საქართველოს სოფლის განვითარების სტრატეგიული პრიორიტეტებისა და 2018-2020 წლების სტრატეგიისა და სამოქმედო გეგმის გახოციელების შესახებ 17-18 მარტს ყვარელში წამყვანი მედია საშუალებების ჟურნალისტებისთვის საინფორმაციო შეხვედრა გაიმართა.
შეხვედრა ჩატარდა საქართველოს გარემოს დაცვისა და სოფლის მეურნეობის სამინისტროს ინიციატივით და ევროკავშირისა (EU) და გაეროს განვითარების პროგრამის (UNDP) ხელშეწყობით.
როგორც შეხვედრაზე გარემოსა დაცვისა და სოფლის მეურნეობის მინისტრმა, ლევან დავითაშვილმა აღნიშნა, გასულ წელს ბორჯომში მომხდარი ხანძრის გამოძიება ჯერ დასრულებული არ არის.
„ტყის ხანძრები არის მოვლენა, რომელიც ბუნებრივი პირობებით ხდება, თუმცა, საზოგადოებაში იყო ეჭვები, რომ შეიძლება ხანძრის გამომწვევი იყოს ხელოვნური პროცესებიც. დღესდღეობით, გამოძიება დასრულებული არ არის“, _ განაცხადა დავითაშვილმა.
შეხვედრაზე, ასევე, ცნობილი გახდა, რომ ბორჯომის ხეობაში 2008-2017 წლების ნახანძრალი ტერიტორიის აღდგენითი სამუშაოები გაზაფხულიდან დაიწყება.
შესწავლის საფუძველზე პირველ ეტაპზე აღდგენას ექვემდებარება 250 ჰა ფართობი. 2018 წლის გაზაფხულისა და ზაფხულის პერიოდში გახორციელდება: ტერიტორიაზე ღობის მთლიანობის აღდგენა და დამატებითი ტერიტორიების შეღობვა, ტერიტორიის გაწმენდა, ეროზიის საწინააღმდეგო ღონისძიებები. 2018 წლის შემოდგომის სეზონიდან დაიწყება ნერგების დარგვა.
როგორც გარემოს დაცვისა და სოფლის მეურნეობის მინისტრმა, ლევან დავითაშვილმა განაცხადა, ნახანძრალი ტერიტორიაზე ტყის აღდგენა ხის იმ ჯიშებით მოხდება, რაც იქ ხანძრამდე არსებობდა.
„ჩვენი ტყეები არის ენდემური, ძირითადად, ბუნებრივი ტყეებია. ჩვენ აქ უნდა გავაშენოთ ხის ის ჯიშები და კულტურები, რაც აქ იყო წარმოდგენილი. ეროვნული სატყეო სააგენტო აწყობს სანერგეებს, იმისთვის, რომ კონკრეტულად ის ჯიშები გამრავლდეს. 1 300 000 ნერგი გვაქვს უკვე, ნიადაგის ანალიზები დეტალურად გაკეთებულია და ანალიზის პასუხების შესაბამისად, ჩვენ, შეგვიძლია დარგვა 2018 წლის შემოდგომაზე უკვე დავიწყოთ“,_განაცხადა დავითაშვილმა.
შეგახსენებთ, რომ ბორჯომის ხეობაში ცეცხლი გასული წლის 20 აგვისტოს გაჩნდა და მას შემდეგ რაც, ჩაქრობა ადგილობრივმა ძალებმა დამოუკიდებლად ვერ შეძლეს, ცეცხლის ჩამქრობ სამუშაოებში აზერბაიჯანი, სომხეთი, თურქეთი და ბელორუსია ჩაერთვნენ. დახმარების სურვილი ამერიკის შეერთებულმა შტატებმა და რუსეთმაც გამოთქვეს.
ბორჯომის დაბის ხეობაში 752 ჰექტარი ტყის ფართობი დაიწვა, საიდანაც 525 ჰექტარი 2008 წლის აგვისტოში რუსეთის აგრესიის შედეგად, ხოლო 232 ჰექტარი მიმდინარე წელს გაჩენილი ხანძრის შედეგად განადგურდა.
ბორჯომის ხეობის გარდა, ტყის აღდგენის ღონისძიებები გახორციელდება ასევე შიდა ქართლის, იმერეთის, კახეთის, გურიის, სამეგრელო-ზემო სვანეთის, რაჭა-ლეჩხუმი ქვემო სვანეთის რეგიონებში – 400 ჰა-მდე ფართობზე.
მათ შორის:
ბუნებრივი განახლების ხელშეწყობა: ხაშური-ქარელის სატყეო უბნის ქვიშხეთის სატყეო – 9 ჰა;
თელავი-ახმეტის სატყეო უბნის ყვარელის სატყეო 10 ჰა;
ოზურგეთი-ლანჩხუთის სატყეო უბნის მთისპირის სატყეო – 1,2 ჰა; ჩოხატაურის სატყეო უბნის ბახმაროს სატყეო – 2 ჰა; ცაგერის სატყეო უბნის ცაგერის სატყეო – 10 ჰა; კოლხეთი-მარტვილის სატყეო უბნის გაჭედილის სატყეო – 9,2 ჰა; ტყიბულის სატყეო უბნის საწირეს სატყეოში 23,5 ჰა ფართობზე;
ტყის გაშენება მოხდება: ოზურგეთი-ლანჩხუთის სატყეო უბნის მთისპირის სატყეო 1 ჰა;
ოზურგეთი-ლანჩხუთის სატყეო უბნის მთისპირის სატყეო – 1 ჰა; საჩხერე-ჭიათურას სატყეო უბნის კაცხის სატყეო 18,7 ჰა; საჩხერე-ჭიათურას სატყეო უბნის კაცხის სატყეო 20 ჰა;
სწრაფმზარდი სახეობების პლანტაციის გაშენება (აკაცია) გაშენდება:
ოზურგეთი-ლანჩხუთის სატყეო უბნის მთისპირის სატყეო 2 ჰა;
ტყის დროებითი სანერგე კი : ლენტეხის სატყეო უბნის ლენტეხის სატყეო 0,2 ჰა-ზე მოეწყობა.
