ლანჩხუთში, თამარ მეფის ქუჩაც იმ 13 ქუჩის ჩამონათვალშია, სადაც რეგიონებში გასახორციელებელი პროექტების ფონდიდან ექვს მილიონ ლარზე მეტი მიიმართა ინფრასტრუქტურული სამუშაოების ჩასატარებლად. თუმცა, ბოლო წლებია, რატომღაც ლანჩხუთში წესად დამკვიდრდა რეაბილიტაციის საჭიროების მქონე ქუჩებზე ინფრასტრუქტურული სამუშაოების ეტაპობრივად გახორციელება. მსგავსი მიდგომით კი პრობლემის ბოლომდე მოგვარება ვერ ხერხდება, რის გამოც მოსახლეობა უკმაყოფილო რჩება და გახორციელებული სამუშაოების შესრულების პრინციპთან დაკავშირებით კითხვის ნიშანი უჩნდება.
ასეა თამარ მეფის ქუჩის შემთხვევაშიც, სადაც, ქუჩის ის ნაწილი, რომელიც რკინიგზის მეორე მხარეს, “გურიას” სტადიონის მიმდებარედ მდებარეობს, ინფრასტრუქტურულ პროექტს მიღმა დარჩა, რაც აქ მცხოვრებთა გულისწყრომის მიზეზი შეიქნა.
“წლებია ვითხოვთ, თამარ მეფის ქუჩაზე მოგვაქციონ ყურადღება. სულ რაღაც ასორმოცდაათი მეტრის სიგრძეზეა ასფალტი დასაგები, მაგრამ არავინ ყურადღებას არ გვაქცევს. იძულებული ვხდებით მოსახლეობა, რომ ჟურნალისტები მოვიყვანოთ და ყველა დეტალი საქვეყნოდ დავაფიქსიროთ. ჩვენც ადამიანები ვართ ნაგავსა და წყალში ვიხრჩობით, ტყედ გადაიქცა მთელი ტერიტორია. ბატონი მერი რამდენჯერ არის ამ ტერიტორიაზე ნამყოფი, ნუთუ ცოდვა–მადლი არ აქვს, ყურად რომ არ იღებს ჩვენს თხოვნას.
სირცხვილია, სადგურის შემოგარენში ბაზარი, საკონსერვო და კიდევ ბევრი შენობა ნანგრევებად არის ქცეული, მიტოვებულ ქალაქს გავს, გული მტკივა რომ ვუყურებ. ისეთი დიდი არ არის ჩვენი რაიონი, რომ ეს პრობლემები, წლების განმავლობაში, მთავრობამ ვერ მოაწესრიგა!
მოგვაქციეთ ყურადღება, თორემ ძვირად დაგიჯდებათ ასორმოცდაათი მეტრის საფასური, ბატონო ალექსანდრე“, _ მიმართავს ლანჩხუთის მერს მოსახლეობა, რომელთა ინფორმაციითაც, მათ საკითხთან დაკავშირებით, ჰქონდათ კომუნიკაცია ადგილობრივი ხელისუფლების არაერთ წარმომადგენელთან და პასუხად მიიღეს, რომ არასაკმარისი თანხების გამო ვერ მოხერხდა თამარ მეფის ქუჩის სრული რეაბილიტაცია.
როგორც ქუჩის ამ მონაკვეთის მოსახლეობა ამბობს, გაუმართავი და მოუწესრიგებელი საგზაო ინფრასტრუქტურის გამო წვიმის დროს წყალი ეზოებსა და სახლებს ტბორავს.
“ფინანსები არ ყოფნით თურმე 150 მეტრი ასფალტის დასაგებად…
წლებია, მხოლოდ დაპირებები გვესმის. ისეთ ქუჩებს აგებენ, მაგათ რომ აწყობთ. ქუჩის ნახევარ მხარეს აგებენ და მეორე მხარეს საერთოდ არ აქცევენ ყურადღებას. მოსახლეობა ვცხოვრობთ იქ და ყურადღება მოგვაქციონ, სირცხვილია, მანქანა ვეღარ გაივლის. ეს პატარა მონაკვეთი დატოვეს. ტყედ არის ქცეული აქაურობა. სანიაღვრე არხები ამოვსებულია და წვიმის დროს ტბა დგება.
დავრეკეთ მერიაშიც და ვესაუბრეთ რამდენიმე, წესით, კომპეტენტურ პირს, რომელთაც პასუხი იყო, რომ დაფინანსება არ ეყოთ და ამოიღეს პროექტიდან… არ ვიცით, როდის დაიგებაო“, _ საკუთარ გულისწყრომას საჯაროდ, მერიის ფეისბუქის გვერდზეც აფიქსირებენ თამარ მეფის ქუჩის იმ მონაკვეთის მცხოვრებლები, რომელიც გასახორციელებელ პროექტს მიღმა აღმოჩნდა.
მოსახლეობის მხრიდან გამოთქმულ საყვედურებს მერიის პიარი მაკა სულაბერიძე პასუხობს და განმარტავს, რომ ზემოთ ნახსენები პროექტი სრულად მოიცავს თამარ მეფის ქუჩას და აქ მთლიანად იგება ასფალტის საფარი.
საკითხთან დაკავშირებით მეტი დეტალის გასარკვევად “გურია ნიუსი” მერიის ინფრასტრუქტურის სამსახურის უფროსის მოვალეობის შემსრულებელს, ალეკო კირვალიძეს დაუკავშირდა. მისგან მიღებული ინფორმაციით, იმისთვის, რომ რეაბილიტაციის გარეშე ქუჩის ამ დარჩენილ ნაწილზეც ჩატარდეს ინფრასტრუქტურული სამუშაოები, ადგილობრივი ხელისუფლების მიერ ახლა მიმდინარებს საჭირო თანხების მოძიება.
“თანხების მოძიების ეტაპზე ვართ. დიდი სურვილია, რომ მიმდინარე წელსვე მოხდეს თამარ მეფის ქუჩის ამ მონაკვეთის რეაბილიტაციაც. ვნახოთ“, _ ამბობს კირვალიძე.
ავტორი
