“უცხოური გავლენის აგენტების შესახებ” კანონპროექტის ირგვლივ პარლამენტში განვითარებული მოვლენები reuters-ის ობიექტივში მოხვდა.
“ორშაბათს ქართველ დეპუტატებს შორის ჩხუბი ატყდა, როდესაც საპარლამენტო კომიტეტმა განიხილა კანონპროექტი “უცხოური გავლენის აგენტების შესახებ”, რომელიც კრიტიკოსების თქმით, მეზობელი რუსეთის დრაკონული კანონმდებლობის მოდელით არის შექმნილი.
დედაქალაქ თბილისში, პარლამენტის შენობის შიგნით გადაღებულ ვიდეოში ჩანდა დეპუტატებს შორის ხანმოკლე, მაგრამ ძალადობრივი შეხლა-შემოხლა მას შემდეგ, რაც პალატის იურიდიულ საკითხთა კომიტეტის თავმჯდომარემ დაარტყა ოპოზიციური პარტიის “ერთიანი ნაციონალური მოძრაობის” ლიდერს, რომელიც ეწინააღმდეგება კანონპროექტს.
მმართველმა ბლოკმა „ქართულმა ოცნებამ“ გასულ თვეში განაცხადა, რომ მხარს უჭერს კანონმდებლობას, რომელმაც ჯერ კიდევ უნდა გაიაროს სხვა დამტკიცების ეტაპები, სანამ ის კანონი გახდება.
კანონი მოითხოვს, რომ ორგანიზაციები, რომლებიც იღებენ თავიანთი დაფინანსების 20%-ზე მეტს საზღვარგარეთიდან, დარეგისტრირდნენ როგორც “უცხოური აგენტები” და დაექვემდებარონ იუსტიციის სამინისტროს მონიტორინგს, წინააღმდეგ შემთხვევაში სოლიდური ჯარიმები დაემუქრებათ.
კრიტიკოსებმა ის შეადარეს 2012 წლის რუსულ კანონს, რომელიც მას შემდეგ სტაბილურად გაფართოვდა და გამოიყენებოდა რუსეთის სამოქალაქო საზოგადოებისა და დამოუკიდებელი მედიის დარბევის მიზნით. მათ კანონი შეაფასეს, როგორც საქართველოში ავტორიტარული ცვლილების სიმბოლო.
„რუსული კანონმდებლობა, რომელიც ახლა პარლამენტშია შემოთავაზებული, ეწინააღმდეგება საქართველოს ეროვნულ ინტერესებს, ჩვენს ევროპულ მისწრაფებებს“, – განაცხადა ირაკლი ფავლენიშვილმა, სამოქალაქო უფლებების დამცველმა და ოპოზიციონერმა პოლიტიკოსმა.
“ამ საკითხზე მთელი საერთაშორისო თანამეგობრობა და ქართული საზოგადოება თანხმდება”.
თუმცა, „ქართული ოცნების“ დეპუტატმა გივი მიქანაძემ ეროვნულ ტელევიზიას განუცხადა: „ქართული საზოგადოება აბსოლუტურად იმსახურებს იცოდეს, რომელი ორგანიზაციები ფინანსდებიან, რომელი წყაროებიდან.
ჩვენ ვსაუბრობთ გამჭვირვალობაზე და ვალდებულებაზე (ქართველი ხალხის წინაშე).
მმართველი პარტია აცხადებს, რომ რჩება ერთგული იმისა, რომ საქართველო ერთ დღეს გაწევრიანდება ევროკავშირში.
საქართველოს პრეზიდენტმა სალომე ზურაბიშვილმა განაცხადა, რომ ის ვეტოს დაადებს კანონპროექტს და ამტკიცებს, რომ ეს საფრთხეს უქმნის საქართველოს ევროკავშირსა და ნატოში გაწევრიანების იმედებს. პარლამენტს შეუძლია გააუქმოს პრეზიდენტის ვეტო. რუსეთი კატეგორიულად ეწინააღმდეგება საქართველოს ნატოში გაწევრიანებას.
გასულ თვეში 60-ზე მეტმა სამოქალაქო საზოგადოების ორგანიზაციამ და მედიასაშუალებამ განაცხადა, რომ ისინი არ შეასრულებენ ახალ „უცხოური აგენტის“ კანონმდებლობას, თუ ის კანონი გახდება”,_ წერია reuters-ის მიერ გამოქვეყნებულ სტატიაში.
