ცოტა ხნის წინ, ამერიკელმა ფსიქოლოგებმა დაამტკიცეს, რომ ხატვა თითოეული ჩვენგანისთვის სასარგებლოა, მიუხედავად იმისა, შესაბამისი უნარი გვაქვს თუ არა.
ბევრმა ხატვა გატაცებად მხოლოდ იმიტომ არ აქცია, რომ საამისოდ საკუთარ თავში შესაბამისი ნიჭი ვერ დაინახა.
მაგრამ, როგორც აღმოჩნდა, ხატვაზე უარის თქმით, ადამიანი ბევრს კარგავს. შესაძლებელია აღიარება ვერ მოიპოვოს და საკუთარი ნამუშევრები არავის აჩვენოს, მაგრამ აქ მთავარი არა შედეგი, არამედ თავად პროცესია. ეს კი, საცდელად ნამდვილად ღირს.
როდესაც ხატავთ, განსაკუთრებით საყვარელი მელოდიის თანხლებით, დრო ძალიან სწრაფად გადის, კონცენტრაცია მთლიანად პროცესისკენ არის მიმართული, რაც საუკეთესო საშუალებაა განტვირთვისთვის.
კვლევის ავტორებმა ივარაუდეს, რომ შემოქმედებითი საქმიანობა მნიშვნელოვნად ამცირებს სტრესთან დაკავშირებულ ჰორმონის დონეს და ექსპერიმენტი ჩაატარეს.
მასში მონაწილე ადამიანებს მარკერები, წებო, ქაღალდი და სხვა სახის მასალები დაურიგეს – ყველაფერი, რაც კოლაჟების შესაქმნელად იყო საჭირო და უთხრეს, რომ 45 წუთში ნებისმიერი რაღაცის გაკეთება შეეძლო.
კვლევამ აჩვენა, ექსპერიმენტში მონაწილეების 75 პროცენტს მნიშვნელოვნად შეუმცირდა კორტიზოლის (სტრესის ჰორმონი) დონე.
თუ რთული დღე გქონდათ რამე დახატეთ. ამასთან, საჭირო არ არის ხატვის შესწავლის კურსებზე სიარული. არც იმას აქვს მნიშვნელობა რა გამოგივათ. ნებისმიერ შემთხვევაში, დაძაბულობა მოგეხსნებათ და თავს უკეთესად იგრძნობთ.
