დიდი დრო არ გასულა მას შემდეგ, რაც ავტომაგისტრალებზე, სახელმწიფოს მიერ, სიჩქარის შემზღუდავი ხელოვნური ბარიერები გაკეთდა.
რაც უნდა უცნაურად მოგვეჩვენოს, გადამეტებული სიჩქარის აღსაკვეთად გადადგმულ ნაბიჯს, ზოგი უარყოფითად შეხვდა, არა ერთგან _ აღებასაც ითხოვდნენ.
დღეისთვის, ოზურგეთის არა ერთ სოფელში მეტად უცნაური ფაქტის შემსწრე ვხდებით: მოსახლეობის წარმომადგენლები, სოფლის მოასფალტებულ გზებზე, ცენტრალურ სივრცეში თუ ცალკეულ უბნებში, საკუთარი გადაწყვეტილებით, აკეთებენ სიჩქარის შემზღუდავ ხელოვნურ ბარიერებს _ ასხამენ ცემენტის ზოლს. ზოგან წყვეტილების სახით, ზოგან კი მთლიან ზოლს ავლებენ. თან, მონაკვეთების დაშორება, შესაძლოა, ას მეტრზე ნაკლებიც იყოს.
“თუ ყოველ ას მეტრში “ბუგორი” უნდა გავჭიმოთ, რა საჭირო იყო ასფალტი? რეგულაციის გარეშე ვის აქვს უფლება, როგორც მოეპრიანება, ისე აკეთოს ჯებირი? თავის, თუ მეზობლის ეზოსთან, ასფალტზე საკუთარი გადაწყვეტილებით, ერთპიროვნულად რატომ უნდა გააკეთოს ვინმემ ბარიერი? ლამის “დომინოს პრინციპი” ამოქმედდა და ბევრგან აკეთებენ. სოფლებისთვის ეს მალე აქტიურად გადამდები გახდება. უმჯობესი იქნება, საპატრულო პოლიცია ხშირად შევიდეს სოფლების გზებზე და გააკონტროლოს, დააჯარიმოს მაღალი სიჩქარით მოსიარულე მძღოლები”, _ ამბობენ გაბრაზებული ადამიანები, რომლებიც ოზურგეთის სოფლებში ცხოვრობენ.
ჩვენ გადავიღეთ სოფლების: ოზურგეთის, დვაბზუს, გურიანთის შიდა მოასფალტებული გზები და ვნახეთ, თუ როგორ პრიმიტიულად და საფრთხის შემცველადაა გაკეთებული გზებზე ეს, როგორც მოსახლეობა ამბობს, “ბუგორები”. ასევე, არ არის საგზაო ნიშნები, რაც ღამით მოსიარულე უცხო მძღოლისთვის ორმაგი საფრთხის შემცველია. სულ ადვილი შესაძლებელია, ავტომანქანამ ავარია მოახდინოს ასე თვითნებურად ნაგებ ბარიკადებზე გადავლისას.
“ჩვენთვის უმნიშვნელოვანესია ბავშვების უსაფრთხოება. აწყვეტილი დაჯირითობენ მძღოლები. რა გზას დავადგეთ იქ, სადაც მჭიდრო დასახლებაა? მანქანებიც ხშირად მოძრაობენ და ბავშვებს წასასვლელი არსად აქვთ _ თამაშობენ ეზოებში, ჭიშკრებთან ახლოს ან გადადიან ერთმანეთთან. სხვაგვარად ცხოვრება წარმოგიდგენიათ? ყველა სოფელში არის ახლა ეს პრობლემა.
ჯერ გზები არ იყო მოწესრიგებული. ახლა მოასფალტდა, ხალხმა ამოისუნთქა, თანამედროვე, სრულფასოვან გზაზე უწევს გადაადგილება. თუმცა, უცებ დავდექით მეორე პრობლემის წინაშე _ ბევრი თავხედი მძღოლი არავის და არაფერს არ ერიდება. ძალიან მაღალი სიჩქარით დაქრიან და შიშის ქვეშ გვაცხოვრებენ. რა ვქნათ?!” _ გვითხრეს ადგილობრივებმა დვაბზუსა და გურიანთაში.
ადგილობრივი მცხოვრებლები საყვედურს გამოთქვამენ იმის გამოც, რომ საპატრულო პოლიციის წარმომადგენლები ამ საქმეს ყურადღებას არ აქცევენ:
“ადრე უფრო დადიოდნენ სოფლებში, ახლა კი მოადუნეს ყურადღება. კარგი იქნება, ხშირად ჩაატარონ რეიდები თუ რაც ჰქვია, მძღოლებიც დააჯარიმონ ამ აწყვეტილი სიარულისთვის”, _ ამბობენ ისინი.
