მაშინ, როცა დაავადებათა კონტროლისა და საზოგადოებრივი ჯანმრთელობის ეროვნული ცენტრის მონაცემებიით საქართველომ ფაქტიურად უკვე გადალახა ,,COVID-19“ პანდემიის მეექვსე ტალღის პიკი, არის თუ არა ისევ აქტუალური ტესტირებისა და ვაქცინაციის აუცილებლობა?!
გადავხედოთ COVID-19-ის უახლეს სტატისტიკას:
11 მარტის მონაცემებით:
დადასტურდა: 1 543 ახალი შემთხვევა;
გამოჯანმრთელდა: 3 198;
აღირიცხა სიკვდილი: 20.
სულ ჩატარდა 13 873 ტესტი _ 10 859-ანტიგენ ტესტი, 3014 პჯრ ტესტი.
უპირატესად ცირკულირებს და დომინანტია ომიკრონის B.A.2 შტამი.
7 დღიანი ტესტირების დადებითობის მაჩვენებელია 14.57 %.
მიუხედავად დადასტურებული შემთხვევების აშკარა შემცირებისა, ეს მონაცემები რბილად რომ ვთქვათ, ჯერ კიდევ შორსაა იმ ციფრებისგან, რომლებიც მოგვცემდა პანდემიის დასასრულის გამოცხადების საშუალებას.
ამიტომ კიდევ ერთხელ გადავხედოთ, თუ რატომ არის ისევ აქტუალური ტესტირებისა და COVID-19-ვაქცინაციის თემა.
რატომ უნდა ჩავიტაროთ ტესტირება
სხვა რესპირატორულ ინფექციებითან მსგავსების გამო, ტესტირება არის ერთადერთი მეთოდი, რომელიც დაადასტურებს კორონავირუსით ადამიანის დაავადების სტატუსს, რისი დადგენის შემდეგაც პაციენტი იქცევა რეგულაციის მოთხოვნათა შესაბამისად:
იმყოფება იზოლაციაში და არ ავრცელებს ვირუსს!
უკავშირდება ექიმს და საჭიროების შემთხვევაში დროულად მოხდება მისი ჰოსპიტალიზაცია, რითაც თავიდან აიცილებს გართულებებსა ლეტალურ გამოსავალს.
არის თუ არა 100% -ით ეფექტური COVID-19-ის საწინააღმდეგო ვაქცინა
მიუხედავად იმისა, რომ COVID-19-ის საწინააღმდეგო ვაქცინებს აქვთ მაღალი ეფექტურობის დონე, გვახსოვდეს, რომ ადამიანს 100%-ით არც ერთი ვაქცინა არ იცავს ვირუსისგან.
მაგრამ
ყველა შემთხვევაში ვაქცინაცია სწორი არჩევანია COVID-19-სგან საკუთარი თავის, ოჯახისა და საზოგადოების დასაცავად.
რადგან:
ვაქცინაცია ამცირებს დაინფიცირების, ავადობისა და სიკვდილობის რისკს და პანდემიის შეჩერების ერთ–ერთი ყველაზე ეფექტური საშუალებაა.
COVID-19-ით გარდაცვალების რისკი განსხვავდება ქვეყნისა და სხვა ფაქტორების მიხედვით,
მაგრამ არავაქცინირებული ადამიანის COVID-19-ით გარდაცვალების ალბათობა 10-დან 20- ჯერ მეტია, ვაქცინირებული პირთან შედარებით.
ვაქცინაცია რეკომენდებულია იმ შემთხვევაშიც, თუ COVID-19 უკვე გადაიტანეთ, რადგან, არსებული მტკიცებულებებით, ინფექციის გადატანის შემდგომ არ ყალიბდება ხანგრძლივი იმუნიტეტი და ადამიანი კვლავ რჩება განმეორებითი ინფიცირების რისკის ქვეშ. საქართველოში არსებული რეგულაციების მიხედვით ვაქცინაცია შესაძლებელია COVID-19-ის ინფექციის დადასტურებიდან 30 დღის შემდეგ.
