რუსულ ავიაკომპანია „აეროფლოტს“ სქესობრივ დისკრიმინაციაში ადანაშაულებენ. აღნიშნულ ინფორმაციას BBC ავრცელებს.
ბრალდების მიხედვით, ავიაკომპანია გამხდარ და მიმზიდველ ეკიპაჟის წევრებს ანიჭებს უპირატესობას.
მაუწყებლის ცნობით, მოსკოვის სასამართლომ, სამშაბათს,სტიუარდესა ირინა იერუზიმსკაიას საჩივარი სექსუალური დისკრიმინაციის შესახებ, არ დააკმაყოფილა.
გავრცელებული ცნობით, ის გადაწყვეტილების გასაჩივრებას გეგმავს.
როგორც ცნობილია, სტიუარდესამ სასამართლოს მიმართა, რადგან ავიაკომპანიამ ის ტანსაცმლის ზომის გამო შიდა საფრენ რეისებზე გადაიყვანა სამუშაოდ, რის გამოც, მისი შემოსავალი შემცირდა.
მისი თქმით, ავიაკომპანიაში სამუშაოდ მინიმალური სიმაღლე 160 სანტიმეტრს, ხოლო ტანსაცმლის ზომა 48-ს არ უნდა აღემატებოდეს.
მაუწყებლის ცნობით, ის ავიაკომპანიისგან კომპენსაციის სახით 1 მილიონი რუბლის გადახდას ითხოვს.
როგორც ცნობილია, სტიუარდესას მხარს უჭერს რუსეთის ადამიანების უფლებადამცველი ორგანიზაცია და პროფკავშირების გაერთიანების წარმომადგენელი, ბორის კრავჩენკო.
ავიაკომპანია ამტკიცებს, რომ ყოველ ზედმეტ კილოგრამზე აეროფლოტი მეტ საწვავს ხარჯავს.
გავრცელებული ცნობით, კომპანიის თანამშრომლები მინიმალურ სიმაღლის მოთხოვნას უნდა აკმაყოფილებდნენ, რომ ხელბარგის შენახვის შესაძლებლობა ჰქონდეთ.
მაუწყებლის ცნობით, სასამართლომ მალე უნდა განიხილოს კიდევ ერთი სტიუარდესას მსგავსი საჩივარი.
როგორც ავიაკომპანიაში ამბობენ, სტიუარდესები ნებისმიერი ავიაკომპანიის სახეები და ქვეყნის ბიზნეს ბარათები არიან.
„პირველი შთაბეჭდილება რუსეთის შესახებ დამოკიდებულია სტიუარდესების გამოჩენაზე და მომხმარებელთა მომსახურებაზე“,_ამბობენ კომპანიაში.
როგორც სასამართლოში აეროფლოტის წარმომადგენელმა განაცხადა, ყოველი ზედმეტი კილოგრამი ყოველწლიურად 800 რუბლის ზედმეტად დახარჯვას ნიშნავს.
მისივე თქმით, ავიაკომპანიას უფლება აქვს შეადგინოს წონის ლიმიტები და ტანსაცმლის ზომები მისი პერსონალისთვის.
როგორც მაუწყებელს ვეტერანმა პილოტმა, ოლეგ სმირნოვმა განუცხადა, სტიუარდესა ელეგანტური უნდა იყოს, შეეძლოს მგზავრების ადგილებს შორის მოძრაობა და მათი მომსახურება.
ერთ-ერთი პილოტი, მიხაილ მარკოვი კი აღნიშნავს,რომ სტიუარდესა ძლიერი უნდა იყოს, რომ ექსტრემალურ სიტუაციებთან გამკლავება შეძლოს და „ ეს არ არის გოგონების საქმე, რომელთა წონაც 43 კილოგრამს არ აჭარბებს“.
