ბოლო დროს, საკმაოდ გახშირდა პარტიიდან პარტიაში წევრების გადასვლა-გადმოსვლა. ეს პროცესი ყველაზე მეტად “ქართულ ოცნებას“ შეეხო, განსაკუთრებით, მას შემდეგ, რაც პოლიტიკურ ასპარეზზე “ქართული ოცნების“ ყოფილი მაღალჩინოსნები _ გიორგი გახარია და იოსებ გოგაშვილი გამოჩნდნენ.
“ქართული ოცნების“ გურიის რეგიონული ორგანიზაციის ყოფილი ხელმძღვანელი გიორგი ხავთასი, რომელიც იოსებ გოგაშვილს და “სახალხო პარტიას“ შეუერთდა, ამბობს, რომ ის საკადრო პოლიტიკა, რომელსაც ახორციელებს “ქართული ოცნების“ ხელმძღვანელობა, მისთვის და მისი მეგობრებისთვის მიუღებელი იყო.
“დღეს, ამ განცხადებამდე, ჩვენ იმ პარტიის მხარდამჭერთა გუნდს წარმოვადგენდით, რომელსაც ქვეყნის მართვის პასუხისმგებლობა აქვს ნაკისრი.
ჩვენი მიზანი იყო და კვლავ რჩება თავისუფალი, დამოუკიდებელი, თანასწორუფლებიანი მოქალაქეების სახელმწიფოს შენება. მაგრამ, სამწუხაროდ, დროსთან ერთად მმართველი პარტია სულ უფრო დაშორდა დასახულ გეგმას.
ახალი იდეების და დემოკრატიული განვითარების ხედვის მიუღებლობამ, მიმდინარე პროცესებისგან ჩვენი დისტანცირება გამოიწვია.
თამამი და სამართლიანი გადაწყვეტილებების მიღება, რაზედაც ახალგაზრდობაა ორიენტირებული, აღარაა “ქართული ოცნების“ ახალი მმართველი გუნდის პრიორიტეტი.
პროგრესის მოლოდინი რეგრესმა ჩაანაცვლა. ახალგაზრდებისთვის საოცნებო საქართველოზე დამყარებული იდეოლოგია, რომელმაც ერთ დროს ყველა გაგვაერთიანა, დღეს უბრალოდ აღარ არსებობს.
ახალგაზრდების დიდი ნაწილი იდეალისტია, მმართველი პარტია კი დღეს იდეალებისგან სრულადაა დაცლილი.
შესაბამისად, ჩვენ ვტოვებთ “ქართული ოცნების“ მხარდამჭერთა გუნდს. ვუერთდებით სოსო გოგაშვილს და “სახალხო პარტიას“, სადაც სწორედ იმ ადამიანთა გუნდი ყალიბდება ვისთან ერთადაც წლების განმავლობაში ვიყავით, ვიზიარებდით მათ ხედვებსა და იდეებს“, _ ეს ამონარიდია იმ განცხადებიდან, რომელიც “სახალხო პარტიის“ ახალმა წევრებმა გაავრცელეს.
გიორგი ხავთასის ინფორმაციით, ის იყო “ქართული ოცნების“ გურიის რეგიონული ხელმძღვანელი გასული საპარლამენტო არჩევნების დროს და სიის 94-ე ნომერი, მანამდე კი მუშაობდა “ქართული ოცნების“ ცენტრალურ ოფისში სხვადასხვა პოზიციებზე.
“მარტამდე ვიყავი პარტიის რეგიონულ სამსახურში, მერე კი უბრალოდ მხარდამჭერი. დღემდე ვიყავი პარტიის წევრი ოფიციალურად”, _ ამბობს ხავთასი.
“ქართული ოცნების“ გურიის რეგიონული კოორდინატორი გიორგი ღურჯუმელიძე ამბობს, რომ “პარტია ცოცხალი ორგანიზმია და თუ ხუთი მიდის, ოცი მოდის“:
“ზოგი მიდის და ზოგიც გვემატება, თუმცა, ისე არ ხდება, როგორც ინფორმაციები ვრცელდება, თითქოს, “ქართულ ოცნებას“ წევრები მასობრივად ტოვებენ. ხუთი ადამიანი წავიდა, ოცი მოვიდა. ეს ჩვეულებრივი პროცესია და შედეგს ყველა დაინახავს 2 ოქტომბერს“, _ გვითხრა გიორგი ღურჯუმელიძემ.
“ერთიანი ნაციონალური მოძრაობის“ წევრი ბესო ქათამაძე, სხვა პარტიებში “ქართული ოცნების“ წევრების გადასვლას უფრო ძალთა გადანაწილებად მიიჩნევს და მასში “ბიძინა ივანიშვილის წინასაარჩევნო ტრიუკს“ ხედავს. მისი თქმით, “ეს პროცესები მართულია, ბიძინა ივანიშვილის მიერაა წამოწყებული და ამას ხალხი ძალიან კარგად ხედავს“:
“ძალიან მარტივად არის საქმე _ “ქართული ოცნება“ კლანური პარტიაა და ახლა მიდის საარჩევნო გადაადგილებები. მოცემულობაში კარგად ჩანს, რომ მძიმე მდგომარეობაში იმყოფება მმართველი პარტია და ახლა “ქოცების“ განშტოებასთან გვაქვს საქმე.
მჯერა, ქართველი ხალხი მიიღებს გონიერ გადაწყვეტილებას და ამას ყველანი მალე დავინახავთ.
რეალურად, ღარიბაშვილის და კობახიძის “ქართული ოცნება“ არის დაშლილი და ასეთი ქმედებებით, ბიძინა ივანიშვილი ახალ ტრიუკს უტარებს ამომრჩეველს“, _ გვითხრა ბესო ქათამაძემ.
[sexy_author_bio]