ვაქცინაციის გარდა:
პანდემიის შესაჩერებლად COVID-19-ის საწინააღმდეგო ვაქცინაციის პარალელურად, ჯერ კიდევ აუცილებელია პრევენციული ღონისძიებების გაგრძელება: ნიღბის ტარება (განსაკუთრებით დახურულ სივრცეში), დისტანცირება და ხელის ჰიგიენის დაცვა.
პანდემიის მთელ პერიოდში დაკვირვებებმა აჩვენა, რომ პრევენციული მეთოდები მუშაობს!
რატომ უნდა მოხდეს მოსახლეობის 70 პროცენტის აცრა?
მოსახლეობის 70%-იანი მოცვა არის ის მინიმალური რაოდენობა, რომელიც შეძლებს ცვლილება შეიტანოს დაავადების შემდგომ გავრცელებაში, რადგან ვაქცინაცია გვეხმარება დავიცვათ როგორც ცალკეული ინდივიდი, ასევე მთლიანად საზოგადოება.
ვაქცინაცია დაავადებისაგან დაცვისა და პანდემიის დასრულების უალტერნატივო საშუალებაა.
ვაქცინაციის შედეგად ისევე ხდება COVID-19-ის საწინააღმდეგო იმუნიტეტის შექმნა, როგორც ე.წ. ბუნებრივი გზით ანუ დაავადების გადატანის შედეგად.
თუმცა
ვაქცინაციისაგან განსხვავებით, დაინფიცირებისას ადამიანი იმყოფება დაავადების მძიმე გართულებებისა და გარდაცვალების რისკის ქვეშ.
ვაქცინაცია მნიშვნელოვანია COVID-19-ის გადატანის შემთხვევაშიც, რადგან ამ შემთხვევაში გამომუშავებული ორმაგი იმუნიტეტი უფრო ხანგრძლივია და უკეთეს დაცვას უზრუნველყოფს.
რამდენად იცავს კოვიდის საწინააღმდეგო ვაქცინა ომიკრონის ვარიანტისგან
არსებული კვლევები ადასტურებს, რომ ვაქცინაცია ეფექტურია, როგორც დელტა ასევე ომიკრონის ვარიანტის წინააღმდეგ და იცავს როგოც ჰოსპიტალიზაციის (დელტა _ 94% და ომიკრონი _ 90%), ასევე მძიმე გართულებებისაგან (დელტა- 94% და ომიკრონი -82%). ამასთან, 3-6 თვის შემდგომ ვაქცინაციის ეფექტურების შემცირების გათვალისწინებით, ვაქცინის მესამე ბუსტერ დოზის მიღება მნიშვნელოვნად ზრდის დაცვას ომიკრონის ვარიანტის წინააღმდეგ, ვინაიდან თითქმის 25-ჯერ ზრდის ომიკრონის საწინააღმდეგო ანტისხეულების რაოდენობას ორი დოზით ვაქცინაციასთან შედარებით.
ვინაიდან, კორონავირუსის ამჟამინდელი სახეცვლილება– ,,ომიკრონი“ ჯერ-ჯერობით არ წარმოადგენს ვირუსის უკანასკნელ მუტაციას!
ვინაიდან, სრულად აცრილთა საერთო რაოდენობა მხოლოდ 43,5%-ია!
ვინაიდან, დადებითობის მაჩვენებელი 14%-ია, ნაცვლად 5%-ისა!
ვინაიდან, ყოველდღიურად ვკარგავთ ათეულობით სიცოცხლეს!
ჯერ კიდევ ნაადრევია პანდემიის დასასრულზე საუბარი და ისევ დგას დღის წესრიგში ტესტირების, ვაქცინაციისა და რეგულაციების დაცვის საკითხი.
გავუფრთხილდეთ საკუთარ ჯანმრთელობას!
