უმეტესობას მიაჩნია, რომ სმარტფონის ბატარეა 100%-მდე უნდა დამუხტოს, მაგრამ ეს არასწორია. საქმე ის არის, რომ სმარტფონებში გამოყენებული ლითიუმიონური აკუმულატორი გამუდმებულ „სტრესზე“ „სიცოცხლისუნარიანობის“ დაქვეითებით რეაგირებს. სპეციალისტები გვირჩევენ, რომ სმარტფონის ელემენტი 30%-იდან 80%-მდე იყოს დამუხტული, თუ გვინდა, რომ ტელეფონი მალე არ დაჯდეს. გაითვალისწინეთ ისიც, რომ არც სმარტფონის ხშირ-ხშირი და უმიზნო დამუხტვა ვარგა.
ძილის წინ ნუ შეაერთებთ ტელეფონს დასატენად, რადგან დაგეძინებათ და სმარტფონი მთელი ღამე დარჩება დენის წყაროში შეერთებული. ბოლომდე დამუხტული ტელეფონის დენის წყაროში დატოვება აკუმულატორს აზიანებს. საქმე ისაა, რომ ის მაინც იღებს ელექტრობას მცირე იმპულსებით, რათა მუხტის 100%-იანი მაჩვენებელი შეინარჩუნოს, ეს კი მისთვის „სტრესული“ სიტუაციაა – აკუმულატორი ზიანდება, ამიტომ როცა ტელეფონი დაიტენება, დენის წყაროდან გამორთეთ.
გავრცელებული შეცდომაა ტელეფონის აკუმულატორის ბოლომდე დაცლა. ასეთი აუცილებლობა ადრე ნამდვილად იყო, როდესაც ტელეფონებს ნიკელ-კადმიუმის ბატარეები ჰქონდა, რომლებიც უფრო მეტ მუხტს იტევდნენ, თუ ბოლომდე დაცლის შემდეგ დატენიდით. თანამედროვე ლითიუმ-იონური აკუმულატორების შემთხვევაში ასეთი აუცილებლობა არ არსებობს, უფრო მეტიც, ექსპერტები არ გვირჩევენ თანამედროვე მოწყობილობების ბატარეის ბოლომდე დაცლას. როდესაც ბატარეა 30%-მდე ჩამოვა, უმჯობესია ტელეფონი დენის წყაროში ჩართოთ დასატენად. იდეალური სიტუაციაა, თუ ელემენტის მუხტი მუდმივად 30%-იდან 80%-მდე იქნება, ხოლო თუ 30%-ზე დაბლა ჩამოვა, ნუ დაელოდებით ბოლომდე დაცლას და დამუხტეთ.
სმარტფონის აკუმულატორზე მაღალი ტემპერატურაც ცუდად მოქმედებს, მისთვის ოპტიმალური ტემპერატურა 1-იდან 35 გრადუსამდეა, ამიტომ ეცადეთ ტელეფონი მეტისმეტად არ გახურდეს.
უმეტესობას თავისი სმარტფონი სპეციალურ დამცავ ბუდეში აქვს მოთავსებული, თუმცა დამუხტვის დროს უმჯობესია ბუდიდან ამოიღოთ, რადგან ბუდეში მოთავსებული ტელეფონი დატენისას უფრო მეტად ხურდება.
ავტორი
