„არსად სამართალი, ყველგან პოლიცია“, სამწუხაროდ, მართლაც ასეთი ვითარებაა დღეს ქვეყანაში“, -თქვა ბრიფინგზე ლანჩხუთის საკრებულოში მოქმედი ოპოზიციური ფრაქციის „ლანჩხუთი საქართველოსთვის“ თავმჯდომარემ, მაკა მშიდობაძემ, რომელიც წლების განმავლობაში თავადაც სამართალდამცავი უწყების თანამშრომელი იყო.
საქმე ისაა, რომ 2025 წლის საკრებულოს პირველი სხდომის დასაწყისში ფრაქციამ განცხადება გააკეთა, რომ ისინი სოლიდარობას უცხადებენ პატიმრობაში მყოფ ჟურნალისტს, მზია ამაღლობელს და მიმდინარე მოვლენებისას დაკავებულ ყველა უკანონო პატიმარს. „ჩვენი სოლიდარობა მზია ამაღლობელს და რეჟიმის ყველა ტყვეს და სანამ თუნდაც ერთი ძალოვანი არ იქნება დასჯილი უკანონო ქმედებისთვის, მანამ ოპოზიცია არ აპირებს დაესწროს საკრებლოს სხდომებს“, -განცხადება გააკეთეს და პროტესტის ნიშნად სხომა დატოვეს საკრებულოს ოპოზიციონერმა წევრებმა.
სწორედ მათ ამ პოზიციას მოჰყვა „ოცნების“ წევრ დეპუტატთა უკმაყოფილება და ხმამარალი შეძახილები: „დავალება აქვთ ასეთი“, „ყურადღებას ნუ მიაქცევთ“, „არასახელმწიფოებრივად იქცევიან“. მმართველი პარტიის დეპუტატთა საქციელმა კი ოპოზიციის წარმომადგენელთა აღშფოთება გამოიწვია და ბრიფინგი გამართეს.
„ოცნების“ წევრთა შეფასებით, მზია ამაღლობელი თითქოსდა კრიმინალია და ჩვენ კრიმინალებს ვესარჩლებით. მეტიც, მე ყოფილი პოლიციელი, თურმე კრიმინალებს მფარველობ. მათ ვეტყვი, რომ ჩემი ადგილი არის იქ, სადაც სიმართლეა.
„არსად სამართალი, ყველგან პოლიცია“ , სამწუხაროდ, ასეთი მართლაც ასეთი ვითარებაა დღეს ჩვენს ქვეყანაში. ჩვენი საკრებულოს წევრებს უკვე გამოტანილი რომ აქვთ გამამტყუნებელი განაჩენი, დაადგინა კი ჯერ სასამართლომ ვინმეს ბრალეულობა?! ეს ხომ უდანასაულობის პრეზუმციის დარღვევაა და ეს მათ კარგად უნდა ესმოდეთ. ჟურნალისტი მზია ამაღლობელი რეჟიმის პატიმარია და მას ისეთი არაფერი ჩაუდენია, წინასწარ პატიმრობაში იყოს. თურმე მე არასამართლიანად ვიქცევი და გახარიას დავალებით ვსაუბრობ.
სანამ გახარია რამეს დამავალებს, მანამდე ამ პარტიაში აღარ ვიქნები. ყოველთვის სიმართლისთვის ვიბრძოდი და სულ ასე იქნება“, – თქვა მშვიდობაძემ.
ფრაქციის თავმჯდომარის შესავალი სიტყვის შემდეგ ბრიფინგის მართვის სადავეები გახარიას გუნდის კიდევ ერთმა წევრმა ჯუმბერ ბლაგიზემ იგდო ხელთ და საკმაოდ ვრცლადაც ისაუბრა სხვადასხვა, მნიშვნელოვან თუ არამნიშვნელოვან, თემაზე.
„მინდა ვკითხო ჩვენს კოლეგებს მმართველი გუნდიდან, ჟურნალისტ გურამ როგავას თავ-პირი რომ დაუმტვრიეს, დაისაჯა ვინმე? სილის გაწვნაა სისხლის სამართლის დანაშაული და ადამიანები რომ დაასისხლიან ეს ის არაფერი?! გასაგებია, ჩვენი პროტესტი არ მოსწონთ, მაგრამ მათი ბრალდებები უკვე კომიკურ ხასიათს იღებს. მე ის ადამიანი ვარ, ორჯერ დამოუკიდებლად რომ მოვიგე არჩევნები, 2008-ში „ნაციონალების“ დროს და 2015-ში „ოცნების“ ხელისუფლებაში ყოფნისას. ყოველთვის ხალხისთვის ვიბრძოდი და ამიტომაც დამიჭირეს მხარი.
ყველა ხედავს, ეს ერთი მანქანა მყავს რამდენი წელია და ჩვენმა კოლეგებმა არათუ გამოიცვალეს, ბევრს კი ორ-ორიც ჰყავს. ყველასთვის კარგად ნაცნობი თემაა, თუ როგორ არიან საკრებულოს რიგი წევრები ტენდერებში. მე არავის ჯიბეში არ ვიხედები, მაგრამ ჩვენს სადეპუტატო უფლებამოსილების თანხებზე რომ საუბრობენ, იცით, რამდენია მაგალითად მერის ხელფასი? 6 ათასზე მეტი იყო და კიდევ 10% დაემატა, პარლამენტარებს კი ხედავთ 7 ათასები დაუმატეს და ამ დროს პენსიონერს კი მხოლოდ 35 ლარი! რაღაც თანაფარდობა ხომ უნდა იყოს? ან რა უბედურებაა, ლანჩხუთის მერიაა თუ მანქანების რაღაც ის… უკვე მერამდენე მანქანა უნდა დაიმტვრეს, აგერ გუბერნიის ნაჩუქარი მანქანაც დამტვრეულია. თუ საჭიროებაა, თვითმფრინავი იყიდონ, მაგრამ მოფრთხილება ხომ უნდა?“- იკითხა ბლაგიძემ.
