ინფრასტრუქტურის მინისტრის, ირაკლი ქარსელაძის განცხადებით, რიკოთი დაკეტული არ არის და გადაადგილების სპეცრეჟიმი მოქმედებს.
„პირველი ბრალდება იყო იმასთან დაკავშირებით, რომ რიკოთი დაკეტილია. რიკოთი არ არის დაკეტილი! რიკოთზე მოქმედებს გადაადგილების სპეციალური რეჟიმი, რომლის გამომწვევი მიზეზიც არის შემდეგი: 149-ე კმ-ზე, არსებული, ძველი, გზიდან 200 მეტრში აღმოჩენილი იქნა პოტენციური მეწყერის კერა. სპეციალისტების ანალიზითა და შესწავლით, ეს კერა მიჩნეული იქნა მომეტებული საფრთხის მქონედ. მიღებული იქნა მყისიერი გადაწყვეტილება რიკოთის დროებით დაკეტვასთან დაკავშირებით. ამის შემდეგ, გაფართოვდა გზა, გასამმაგდა დამაგროვებელი ბუფერი და მოეწყო დამცავი კედელი. მხოლოდ ამის შემდეგ დაწესდა გადაადგილების სპეციალური რეჟიმი. სპეციალური რეჟიმის დაწესების პირობებში, ჩვენ პრევენცია და მაქსიმალურად უსაფრთხო გარემოს უზრუნველყოფა შევძელით,
გარდა ამისა, დაუყოვნებლივ დაიწყო შესაბამისი საკვლევაძიებო სამუშაოები, რომლის საფუძველზეც, მომზადდა პროექტი. განმეორებით შეფასდა პოტენციური რისკები, რამაც შესაძლებლობა მოგვცა, შეგვემსუბუქებინა გადაადგილების რეჟიმი. ასეთი მიდგომა გაგრძელდება და შეიძლება რეჟიმი კიდევ შემსუბუქდეს ან საერთოდ მოიხსნას. რეჟიმის მოხსნა დამოკიდებულია იმ შეფასებაზე, რომელიც სპეციალისტების და ექსპერტების მიერ იქნება მიღებული“ – განაცხადა ინფრასტრუქტურის მინისტრმა ირაკლი ქარსელაძემ.
