ჩოხატაურის მუნიციპალიტეტის სოფელ ჯვარცხმას წყალი არ მიეწოდება. “გურია ნიუსი” ადგილობრივ მოსახლეობას შევხვდა, რომელთა თქმით, ისინი წლებია, ამ პრობლემის წინაშე დგანან.
ერთ-ერთი რესპოდენტი ჩვენთან საუბრისას ამბობს, რომ ამ საკითხთან დაკავშირებით მათთან არავინ ყოფილა სასაუბროდ. მისი თქმით, წყლის მილებიც კი არ არის გაყვანილი.
_ შეხვდით თუ არა არსებულ პრობლემასთან დაკავშირებით ვინმეს და გაიცა თუ არა დაპირება?
_ მილები არ არის გაყვანილი. ამ თემასთან დაკავშირებით შევაგროვეთ ხელმოწერები, რომელიც გადაეცა მერის წარმომადგენელს სოფელში. ზოგადად, ჩვენთან სასაუბროდ კი არავინ ყოფილა მოსული.
მოსახლეობის უმეტეს ნაწილს ეზოში აქვს ჭა, რომელში არსებულ წყალსაც ყველანაირი დატვირთვა აქვს მათ ყოველდღიურობაში. მოსახლეობის ის ნაწილი კი, რომელსაც ჭაც კი არ აქვს, წყალს მეზობლებიდან ეზიდება და სხვადასხვა ზომის ბოთლებში აგროვებს. ზაფხულში კიდევ უფრო დიდ გასაჭირში ვართ. გვალვების დროს ჭები შრება დ წყლის, სასმელი იქნება თუ ტექნიკური, სხვა სოფლებიდან მოტანა გვიწევს. ამისთვის კი მანქანას ვქირაობთ. წარმოგიდგენიათ, რა რაოდენობით უნდა მოზიდო წყალი, რომ ეყოს ოჯახს? საინტერესოა, როდის ეღირსება წყალი ჯვარცხმას? _ გვეუბნება ჩვენი რესპონდენტი.
ჯვარცხმის მოსახლეობა ჩვენთან საუბრისას იხსენებს, რომ გაიცა დაპირება ამ პრობლემის აღმოსაფხვრელად, მაგრამ დაპირება დაპირებად დარჩა.
_ სოფელ ჯვარცხმას აქვს „ბასეინი“, სადაც ჩადის მდინარე სუფსის წყალი, რომელიც, რა თქმა უნდა, იფილტრება და მისი არასაკმარისი რაოდენობის გამო, დაუმატეს მდინარე გუბაზეულის წყალიც, მაგრამ ამით სოფელში არსებული პრობლემა მაინც არ მოგვარდა, რადგან ამ წყალს იყენებს დაბაც, _ ამბობს მოსახლეობა.
„გურია ნიუსი“ ესაუბრა მერის წარმომადგენელს სოფელ ჯვარცხმაში მაია რამიშვილს, რომელიც ჩვენთან საუბრისას ამბობს, რომ სოფელში არსებული პრობლემის შესახებ მუნიციპალიტეტის მერიას ინფორმაცია მიაწოდა და პრობლემაც მომდევნო წელს უნდა აღმოიფხვრას.
„მოსახლეობის მოთხოვნით მივაწვდინეთ ხმა ჩოხატაურის მუნიციპალიტეტის მერიას და განაცხადი ამ პრობლემის მოსაგვარებლად გვაქვს შეტანილი მერიაში. ერთ-ერთი „ბასეინის“ მილები არის დაზიანებული, რაც საჭიროებს აღდგენას და სწორედ, 2023 წლის ბიუჯეტში განიხილება ეს საკითხი.
სოფელ ინტაბუეთში მოიძიეს რაღაც წყლები და ასე თუ ისე, მოსახლეობის რაღაც ნაწილი დაკმაყოფილდა, ზოგადად კი, ეს პრობლემა ნამდვილად არის, მაგრამ 2023 წლიდან იწყება ამ საკითხზე მუშაობა. რადგან ეს წელი გამოცხადდა „წყლის წლად“ დაიწყება რეაბილიტაციაც და მოსახლეობის წყლით უზრუნველყოფაც“, _ გვითხრა მაია რამიშვილმა
.
ავტორი
