საქართველოს მოსამართლეთა ერთობის” 2017 წლის 30 მაისის განცხადებას მოსამართლეთა კიდევ ერთი ნაწილი ემიჯნება.
„საქართველოს მოსამართლეთა ერთობა“ თბილისის საქალაქო სასამართლოს, თბილისისა და ქუთაისის სააპელაციო სასამართლოების, ასევე სამტრედიისა და ფოთის მოსამართლეებმა დატოვეს.
„ჩვენ, ქუთაისის სააპელაციო სასამართლოს მოსამართლეები: მურთაზ მეშველიანი, მარინა სირაძე, მარინე იმერლიშვილი, თამარ სვანიძე ვაცხადებთ, რომ ასოციაცია “საქართველოს მოსამართლეთა ერთობის” სახელით, 2017 წლის 30 მაისს გამოქვეყნებული წერილი ჩვენთან შეთანხმებული არ ყოფილა და იგი ცნობილი გახდა მხოლოდ მისი გამოქვეყნების შემდეგ.
ჩვენთვის მიუღებელია, ჩვენი სახელით, ჩვენთან შეთანხმების გარეშე რაიმე სახის განცხადების გაკეთება, რის გამოც მივიღეთ გადაწყვეტილება ასოციაცია “საქართველოს მოსამართლეთა ერთობის” დატოვების თაობაზე“, _ აღნიშნავენ მოსამართლეები.
„ასოციაცია “საქართველოს მოსამართლეთა ერთობის“ 2017 წლის 30 მაისის განცხადება მიმაჩნია, რომ წარმოადგენს პროცესების პოლიტიზაციის მცდელობას სასამართლო სისტემის შიგნით. ეს განცხადება ჩემთან შეთანხმებული არ ყოფილა და არ გამოხატავს ჩემს აზრს. იმის გამო, რომ მსგავსი, ჩემთან შეუთანხმებელი და მიუღებელი განცხადებების გამოქვეყნებით არ მოხდეს მათთან ჩემი იდენტიფიცირება, გთხოვთ, ნუღარ ჩამთვლით “მოსამართლეთ ერთობის’’ წევრად, რომელთანაც ბოლო პერიოდში ისედაც გაწყვეტილი მაქვს ურთიერთობა“, _ აღნიშნულია მოსამართლე მურთაზ კაპანაძის განცხადებაში.
„ვაცხადებ, რომ ასოციაცია-“საქართველოს მოსამართლეთა ერთობის” 2017 წლის 30 მაისის წერილის შინაარს და პათოსს არ ვეთანხმები, ის, ჩემთან, როგორც ამ ასოციაციის ერთ–ერთ წევრთან, შეთანხმებული არ ყოფილა, საერთოდ არაფერი ვიცოდი მისი შინაარსისა და გამოქვეყნების შესახებ, ამიტომ, პროტესტის ნიშნად ვტოვებ ასოციაცია-“საქართველოს მოსამართლეთა ერთობის” რიგებს“, _ აცხადებს მოსამართლე თეიმურაზ სიხარულიძე.
„ასოციაცია “მოსამართლეთა ერთობის” მიერ 2017 წლის 30 მაისს გამოქვეყნებული განცხადება ჩვენთან შეთანხმებული არ ყოფილა და იგი არ გამოხატავს ჩვენს აზრს, ამასთან, აღნიშნული არ წარმოადგენს პირველ შემთხვევას, რის გამოც ვტოვებთ ასოციაცია “მოსამართლეთა ერთობას“, _ აცხადებენ თბილისის სააპელაციო სასამართლოს მოსამართლეები: გოდერძი გიორგიშვილი, მარინა ხოლოაშვილი, მანუჩარ კაპანაძე, მანანა ჩოხელი.
შეგახსენებთ, რომ ცოტა ხნის წინ გავრცელებული ინფორმაციით, მოსამართლეთა ერთობა ასევე დატოვა თბილსიის საქალაქო სასამართლოს რვა მოსამართლემ: თამარ ჭუნიაშვილმა, ცისანა სირბილაძემ, შორენა გუნცაძემ, ლაშა ქოჩიაშვილმა, მაია შოშიაშვილმა, ასმათ კოხრეიძემ, შორენა ჯანხოთელმა და ანა ჩოგოვაძემ.
„გურია ნიუსთან“ საუბრისას ასოციაცია მოსამართლეთა ერთობაში აცხადებენ, რომ ზუსტად რამდენ მოსამართლეს აქვს ამ დროისთვის დაწერილი ორგანიზაციიდან გასვლის განცხადება, ბორდის შეკრებზე გახდება ცნობილი, რომელიც დღეს უნდა შედგეს.
გარდა ამისა, ორგანიზაციაში განმარტავენ, რომ განცხადება, რომელიც იუსტიციის უმაღლესი საბჭოს ქმედებებთან დაკავშირებით გავრცელდა, ბორდთან შეთანხმებული იყო, რომელიც ასევე მოსამართლეებისგან შედგება.
„გურია ნიუსის“ ინფორმაციით, ასაოციაცია „მოსამართლეთა ერთობაში“ 50-მდე მოსამართლეა გაწევრიანებული, აქედან 20-მდე მოსამართლემ ასოციაციის დატოვებასთან დაკავშირებით განცხადება უკვე დაწერა.
