ლანჩხუთის საკრებულოს მორიგ სხდომაზე, რომელსაც ადგილობრივი წარმომადგენლობითი ორგანოს პირველი პირი ბესიკ ტაბიძე უძღვებოდა, ერთ-ერთ საკითხად მიმდინარე წლის ადგილობრივ მთავარ საფინანსო დოკუმენტში ცვლილებების გახორციელებაზე იმსჯელეს და დაამტკიცეს კიდეც. სხდომას მუნიციპალიტეტის მერი ალექსანდრე სარიშვილიც ესწრებოდა და შიგადაშიგ დეპუტატთა მხრიდან გაჟღერებულ შეკითხვებს პასუხობდა.
მერიის საფინანსო სამსახურის მიერ მომზადებული დოკუმენტიდან, რომელიც საკრებულოს წევრებს მერიის საფინანსო სამსახურის უფროსმა, როლანდ ლაშხიამ გააცნო, ირკვევა, რომ “საქართველოს რეგიონებში გასახორციელებელი პროექტების ფონდიდან” ლანჩხუთის მუნიციპალიტეტს დამატებით ორი მილიონ 50 ათასი ლარი გამოეყო მუნიციპალიტეტის მასშტაბით ინფრასტრუქტურული პროექტების გახორციელების მიზნით.
ლაშხიას განმარტებით, აღნიშნული თანხიდან ერთი მილიონ 300 ათასი ლარი აკეთის ადმინისტრაციულ ერთეულში სოფელ შუხუთიდან სოფელ გაგურის ცენტრამდე გზის რეაბილიტაციას მოხმარდება.
ლაშხიასვე მოხსენებით, რეგიონული ფონდიდან გამოყოფილი თანხიდან ქალაქში, გორგასლის ქუჩაზე მდებარე მრავალბინიანი საცხოვრებელი კორპუსის საძირკვლის გამაგრებაზე 254 ათასი ლარი მიიმართება.
რეგიონული ფონდიდან გამოყოფილი დარჩენილი თანხით კი შიდა სასოფლო გზების რეაბილიტაცია დაგეგმილი ნიგოითის, გვიმბალაურის, ნინოშვილის, მამათის, აცანის, შუხუთის, ჯურუყვეთის, ნიგვზიანის, ჩოჩხათის, ლესის და სუფსის ადმინისტრაციულ ერთეულებში, რომლის პროექტის სრული ღირებულება 735 465 ლარს შეადგენს. აქედან 496 ათასი ლარი რეგფონდისაა, ხოლო 239 465 ლარი ადგილობრივი ბიუჯეტის თანადაფინანსებაა.
ირკვევა, რომ მიმდინარე წელს სუფსის სამუსიკო სკოლის სახურავის რეაბილიტაციაა გათვალისწინებული, რისთვისაც 28 730 ლარის ღირებულების სამუშაოები უნდა შესრულდეს, აქედან ცენტრალური ბიუჯეტის წილი 13 650 ლარია, ხოლო ადგილობრივი ბიუჯეტის _15 080 ლარი.
როლანდ ლაშხიას თქმით, სტიქიის სალიკვიდაციო ღონისძიებებისთვის ლანჩხუთის მუნიციპალიტეტს დამატებით 100 ათასი ლარი გამოეყო, რომელიც მიიმართება სარწყავი არხებისა და ნაპირსამაგრი ნაგებობების რეაბილიტაციისთვის.
ბიუჯეტში დაგეგმილ და სხვა ცვლილებებთან დაკავშირებით საკრებულოს სხდომაზე საფინანსო სამსახურის უფროსმა საკმაოდ ვრცელი მოხსენება გააკეთა, რის შემდეგაც ჯერი საკრებულოს წევრებმა გასახორციელებელ ცვლილებებთან დაკავშირებით შენიშვნებიც გააჟღერეს.
მმართველი გუნდის წევრის, დარეჯან ბურჭულაძის თქმით, იქნებ საფინანსო სამსახურმა წარმოდგენილ ბიუჯეტში ცვლილების გახორციელება შეძლოს და სოფელ კოკათში შიდა გზის მოსაწესრიგებლადაც გამოყოს თანხა .
“დაახლოებით, 30 ათასი ლარი იქნება საჭირო. მესმის, ბატონი მერიც კოკათიდანაა და ყოველთვის ერიდება თავის სოფელზე, მაგრამ ვისჯებოდეთ იმის გამო, რომ მერი ჩვენი თანასოფლელია, ეს არ გამოვა. ბატონო როლანდ, როგორ იქნება საქმე? შეიტანეთ ბიუჯეტში ცვლილება, გამოყავით კოკათისთვისაც თანხა, არ უნდა იყოს ეს ძნელი საქმე”, _ მიმართა ბურჭულაძემ როლანდ ლაშხიას, რასაც პასუხი მიმართვის უშუალო ადრესატისგან და არც სხდომაზე დამსწრე მუნიციპალიტეტის პირველი პირისგან არ მოჰყოლია, რომელიც თავადაც სოფელ კოკათის მკვიდრია.
ენმ-ის წარმომადგენელმა ირმა მგელაძემ კი თავის სიტყვაში აქცენტი აკეთის სოფელ ჭანჭათზე გააკეთა. დეპუტატის თქმით, ეს სოფელი ყოველ ჯერზე უგულებელყოფილია და არასდროს არსად არ ფიგურირებს:
“არასოდეს, არც ერთ პროექტი, არც ერთ პროგრამაში ჭანჭათი არაა. რატომ?! ეს სოფელი ჩვენი მუნიციპალიტეტის არაა?! იქ არაფერი არ არსებობს. ჭანჭათი “მე-13 რაიონია?” _ იკითხა “ნაციონალური მოძრაობის” წარმომადგენელმა ლანჩხუთის საკრებულოში.
მგელაძის პოზიციას, რომ ჭანჭათი პროექტებს მიღმა დარჩენილი, არ ეთანხმება მუნიციპალიტეტის მერი ალექსანდრე სარიშვილი. მისი თქმით, სოფელში ძირითადი პრობლემა შიდა გზებია, თუმცა, არაერთი უკვე მოწესრიგდა:
“ჭანჭათში ცენტრალურ გზაზე მეტად, შიდა გზების პრობლემაა. მოხრეშვით სამუშაოებს აზრი არ აქვს და რახან ამ ჯერზე ბეტონის გზის საფარის გაკეთების ფინანსური საშუალება არაა, ამიტომ პროექტები გაჩერებულია. გაკეთებით კი არაერთი ინფრასტრუქტურული პროექტი გაკეთდა ჭანჭათში, გასაკეთებელიც არის, განსაკუთრებით ორ უბანშია მძიმე მდგომარეობა”, _ თქვა მუნიციპალიტეტის პირველმა პირმა.
მისივე ინფორმაციით, სამომავლოდ ბაკურში საყანე ფართობებამდე მისასვლელი გზის მოწესრიგებაცაა გათვალისწინებული.
ნიგოითის თემის მაჟორიტარის, ზაზა წულაძის თქმით კი, შიდა გზებთან დაკავშირებით მძიმე მდგომარეობაა სოფელ ჭყონაგორაში ორი მიმართულებით, ასევე, ჩოლობარგში და სოფელ ჯაპანაში, ე.წ. ბერიძეების უბანში, რაც დროულ რეაგირებას საჭიროებს.
ავტორი
