მსგავსი არ გვაქვს, მაგრამ შრომა, ლაითური, ნარუჯა – ის სოფლებია, სადაც შედარებით მეტი შემთხვევა ფიქსირდება. ეს სოფლები სხვა სოფლებთან შედარებით ხალხმრავალია. ყველა არის ინდივიდუალურ მეურნეობაში მომუშავე და ყველა დადასტურებული შემთხვევა ოჯახურ კონტაქტებთან ერთად არის 12 დღიან იზოლაციაში“,_ ამბობს სიმონიშვილი.
[sexy_author_bio]