ფრაქციის სახელით, „ძლიერი საქართველოს“ ლანჩხუთის ორგანიზაციის ხელმძღვანელმა, გოჩა ჯანაშიამაც სოლიდარობა გამოუცხადა მზია ამაღლობელს. „კარგად ვხედავთ, რა მდგომარეობაა ქვეყანაში. ჟურნალისტებსაც იჭერენ უკვე და ბუნებრივია მე, როგორც მედიის წიაღიდან წამოსული ადამიანი, სოლიდარობას ვუცხადებ მზია ამაღლობელს, რომელსაც ქვეყნის განვითარებისთვის ბევრი საქმე უკეთებია, ასლან აბაშიძის რეჟიმიდან დაწყებული, წინა ხელისუფლებას ოპონირებას საკუთარი პროფესიონალიზმით უწევდა და ვინ იფიქრებდა ოცნების რეჟიმის მსხვერპლი გახდებოდა.
ეს ადამიანი პატიმრებას ნამდვილად არ იმსახურებს. მითუმეტეს იმ ფონზე, როცა სამართალდამცავებმა უამრავი გადაცდომა ჩაიდინეს, მარტო როგავასა და ტელეკომპანია „პირველის“ ჟურნალისტსა და ოპერატორზე თავდასხმები რად ღირს, რომელიც ჯერაც გამოუძიებელია. ისევე როგორც ჩვენი ახალგაზრდების სასტიკი ცემა, გაძარცვა და სახეში ჩაფურთხება, რაც წარმოუდგენლად ამაზრზენი დანაშაულებია, ისევე როგორც ქუჩაში ცემა-ტყეპა, ოპონენტებზე ნადირობა, რაც ნიშნავს, რომ ქვეყანა უფსკრულისკენ მიექანება და ვითარებას მხოლოდ ვადამდელი არჩევნები განმუხტავს“. ჯანაშიამ ასევე საკრებულოში განვითარებულ მოვლენებზეც გააკეთა აქცენტი. „ბუნებრივია ასეთ ვითარებაში ბოიკოტის რეჟიმს ვაგრძელებთ, მითუმეტეს, რომ ისედაც ძალიან ბევრი პრობლემა დაგროვდა. ფაქტობრივად მუნიციპალიტეტი დახურულ ზონად იქცა და საკრებულოს წევრებსაც გვიჭირს საჯარო ინფორმაციების მიღება. აი, მოვითხოვეთ ინფორმაცია შიდა აუდიტის მიერ 2023 წელში გაწეული მუშაობის ანგარიშის შესახებ, მაგრამ უარი მივიღეთ.
ასევე ფრაქციას არ მისცეს საჯარო ინფორმაცია გადახურვისა და დროებით საცხოვრებლით უზრუნველყოფის პროგრამების შესახებ. არაფერს ვამბობ იმაზე, რომ არ გვეძლევა საშუალება მუნიციპალურ ა(ა)იპიებში დასაქმებულთა რაოდენობისა და ვინაობის შესახებ ვიცოდეთ რამე. გასაგებია პერსონალურ მონაცემთა დაცვის შესახებ კანონს იშველიებენ მიზეზად, მაგრამ ზოგადად ეს კანონიც შესაცვლელია და არსებულ პირობებშიც შესაძლებელია დეპუტატის დაინტერესება დაკმაყოფილდეს. ამავდროულად უშუალოდ სხდომებზე განსხვავებული აზრის მოსმენის პრობლემამ იმატა. გამოდიხარ მიკროფონთან, რამეს იტყვი უმრავლეობისთვის მიუღებელს და ადგილებიდან იწყება რეპლიკები, ხმაური და არავინ ფიქრობს პასუხი ცივილიზებური ფორმით გაგცეს. რამდენიმე დეპუტატია, რომლებიც განსაკუთრებით ვერ იტანს განსხვავებულ აზრს და ავლენს მკაფიო არაკოლეგიალობას, თუმცა რაც ხელისუფლებაა, ბუნებრივია ისაა ადგილობრივ დონეზეც, სადაც ზემოდან წამოსულ დირექტივებს შესაბამისად ასრულებენ და ამდროს ჩვენზე ამბობენ, ვითომ ვინმეს დავალებას ვასრულებთ“ .- დასძინა ჯანაშიამ.
საგულისხმოა, რომ ჯუმბერ ბლაგიძის მხრიდან გაჟღერებულ ტენდერების თემას „ოცნების“ წევრი დეპუტატები გამოეხმაურნენ და მისგან მეტი კონკრეტიკა მოითხოვეს: „თუ წერ, დაწერე მაშინ დასაბუთებულად გვარ-სახელით, წინააღმდეგ შემთხვევაში, მე ვიღებ ჩემ თავზე და გთხოვ პასუხს, დასაბუთებას“.