კოლეგის თვითმკვლელობამდე მიყვანის მცდელობისთვის ბრალდებული მასწავლებლები სასამართლომ უდანაშაულოდ ცნო, თუმცა პროკურატურა საქმეს სააპელაციო სასამართლოში ასაჩივრებს.
სენაკის ერთ-ერთი საჯარო სკოლის მოქმედი დირექტორი, წინამორბედის გათავისუფლების მიზეზებზე არ საუბრობს. საგანმანათლებლო დაწესებულებაში არც იმას აკონკრეტებენ, თუ როგორ დააშანტაჟა მასწავლებლების ერთმა ჯგუფმა საკუთარი კოლეგა. გამოძიების ინფორმაციით, ბრალდებულებმა პირადი ცხოვრების ამსახველი კადრების გავრცელების მუქარით ახალგაზრდა პედაგოგი აიძულეს სკოლიდან წასულიყო. ქალმა მუქარას ვერ გაუძლო და თვითმკვლელობაც სცადა. საქმეზე ბრალდებული მასწავლებლები ზუგდიდის რაიონულმა სასამართლომ უდანაშაულოდ ცნო. ჯერ უცნობია დაბრუნდებიან თუ არა ისინი სკოლაში.
თვითმკვლელობამდე მიყვანის მცდელობისა და სამსახურიდან იძულებით გათავისუფლების ეპიზოდზე, ზუგდიდის რაიონული სასამართლოს გამმართლებელ განაჩენს პროკურატურა სააპელაციო სასამართლოში ასაჩივრებს. ორი ბრალდებული პედაგოგი ახლა მეორე ინსტანციის განაჩენს ელოდება. ფაქტს პროკურატურა დღეს საგანგებო განცხადებით გამოეხმაურა.
შანტაჟისა და მუქარის მსხვერპლი მასწავლებელი საგანმანათლებლო რესურსცენტრმა სამსახურში აღადგინა. ბრალდებულებს კი მოსწავლეებთან ურთიერთობა აკრძალული აქვთ. არცერთი მათგანი დანაშაულს ამ დრომდე არ აღიარებს.
თვითმკვლელობამდე მიყვანის მცდელობაში ბრალდებული მასწავლებლების გარდა, სასამართლოში ცალკე წარმოებად მიმდინარეობს საქმე კიდევ ორი პედაგოგის წინააღმდეგ. მათ გამოძიება პირადი ცხოვრების საიდუმლოს ხელყოფას ედავება.
