საქართველოს მთავრობის გადაწყვეტილებით, საქართველოში, ოქტომბერში ღვინის დღეები ტარდება. გურიაში, ოზურგეთში, ღვინის ფესტივალი ცხრა ოქტომბერს გაიმართა.
გურული მეღვინეები სამივე მუნიციპალიტეტიდან, ოზურგეთის თეატრის გვერდით მდებარე სკვერში, საგანგებოდ მოწყობილ სივრცეში წარდგნენ და საკუთარი ხელით დაწურული ღვინო შესთავაზეს სტუმრებსა და მასპინძლებს.
ჩხავერის, ჯანის, საკმიელას, კლარჯულას, ტაკიძურას თუ სხვა გურული ჯიშის ყურძნისგან დაწურული ღვინით იწონებდნენ თავს გამრჯე, ვაზზე მართლაც, როგორც საკუთარ შვილზე შეყვარებული გურულები.
გურულ მეღვინეებს შორის, ზოგს ვაზთან ურთიერთობის ძველი ბიოგრაფია აქვს, ზოგმაც მოგვიანებით მიჰყო ხელი მამაპაპურ საამაყო საქმეს და კარგადაც გამოუვიდა.
გურამ ტყეშელიაძე, საოჯახო ბიზნეს “არმუჯს” (უწყლო ღვინო, სულხან საბა) ხელმძღვანელობს და როგორც გურული ჯიშის (ჩხავერი, საკმიელა, სხილათუბანი,) იმერული ცოლიკაურის თუ სხვა სახეობის ყურძნის ღვინოს აყენებს. მისი ოჯახი, ასევე, ხელნაკეთი ნივთებით იყო წარმოდგენილი _ ხალხური რეწვა კარგად ეხერხებათ ოჯახის წევრებს:
_ ძალიან ბევრი მიწა არ მაქვს. ოთხი ათას კვმ. ფართობზე მაქვს ვენახი გაშენებული. კიდევ ამდენზე ვაპირებ _ აწი უნდა დავაგეგმარო. ძირითადად, უძველესი გურული ჯიშის ვაზით ვარ დაინტერესებული. ძალიან კარგია და სასიხარულო, ჩვენი საუცხოო, სხვადასხვა გურული ჯიშის ვაზის პოპულარიზაციისთვის ასეთი ფესტივლების მოწყობა. მიხარია ნამდვილად, _ გვითხრა ტყეშელიაძემ.
წითელმთის მკვიდრმა ლიკა მეგრელაძემ, რომელიც არც ისე დიდი ხანია, დაბრუნდა მშობლიურ სოფელში, უკვე შეძლო საკუთარ გარემოში დაწურული ჩხავერის ჯიშის ღვინის წარდგენა. ის მრავალმხრივი მეურნეა და აქტიურად და ბევრს მუშაობს აგროტურისტული მიმართულებით.
სოფელ ქაქუთის (ჭანიეთის თემი) მკვიდრი სოსო ხინთიბიძე, უკვე ოცდაათ წელზე მეტია, ვაზის გურული ჯიშების _ საკმიელას, ჯანის, ტაკიძურას, ჩხავერის, ბათუმურას აღდგენაზე, ნერგების გამოყვანაზე და რეალიზაციაზე მუშაობს. ფესტივალზე მან ექვსი სახეობის ღვინო წარმოადგინა ხსენებული ჯიშებიდან და გვითხრა, რომ აქტიურად იღვწის გურული ჯიშების პოპულარიზაციისთვის. არის მრავალი ფესტივლის გამარჯვებული.
ღვინის დღეებს ახალგაზრდა ნოდარ ჩხარტიშვილი შეუერთდა. “ნოდოს ღვინო”_ ასე წარდგა ის ფესტივალზე.
ფესტივალზე, ასევე, საკუთარი ჩურჩხელებით წარუდგა გურულებს და ყველა სტუმარს ცნობილი “ჩურჩხელების ჯადოქარი” მზია შარაშენიძე.
ფესტივალს სტუმრობდნენ კახელი მეწარმეები _ ზემო მაჩხაანელმა ეკა მიქელაშვილმა საგანგებოდ მოწყობილ სამზადში, თონის ლავაშები მკვირცხლად ამოაკრა.
მიუხედავად იმისა, რომ მრავალი მეწარმე მონაწილეობდა ფესტივალში, ბევრი გურული მეღვინე მაინც დარჩა “კადრს მიღმა”. თუ რატომ არ შეატყობინეს მათ, მონაწილეობა მიეღოთ ფესტივალში, “გურია ნიუსს” ორგანიზატორებმა უთხრეს, რომ ასეთ დროს თავადაც უნდა იაქტიურონ მეწარმეებმა.
მშრომელი ადამიანები, რომლებიც უმეტესად საკუთარი ვაზის ძირში ფუსფუსებენ, კარგი იქნება, ხელმძღვანელმა პირებმა, მუნიციპალიტეტებსა თუ სოფლებში (მომავალში მაინც) მოახერხონ და ჩართონ ფესტივალში. პოპულარიზაციაც ყველაზე მეტად ასეთი ნაბიჯებით მიიღწევა.
ღვინის ფესტივალზე, ასევე, წარდგნენ სტუმრები კახეთიდან.
ფესტივალზე მოსულ პატარებს ანიმატორები ართობდნენ.
_ მგონი, ამინდი იცვლება, მაგრამ ჩვენ არ გვეშინია, გვინდა სიმღერა, გართობა, ცეკვა და თამაში, _ ისმოდა სივრცეში მუსიკალური ტექნიკით გაძლიერებული ხმა.
თუმცა, ამინდის ღვთაება ელიამ, როგორც გურულებმა იხუმრეს, არც პატარები დაინდო, არც ოზურგეთის მერის თამადობით საწნახელში ჩამდგარი, ხელგადაჭდობილი შემადგენლობა და “შვიდკაცას” მიერ , “აგუნას” გადაძახილისთანავე, ყურძნის წვენის ჩადგომამდე, წვიმა მიუშვა საწნახელში.
“ამინდის პროგნოზისთვის არავის მუუსმენია ამ კვირაში, ამ კახელებს რომ თონე ეევსოთ წყლით?! მევიჯაყეთ… ე, ძამა, ღვინის პირველ ფესტივალზე “პირველი მერცხალის” ფინალი გვაქვს”, _ ხითხითებდნენ წვიმისგან გაწუწული გურულები.
იქვე კი, კახელი ქალბატონი ბრაზობდა: “რა ვქნა? აივსო წყლით ყველაფერი… თონეში წყალია და ცომში… არ უნდა გადაეხურათ თავიდანვე? სანამ ახლა ქოლგა მოიტანეს, კი აივსო წყლით ყველაფერი…”
მოკლედ, ოზურგეთული ღვინის ფესტივლის საზეიმო დასაწყისი, მართლაც დაემსგავსა “პირველი მერცხალის” ფინალს…
ესაა, “აბა, ულას” შემოძახება არავის მოსურვებია, რადგან დღეს უცხოა იასონასა და მისი გუნდის მიამიტობა თუ დიდსულოვნება _ ყველანი თავქუდმოგლეჯნი გარბოდნენ სახლებისკენ!
ავტორი
