ლანჩხუთის მუნიციპალიტეტის მერის მოადგილის პოსტი ვაკანტურია. ახალარჩეული მერის, ალექსანდრე სარიშვილის ინფორმაციით, ამ ეტაპზე კანდიდატურების განხილვა მიმდინარეობს.
გავრცელებული ინფორმაციით, მერის მოადგილის ვაკანტურ თანამდებობას გამგეობის ქონების მართვის სამსახურის უფროსი, გოგი ფაცურია ჩაიბარებს.
ფაცურია თვითმმართველობის არჩევნებზე „ქართული ოცნების“ საარჩევნო შტაბს ედგა სათავეში და საზოგადოებაში გავრცელებული მოსაზრებით, ლანჩხუთში „ოცნების“ გამარჯვებაში ლომის წილი სწორედ მას მიუძღვის.
თავად ფაცურია მერის მოადგილის პოსტზე შესაძლო დანიშვნას არ ადასტურებს, თუმცა, ვერც უარყოფს.
„მე არ ვარ ის პიროვნება, ვინც თანამდებობისკენ ისწრაფვის. ჯერჯერობით, არანაირი შემოთავაზება არ მქონია ამ კუთხით და არ ვიცი“, _ გვითხრა გოგი ფაცურიამ.
როგოც ამბობენ, ფაცურიას კანდიდატურის პარალელურად მოადგილის პოსტზე გელა პატეიშვილიც განიხილება, რომელიც მამათის ადმინისტრაციული ერთეულში რწმუნებულის თანამდებობას იკავებს და საარჩევნო პერიოდში საკმაოდ აქტიურად იყო ჩართული.
თუმცა, ამ ინფორმაციას არ ადასტურებს თავად გელა პატეიშვილი და ამბობს, რომ ამ საკითხთან დაკავშირებით არც შემოთავაზება მიუღია ვინმესგან და არც უსაუბრია.
პატეიშვილთან დაკავშირებით გავრცელებულ ინფორმაციას არც თავად ალექსანდრე სარიშვილი ადასტურებს, როლის თქმითაც მომავალი მოადგილის ვინაობა ორ დღეში გადაწყდება.
„ვერ დაგიდასტურებთ პატეიშვილთან დაკავშირებულ ინფორმაციას. ორ დღეში გადაწყდება ვინ დაიკავებს მოადგილის პოსტს, სადაც რამდენიმე კანდიდატურა განიხილება, მათ შორის გოგი ფაცურიას“, _ გვითხრა სარიშვილმა.
რაც შეეხება მუნიციპალიტეტის პირველი პირის ყოფილი მოადგილეს, ნუგზარ ცინცაძეს, სამომავლოდ ის საქმიანობის გაგრძელებას ისევ საჯარო სამსახურში გეგმავს, თუმცა, სად ამაზე, ჯერჯერობით, კონკრეტულს ვერაფერს ამბობს.
„საარჩევნო პერიოდის გამო უფლებამოსილება შემიწყდა და შესაბამისად, მოადგილის პოსტსაც აღარ ვიკავებ. ისევ საჯარო სამსახურში გავაგრძელებ მუშაობას, თუმცა, არა მერის მოადგილის რანგში. სად და როგორ ეს მალე გაირკვევა“, _ამბობს ცინცაძე.
