„Radio Punto Nuovo“–ს ეთერში იტალიელმა ტრავმატოლოგმა, დოქტორმა ანჯელო კავალიომ „ნაპოლისა“ და საქართველოს ეროვნული გუნდის თავდამსხმელი ხვიჩა კვარაცხელიას ტრავმის შესახებ ისაუბრა.
აღმოჩნდა რომ დიდი ალბათობით ქართველი მოთამაშე იტალიის პირველობის მორიგი ტურის შეხვედრას „უდინეზესთანაც“ გამოტოვებს. ამის შემდეგ მსოფლიო პირველობის გამო „სერია A“–ში თვენახევრიანი შესვენებაა დაგეგმილი.
„კვარას შემთხვევაში, ვიცით, რომ მან წელი „ენფილდზე“ წაქცევის დროს იტკინა. ეს არ არის ტრავმა გადატვირთვის გამო. ეს არის კუნთების კონტრაქტურა, რაც იწვევს ძლიერ ტკივილს. რის გამოც სპორტსმენი იძულებულია მოძრაობებში შეიზღუდოს.
როგორც წესი, ასეთი სახის ტრავმის შემდეგ რეაბილიტაციის პერიოდი ორ–კვირიანია, მაგრამ დოქტორი კანონიკო და დოქტორი დე ლუკა თავისი საქმის დიდი სპეციალისტები არიან. ისინი ყველაფერს აკეთებენ, რომ კვარა მოედანს, რაც შეიძლება მალე დაუბრუნონ. მოხდება ეს „უდინეზესთან“ მატჩისთვის? თეორიულად შესაძლებელია, მაგრამ ტრავმატული წელის ტკივილის ასეთი თერაპია არასდროს არის იოლი საქმე.
ტრავმა ყოველთვის ტოვებს გარკვეულ უარყოფით შედეგებს, ინფილტრატები კორტიზონზეა დამყარებული, ამიტომ ინფილტრაციას დიდი აზრი არ აქვს. ამის ნაცვლად საქმეში ერთვება ფიზიოთერაპია. ვიცი, რომ „ნაპოლის“ სამედიცინო შტაბი საოცრებებს სჩადის.
შეიძლება თუ არა სეზონის განმავლობაში წელის ტკივილმა ისევ იჩინოს თავი? თუკი ვუმკურნალებთ სწორად, ჩემი პასუხია – არა, სხვა რისკებს არ შეიცავს. თუკი კვარა სათანადოდ მკურნალობს, და მე დარმწუნებული ვარ, რომ „ნაპოლიში“ ასეც არის, მომავალში რაიმე სახის გართულებას არ უნდა ველოდოთ“.
ხვიჩა კვარაცხელიამ ტრავმა „ენფილდზე“ მიიღო, როცა კონტაქტის შემდეგ სარეკლამო ბანერს შეეხაჯა. ამ სეზონში ხვიჩა კვარაცხელიას „სერია A“–ს და ჩემპიონთა ლიგის 17 მატჩში 8 გოლი და 8 საგოლე გადაცემა აქვს, მის ანგარიშზეა 3 მოპოვებული პენალტიც.
გუშინ, ახლო წარსულში ბრაზილიის ნაკრების ლეგენდარულმა ნახევარმცველმა რიკარდო კაკამ „ნაპოლის“ თავდამახმელის ხვიჩა კვარაცხელიას შესახებ ისაუბრა.
„ხვიჩა ძალიან კარგი ბიჭია. ჩემთვის მისი თამაში სიურპრიზი იყო. სამწუხაროა, რომ ის და ნორვეგიელი ჰოლანდი მსოფლიოს პირველობას გამოტოვებენ. მოედანზე სხვაობას სწორედ ასეთი მოთამაშეები ქმნიან, რადგან იღებენ ისეთ გადაწყვეტილებებს, რომლის მიღებაც სხვებს არ შეუძლიათ“, – განაცხადა „რეალისა“ და „მილანის“ ყოფილმა ფეხბურთელმა.
8 ნოემბერს „ნაპოლიმ“, ხვიჩა კვარაცხელიას გარეშე, „სერია A“–ს მე-14 ტურში, „ემპოლის“ საკუთარ მოედანზე – 2:0 სძლია, რაც კლუბისათვის იტალიის ჩემპიონატში ზედიზედ მე-10 გამარჯვება აღმოჩნდა.
ამ მაჩვენებლით ნეაპოლელთა დამრიგებელმა ლუჩანო სპალეტიმ უნიკალური შედეგი დააფიქსირა. ის გახდა პირველი მწვრთნელი, რომელმაც თავის ორ გუნდს „სერია A“–ს ზედიზედ 10 შეხვედრა მოაგებინა. ლუჩანომ ეს ნიშნული პირველად 2005/06 წლების სეზონში დააფიქსირა, როდესაც „რომაში“ მუშაობდა.
ფეხბურთში, მსოფლიოს ჩემპიონატი 20 ნოემბერს, მასპინძელ კატარის ნაკრებსა და ეკვადორის თამაშით გაიხსნება.
გუშინ ცნობილი გახდა რომ სენეგალის ნაკრების ლიდერი სადიო მანე 2022 წლის მსოფლიოს ჩემპიონატს გამოტოვებს.
„ბაიერნის“ შემტევმა „ვერდერის“ წინააღმდეგ დაპირისპირებისას მყესები დაიზიანა, რის გამოც მისი მუნდიალზე მონაწილეობა გამოირიცხა.
მატჩის შემდეგ, „ბაიერნის“ მთავარმა მწვრთნელმა იულიან ნაგელსმანმა განაცხადა, რომ სადიო მანე ტკივილს წვივის არეში განიცდიდა და დაზიანება საშიში არ ჩანდა, თუმცა გამოკვლევებმა საპირისპირო აჩვენა.
ასევე გუშინ, „Reuters“–ის ინფორმაციით, არგენტინის ნაკრებს მსოფლიოს ჩემპიონატზე „ვილიარეალის“ ნახევარმცველი ჯოვანი ლო სელსო დააკლდება, რომელმაც დაზიანება ჯერ კიდევ 30 ოქტომბერს, „ბილბაოსთან“ გამართულ მატჩში მიიღო.
26 წლის ფეხბურთელს ბარძაყის კუნთის ტრავმა აქვს და ოპერაცია სჭირდება. ლო სელსოს მუნდიალზე წასვლის საკითხი მსოფლიოს სხვადასხვა ქვეყანაში, საუკეთესო ექიმებთან კონსულტაციის შედეგად გადაწყდა, სპეციალისტებმა არგენტინელის კატარში თამაში გამორიცხეს.
„ტოტენჰემიდან“ „ვილიარეალში“ განათხოვრებულმა ნახევარმცველმა არგენტინის ნაკრების „კოპა ამერიკაზე“ გამარჯვებასა და მსოფლიოს თასის შესარჩევ ეტაპის წარმატებით დაძლევაში უდიდესი როლი ითამაშა. როგორც არგენტინელთა მთავარი მწვრთნელი, ლიონელ სკალონი ამბობდა, ლო სელსო გუნდის ‘შეუცვლელი წევრი გახლდათ.
არგენტინის ნაკრები მსოფლიო პირველობის გათამაშებაში 22 ნოემბერს საუდის არაბეთთან მატჩით ჩაერთვება. სამხრეთამერიკელებს ჯგუფში აზიელების გარდა მექსიკა და პოლონეთი ჰყავთ.
ავტორი