ოზურგეთის საკრებულოში სოფელ გურიანთიდან არჩეული დამოუკიდებელი დეპუტატი, მაია ზოიძე ამბობს, რომ ასეთ ბარიერებს ადგილობრივი მცხოვრებლები, ძირითადად, ღამით აკეთებენ:
“ერთხელ დავუშალე ერთგან და მეორე ადგილზე გააკეთეს. ასევე გეტყვით, რომ ეს საკითხი ოზურგეთის საკრებულოს სხდომაზე სერიოზულად განიხილეს. მახსოვს ისიც, რომ ზედამხედველობის სამსახურს დაევალა რეაგირება მოეხდინათ ამ ფაქტზე.
თავის მხრივ, ანგარიშგასაწევია მოსახლეობის წუხილი. ბავშვებისთვის უსაფრთხო გარემოს შექმნაა ჩვენი ცხოვრების მთავარი აზრი. გარდა ამისა, სოფელია და ხალხს ჰყავს პირუტყვი, ფრინველი. ქათამიც რომ მოკლა ჩქარა ჩავლილმა მანქანამ, ისიც ზარალია ადამიანისთვის. ერთი სიტყვით, ეს საკითხი სერიოზულად მისახედია და ზედამხედველობის სამსახური იქნება თუ მთლიანად მერია, აუცილებლად უნდა მოაგვარონ. სოფლებში, გზის პირად მცხოვრებ ოჯახებს, მშვიდად ცხოვრების საშუალება უნდა ჰქონდეთ”, _ თქვა ზოიძემ.
ოზურგეთის მუნიციპალიტეტის მერის წარმომადგენელი გურიანთაში, გიორგი ფასიეშვილი ადასტურებს, რომ სოფელში თვითნებურად ხდება ხელოვნური ბარიერების დაგება და მსგავსი პრეცედენტი არა ერთ სოფელშია:
“ერთხელ რომ გავაფრთხილე, მაინც დააგეს. მერე ტრაქტორი გამოვიყვანე და დავაშლევინე. ახლა არის ასეთი ფაქტები, რომ ღამით, ჩუმად აგებენ. ხშირად დავდივარ, ვესაუბრები მოსახლეობას. მოასფალტებულ გზას ყველა ნატრობდა. გაკეთდა და ახლა ვამახინჯებთ. დავყაროთ მაშინ ხრეში და ვიაროთ. ასე შეიძლება? აუცილებლად გავატარებთ ღონისძიებას. ავიღებთ ამ “ბუგორებს” და, ასევე, ზედამხედველობის სამსახურთან ერთად, როგორმე მოვაგვარებთ ამ პრობლემას”, _ გვითხრა გიორგი ფასიეშვილმა.
პრობლემის ირგვლივ, ოზურგეთის მუნიციპალიტეტის მერიის ზედამხედველობის სამსახურის უფროსს, მიხეილ შილაკაძეს ვესაუბრეთ:
“ასეთი ქმედება სამართალდარღვევას წარმოადგენს. არაერთხელ აღვკვეთეთ. თუმცა, სოფელში არავინ აღიარა, ვინ გააკეთა ეს და იდენტიფიცირება ვერ მოვახდინეთ. წესით, ასეთი “ბუგორები” მხოლოდ სკოლებთან, საბავშვო ბაღებთან უნდა იყოს. ხოლო გზის სავალ ნაწილზე სხვაგან თუ გაკეთდება, ეს უნდა მოხდეს საკრებულოს გადაწყვეტილების თანახმად, ამის შემდეგ კი დაიდგას საგზაო ნიშანი. წინააღმდეგ შემთხვევაში ეს არის კანონდარღვევა. ჩვენ სასწრაფოდ გავატარებთ ახლა ღონისძიებას და დავშლით ყველა ასეთ უკანონო ბარიერებს”, _ გვითხრა მიხეილ შილაკაძემ.
“გურია ნიუსი” კვლავ შემოივლის ოზურგეთის მუნიციპალიტეტის სოფლების შიდა გზებს და მკითხველს მივაწვდით ინფორმაციას, გატარდა თუ არა ღონისძიება ასეთ სახიფათო, უკანონო ქმედებებზე, საპატრულო პოლიციას კი მოვუწოდებთ, ხშირად იარონ სოფლებში და შესაბამისი ზომები გაატარონ მაღალი სიჩქარით მოძრავი ავტომობილების მძღოლების მიმართ.
[sexy_author_bio]
