იანვრის არდადეგების დასრულებამდე სულ რამდენიმე დღე რჩება.
ოზურგეთის საზოგადოებრივი ჯანდაცვის ცენტრის ეპიდემიოლოგი ელზა სიმონიშვილი “გურია ნიუსთან” საუბრობს იმის შესახებ, თუ რას უნდა მიექცეს განსაკუთრებული ყურადღება სასწავლო წლის განახლებასთან დაკავშირებით.
“არდადეგების შემდგომ სასწავლო წლის განახლებასთან დაკავშირებით,საყურადღებოა ბავშვთა ასაკისათვის დამახასიათებელი და ზოგადად ინფექციური დაავადებების პრევენციული ღონისძიებების დაცვა, რადგანაც ბავშვთა კოლექტივებში, მაღალი მობილობის პირობებში იზრდება აღნიშნული დაავადებების აღმოცენებისა და გავრცელების რისკი.
ამ მხრივ საყურადღებოა როგორც სასკოლო, ასევე მცირე ასაკის–საბაგო და საბაღო ასაკის ბავშვები.
ამასთანავე საახალწლო დღეებში მიმდინარე და კვლავაც დაგეგმილი გასართობი და სადღესასწაულო ღონისძიებების დროს განსაკუთრებით საყურადღებოა ჰაერ–წვეთოვანი გზით გადამდები დაავადებების თავიდან აცილება”,,_ განაცხადა ელზა სიმონიშვილმა.
ზამთრის სეზონისათვის დამახასიათებელი სეზონური გრიპის შემთხვევები მუნიციპალიტეტში ამჟამად გადანაწილებული გახლავთ სხვადასხვა ასაკობრივ ჯგუფში. თუმცა,ზოგადად ამ მხრივ განსაკუთრებით საყურადღებოა მცირე ასაკის ბავშვები, ორსულები, ხანდაზმული პირები, სხვადასხვა ქრონიკული დაავადების მქონე პაციენტები”,_ ამბობს სიმონიშვილი.
რაც შეეხება სეზონური გრიპის ახალი შემთხვევების ტიპურ მიმდინარეობას, სიმონიშვილის თქმით, მას ახასიათებს:
ტემპერატურის მკვეთრი მატება,
ყელის, თავის, სახსრების ტკივილი,
საერთო სისუსტე და ინტოქსიკაციის ზოგადი ნიშნები.
როგორც არაერთხელ აღგვინიშნავს, სეზონურ გრიპთან ბრძოლის ყველაზე ეფექტურ ღონისძიებებს მიეკუთვნება პრევენციული ღონისძიებების დაცვა და ვაქცინაცია, რომელიც ჩვენში შემოდგომიდან დაიწყო– ოთხ კომპონენტიანი ვაქცინით.
ხოლო პრევენციულ–პროფილაქტიკურ ღონისძიებებში იგულისხმება:
დისტანცირება,
პირადი დაცვის საშუალებათა გამოყენება,
ნებისმიერი მწვავე რესპირატორული სიმპტომის გამოვლენისთანავე იზოლირება, სიმპტომებზე დაკვირვება,
ოჯახის ექიმის საქმის კურსში ჩაყენება, მკურნალობის სრულყოფილად განხორციელება, ხოლო ბაქტერიული ინფექციის თანდართვისას, შესაბამისი ანტიბიოტიკო –თერაპია, სპეციალისტის დანიშნულებით და არავითარ შემთხვევაში საკუთარი შეხედულებით.
სეზონური გრიპის პიკი, როგორც წესი, მოდის დეკემბერ–იანვრის თვეებზე, შესაბამისად, შეიძლება მივიჩნიოთ, რომ ამჟამად ვიმყოფებით სწორედ ამ პერიოდში, ამიტომ ყურადღება გვესაჭიროება ყველას და განსაკუთრებით ბავშვთა დაწესებულებებისა და ხანდაზმულთა პანსიონის სამედიცინო პერსონალსა და მენეჯერებს, ასევე სხვა რისკ–ჯგუფებს, რათა შევინარჩუნოთ ჯანმრთელობა და არ დავუშვათ ვირუსული გრიპის შემთხვევათა მასიური გავრცელება და ეპიდაფეთქების შემთხვევები.
გარდა ჰაერ-წვეთოვანი ინფექციებისა, წლევანდელ სასწავლო წელს ადგილი ჰქონდა პარაზიტულ-ინფექციური დაავადება მუნი-ბღერი(სკაბიესის) შემთხვევებს.
ჩვენს მუნიციპალიტეტში აღნიშნული დაავადება დაფიქსირებული იყო ხუთ სასწავლო დაწესებულებაში, თუმცა მასიური სახე ამ შემთხვევებს არ მისცემია.
ბავშვთა დაწესებულებებში ეპიდემიოლოგიური სიტუაციის მართვაში, საზოგადოებრივი ჯანდაცვის ცენტრთან ერთად, უდიდესი როლი ენიჭება ბავშვთა კოლექტივების სამედიცინო პერსონალს(ექიმსა და ექთანს)”ამიტომაც სავალდებულოა აღსაზრდელთა ყოველდღიური კონტროლი და შებამისი სიმპტომების აღმოჩენისას, რეგულაციებით განსაზღვრული ღონისძიებების გატარება, რათა თავიდან ავიცილოთ სხვადასხვა გადამდები დაავადებების აღმოცენება და მასიური გავრცელება“.,_ ამბობს სიმონიშვილი.
