ლანჩხუთის მუნიციპალიტეტის სოფელ ქვიანში მცხოვრებ 94 წლის მარტოხელა მოხუცს, დიანოსე წულაძეს, რომელიც სოციალურად დაუცველთა ერთიან ბაზაში 2006 წლიდან რეგისტრირდებოდა, და შესაბამისად შემწეობასაც იღებდა, დახმარება მოუხსნეს.
„რაც ეს სოციალური შემწეობა არსებობს, იმ დღიდან მოყოლებული ვიღებდი დახმარებას, აქამდე არავის მოუხსნია და მეც, გარდა ასაკისა, არაფერი შემმატებია ამ წლების განმავლობაში. ახლა რა მოხდა, რის გამო მომემატა ქულა და დახმარება მომიხსნეს წარმოდგენა არ მაქვს. სოფელში ყველა მიცნობს და იცის ჩემი მდგომარეობა. პატარა ხნის არ ვარ, მალე 94 წელს გავათავებ და არავინ იცის, ხვალ რა იქნება, მაგრამ დღეს რომ ასე მექცევიან, ძალიან მტკივა გული“, _ ამბობს სოციალური შემწეობის გარეშე დარჩენილი მარტოხელა მოხუცი.
მისი თქმით, მასთან რამდენიმე ხნის წინ ახალგაზრდა მამაკაცი იყო მისული სოციალური სააგენტოდან, რომელმაც ხელი მისთვის გაურკვეველ საბუთებზე მოაწერინა.
„ ჩემთვის უცნობი ახალგაზრდა კაცი იყო მოსული, ეზოში არც შემოსულა, ისე მომაწერინა რაღაც ქაღალდებზე ხელი. მობრძანდით-მეთქი, შემოვიპატიჟე სახლში, მაგრამ უარი თქვა. გამეცნო, რომ სოციალური სააგენტოდან იყო და რაღაც ფურცლებზე უნდა მომეწერა ხელი.
სათვალე არ მჭირდება ისე ვკითხულობ. მანახე ერთი, რას უნდა მოვაწერო ხელი-მეთქი. ცარიელი ფურცლები იყო, შენ ხელი მომიწერე უბრალოდ, მეტი არაფერია საჭიროო. ასეც მოვიქეცი, მოვაწერე ხელი, რას ვიფიქრებდი, რომ მოტყუებული დავრჩებოდი ბოლოს.
გავიდა დღეები და აღმოჩნდა, რომ შემწეობა, რომელსაც ათ წელზე მეტია ვიღებდი, მომიხსნეს. თურმე, სოციალურ აგენტს შევუმოწმებივარ და მაღალი ქულები მიმიღია. ეს არის სამართალი?! გამაგებინონ მაინც, ასაკის გარდა რა მომემატა ამ წლების განმავლობაში?!“ _ ამბობს დიანოსე წულაძე, რომელიც რამდენიმე ათეული წელია, რაც მარტო ცხოვრობს.
„რაც მეუღლე გარდამეცვალა, იმის შემდეგ გამოვეყავი შვილს და ცალკე დავსახლდი. თითქმის უკვე 40 წელია გასული, რაც მარტო ვცხოვრობ, შვილები კი მყავს, მაგრამ ისინი ცალკე არიან. მარტოხელა მოხუცს სახლში ხეირიანი არაფერი მაქვს. მთელი ჩემი სიმდიდრე ერთი საწოლი, ერთი ძელსკამი და ერთიც მაგიდაა. მეტს ვერაფერს ნახავთ ჩემს სახლში. ვისაც არ სჯერა, მოვიდეს და საკუთარი თვალით ნახოს.
სოციალურ სააგენტოში რომ მივედი ამბის გასაგებად, მითხრეს-საბუთები მოიტანე, ექიმთან ვიზიტისას ფულის გადახდა არ მოგიწევს, ამას გაგიკეთებთო“.
სოციალური მომსახურების სააგენტოს საზოგადოებასთან ურთიერთობის სამსახურის პასუხით ირკვევა, რომ მიმდინარე წლის აპრილში დიანოსე წულაძის მიერ მიღებული ქულა ოდნავ სცდება საარსებო შემწეობის მისაღებად საჭირო ზედა ზღვარს.
„დიანოსე წულაძე სოციალურად დაუცველთა ერთიან ბაზაში 2006 წლიდან იყო რეგისტრირებული. ბოლო გადამოწმებისას, 2017 წლის აპრილში მიეს მიერ მიღებული ქულა ოდნავ ცდება საარსებო შემწეობის მისაღებად საჭირო ზედა ზღვარს. წულაძეს დეკლარაციაში უფიქსირდება მცირე საცხოვრებელი ფართი, მიწის ნაკვეთი, მცირედი დანახარჯი კომუნალური გადასახადებისთვის.
მოხუცი იღებს ასაკობრივ პენსიას, რაიმე ქრონიკული დაავადება ან შშმპ-ის სტატუსი არ აქვს, სარგებლობს საყოველთაო ჯანდაცვის მიზნობრივი პაკეტით. ასევე, ჰყავს სამი გარეთ მცხოვრები შვილი, რომლებიც მის პოტენციურ დამხმარეებად ითვლებიან“, _ გვპასუხობენ სოციალური სააგენტოს საზოგადოებასთან ურთიერთობის სამსახურში.
დიანოსე წულაძის საკითხთან დაკავშირებით სოციალური სააგენტოს ლანჩხუთის განყოფილებაში გვაპუხობენ, რომ თუ იქნება წარმოდგენილი ოჯახის მიერ ჯანმრთელობის მდგომარეობის შესახებ ფორმა #100, შეიძლება კორექტირების შეტანა.
