“რიგით მოქალაქეს, რომელიც პრობლემებს წააწყდება, აღარ ეყოლება არავინ, ვისაც დასახმარებლად მიმართავს!“ 

გვესაუბრება რონდელის ფონდის უფროსი მკვლევარი თორნიკე თურმანიძე:

_ ბატონო თორნიკა, აშშ–სა და ევროკავშირისგან დახმარების პაკეტების შეჩერება, ევროკავშირში გაწევრიანების პერსპექტივის გაყინვა, რას გამოიწვევს ქვეყნის შიგნით და გარეთ?

 _ საგარეო პოლიტიკის მხრივ, საბოლოო ჯამში გამოიწვევს იმას, რომ საქართველო აღმოჩნდება რუსეთის გავლენის ქვეშ! რაც შეეხება ქვეყნის შიგნით, ეს კანონი პირდაპირ აზიანებს დემოკრატიას, დემოკრატიულ  მმართველობას. შეიძლება ყველასთვის უცბად ნათელი არ იყოს, მაგრამ ეს კანონი მოახდენს ზეგავლენას საქართველოს თითოეულ მოქალაქეზე. მედია და არასამთავრობო სექტორი არის უმნიშვნელოვანესი სექტორი ნებისმიერ დემოკრატიულ ქვეყანაში და ეს ორივე სექტორი ემსახურება რიგითი მოქალაქეების ინტერესებს. როდესაც მოქალაქე აწყდება უსამართლობას ცხოვრებაში, ის მიმართავს მედიას და არასამთავრობო ორგანიზაციებს, და როდესაც ეს ორი სექტორი გაქრება, აღარ იქნება დამოუკიდებელი მედია და არასამთავრობო ორგანიზაციები, მაშინ რიგით მოქალაქეს, რომელიც რაღაც პრობლემებს წააწყდება, აღარ ეყოლება არავინ, ვისაც დასახმარებლად მიმართავს. ეს აისახება ადამიანებზე _ ისინი თავს იგრძნობენ უფრო დაუცველებად. ზოგადად, როდესაც დემოკრატიის დონე ქვეითდება, ეს მათ უფლებებზე უარყოფითად იმოქმედებს. როგორც ვაკვირდებით, აშშ-სგან და ევროკავშირისგან  დახმარება წყდება; მართალია, “ოცნება“ ამბობს, რომ ამით არაფერი აკლდება ქვეყანას, მაგრამ, გრძელვადიან პერსპექტივაში, დიდ ზიანს მიაყენებს უამრავ სფეროს _ უსაფრთხოებას, ჯანდაცვას, ეკოლოგიას… თითოეულ ამ სფეროში ევროკავშირი, აშშ, დებდა მნიშვნელოვან თანხებს და აფინანსებდა როგორც დედაქალაქში, ისე რეგიონებში წყლის სისტემის, კანალიზაციის სისტემის გაყვანის, ინფრასტრუქტურის და სოფლის მეურნეობის პროექტებს… ძალიან დიდი წილი იყო სწორედ დასავლური დაფინანსების და როცა ეს შეჩერდება და აღარ გახორციელდება ახალი პროექტები, უარყოფითად იმოქმედებს ქვეყანაზე. შეიძლება ეს უცბად ვერავინ შეამჩნიოს, მაგრამ როცა თვეები და წლები გავა და არ იქნება სიახლე, მერე მიხვდებიან, მაგრამ უკვე გვიანი იქნება და ჯობს ახლავე, რეალურად აღიქვან და მიიღონ გადაწყვეტილება საპარლამენტო არჩევნებზე.

 _ რა სიკეთე მოაქვს დასავლეთთან ინტეგრაციას და რას კარგავს საქართველო სტრატეგიულ პარტნიორებთან დაშორებით?

_ დასავლეთი, ამერიკის შეერტებული შტატები, ევროკავშირი _ ეს არის მშვიდობის, უსაფრთხოების, ეკონომიკური და სოციალური კეთილდღეობის ზონა; სწორედ ამ ზონაში გვინდა ჩვენ შესვლა. როცა ხელისუფლება ამბობს, რომ ის მშვიდობას ინარჩუნებს რუსეთთან ურთიერთობის დალაგებით, ეს მცდარი გზავნილია, იმიტომ, რომ რუსეთთან მარტოდმარტო დარჩენილ საქართველოს არასდროს არ შეუნარჩუნებია მშვიდობა, რუსეთი მუდამ იპყრობდა საქართველოს ამა თუ იმ ფორმით.

მშვიდობის, დამოუკიდებლობის შენარჩუნების ოპტიმალური გზაა დასავლეთთან ინტეგრაცია, სამუშაო ადგილების შექმნა, ქართული პროდუქციის ექსპორტი და უკეთესი ხარისხის პროდუქციის იმპორტი…ეს შესაძლებელია იმ შემთხვევაში, თუ საქართველო გააგრძელებს დასავლეთთან ინტეგრაციას. შესაბამისად, როცა ჩვენი ურთიერთობები დასავლეთთან ფუჭდება, ის მრავალი შესაძლებლობები რომელიც აქვს საქართველოს, იკარგება და ჩვენ ვრჩებით ჩამორჩენილი, ავტორიტარული ქვეყნების პარტნიორი. გასაგებია, რომ რუსეთთან და ჩინეთთან ეკონომიკური პარტნიორობა არ ნიშნავს ბოლომდე ქვეყნის გაღარიბებას, რაღაც შემოსავალი ქვეყანას ექნება, მაგრამ აქ  ურთიერთობის განვითარების პერსპექტივა არის ძალიან ცუდი, როცა დასავლეთთან ურთიერთობა უფრო მეტ შესაძლებლობას უხსნის საქართველოს, რომ საქართველომ დაიმკვიდროს თავისი ადგილი თავისუფალი ერების საზოგადოებაში, ჰქონდეს მჭიდრო პოლიტიკური და ეკონომიკური ურთიერთობები. თუნდაც ქართული კულტურისთვის რომელი არეალია უკეთესი თავის წარმოსაჩენად, დასავლეთი თუ რუსეთი და ჩინეთი? გასაგებია, რომ გაგაქვს შენი პროდუქცია, შენი მომსახურება, კულტურული მიღწევები, მაგრამ, ამ მხრივ, დასავლეთი უფრო პრიორიტეტული უნდა იყოს, ვიდრე მსოფლიოს სხვა ნაწილები.

#EU4Georgia