ოზურგეთის მერიის სოციალური სამსახურის უფროსის, თამარ დუმბაძის და აუდიტის სამსახურის უფროსის კობა ხაბალაშვილის მიერ გაკეთებულ სკანდალურ განცხადებებზე, რომლის თანახმადაც ხაბალაშვილს და დუმბაძეს ოზურგეთის მერი დევნის, ავიწროებს და უკანონობის ჩადენას აიძულებს, შინაგან საქმეთა სამინისტრომ გამოძიება დაიწყო.
„მედიაში გავრცელებული ინფორმაციის საფუძველზე, გამოძიება დაწყებულია სისხლის სამართლის კოდექსის 150-ე მუხლით, რაც იძულებას გულისხმობს. აქტიურ რეჟიმში მიმდინარეობს საგამოძიებო მოქმედებები”, _ აღნიშნეს „გურია ნიუსთან“ საუბრისას შინაგან საქმეთა სამინისტროს პრესსამსახურში.
ამ გამოძიების პარალელურად კი ოზურგეთის მერის ბრძანებით მერიაში სპეციალური ჯგუფი შეიქმნა, რომელსაც კობა ხაბალაშვილის საქმიანობის შემოწმება დაევალა.
ჩვენი წყაროს თქმით, დღეს დილით, აუდიტის სამსახურის თანამშრომლებს დაურიგდათ ფურცლები, რომლებზეც ტელეკომპანია “იმედის” ეთერში გასული ინტერვიუა დაბეჭდილი. მისივე თქმით, აუდიტის სამსახურის თანამშრომლებმა ეს ინტერვიუ უნდა შეაფასონ და დაწერონ, რომ ხაბალაშვილის განცხადებები ტყუილია:
_ ყველას დაგვირიგეს ასეთი ფურცლები და ითხოვენ, რომ შეფასება წერილობით გავაკეთოთ. თუ არ დავწერთ, რომ ხაბალაშვილი იტყუება და ამ ინტერვიუს ცუდად ვაფასებთ, შესაძლოა, სამსახურიდან გაგვიშვან. აღარ ვიცით რა გავაკეთოთ, ძალიან რთულ მდგომარეობაში ვართ, _ აღნიშნა ჩვენთან საუბრისას აუდიტის სამსახურის ერთ-ერთმა თანამშრომელმა, რომელიც კონფიდენციალურობის დაცვას ითხოვს.
ჩვენ ამ თემაზე მერის კომენტარის მოპოვებას შევეცადეთ, თუმცა, ამჯერადაც უშედეგოდ _ შარაშენიძე ტრადიციას არ ღალატობს და სატელეფონო ზარებს არ პასუხობს.
ამავე თემაზე: დუმბაძის და ხაბალაშვილის განცხადებების საფუძველზე შსს-მ სისხლის სამართლის საქმე აღძრა (ექსკლუზივი)
საია: ოზურგეთის მერის მხრიდან, სავარაუდოდ, ადგილი აქვს თანამშრომელთა დევნას
ახალი სკანდალი ოზურგეთის მერიაში _ საპარლამენტო უმრავლესობის ლიდერი საქმის დროულ შესწავლას ითხოვს
„მეშინია მისი“ _ რა მისწერა ოზურგეთის მერიის სოციალური სამსახურის უფროსმა ომბუდსმენს
