როგორც ცნობილია, კურორტ ბახმაროში კომპანია „ორბი“ სასტუმროს მშენებლობას გეგმავს. ამასთან დაკავშირებით, საზოგადოების ერთი ნაწილი გაღიზიანებული და იმ პროექტის განხორციელების წინააღმდეგია, რასაც კომპანია აპირებს.
ორი დღის წინ, ონლაინ მედია-პლატფორმა „მაუწყებელმა“ სოციალურ ქსელში გამოაქვეყნა გრიგოლ მახარაძის ფოტოები, რომლებზეც, „მაუწყებლის“ თქმით, დაფიქსირებულია კომპანია „ორბის“ მანქანა და ტერიტორიაზე ჩადგმული სამშენებლო ჯიხური. „მაუწყებელმა“ შემდეგ დააზუსტა, რომ ჯიხური მასალის გამოქვეყნების წინა დღეს არ ჩაუდგამთ.
ოზურგეთში, „ქართული ოცნების“ საარჩევნო შეხვედრის დასრულების შემდეგ „გურია ნიუსი“ „ორბის“ დამფუძნებელს, ირაკლი კვერღელიძეს ესაუბრა, რომელმაც გვითხრა, რომ ამ დროისთვის კომპანიას ბახმაროში არანაირი სამშენებლო სამუშაოები არ აქვს დაწყებული:
„ეს ინფორმაცია არ შეესაბამება სიმართლეს. ის სამშენებლო ჯიხური, რომელიც ფოტოზეა, დაახლოებით, ხუთი წელია, რაც იმ ადგილზე დგას“, _ გვითხრა ირაკლი კვერღელიძემ.
თუ როდის დაიწყებს კომპანია სასტუმროს მშენებლობას ბახმაროში, კვერღელიძის თქმით, ამას საზოგადოება კომპანიისგან აუცილებლად გაიგებს.
ფოტო აღებულია მედია-პლატფორმა „მაუწყებლის“ ფეისბუქგვერდიდან.
ამავე თემაზე: „ყურადღებით ვაკვირდები ნებისმიერ სიახლეს ამ ტერიტორიაზე“
ავტორი
