ჩოხატაურის მუნიციპალიტეტის, სოფელ ბუკნარში წლებია, რაც დაარსდა ალექსი ბერაძის სახელობის საჯარო სკოლა. სკოლაში სწავლობენ, როგორც ქრისტიანი, ასევე, მუსლიმი ბავშვები. სკოლა დაარსების დროიდან ზამთრის სეზონზე მხოლოდ შეშის ღუმელით თბება.
უნდა აღინიშნოს, რომ ცენტრალური გათბობის ფუნქციონირებისთვის საჭიროა სოფლის გაზიფიცირება, რაც სოფელ ბუკნარში 2020 წელს დაიწყო და დღემდე არ დამთავრებულა. სკოლა შეშით ჩოხატაურის ინფრასტრუქტურის სამსახურის მიერ მარაგდებოდა, წელს კი უკვე შეშის “ბრიკეტებზე” თბება, რაც, ალბათ, წინა წლებთან შედარებით მიღწევად შეიძლება ჩაითვალოს.
სკოლის დირექტორმა მარინა გოგიშვილმა ამ თემაზე “გურია ნიუსთან” საუბარი არ ისურვა, მიზეზად შეუძლოდ ყოფნა დაასახელა. ვითხოვეთ სკოლის სასწავლო ნაწილთან გასაუბრება, მაგრამ ქალბატონმა მარინამ გვითხრა, რომ სკოლას სასწავლო ნაწილი არ ჰყავს, რაც სინამდვილეს არ შეესაბამება (როგორც ჩვენთვის გახდა ცნობილი, სკოლის სასწავლო ნაწილი გიორგი გეგენავაა).
“წლებია, რაც დაარსდა ბუკნარის სკოლა და როგორც ბევრი სხვა სკოლა, ისიც შეშის ღუმელით თბება. არის საუბარი გაზიფიცირებაზეც, თუმცა, სკოლა ექვემდებარება რეაბილიტაციას. მიმდინარე წლის მანძილზე დაიწყება სამუშაოები, შემდეგი ეტაპისთვის აუცილებლად დადგება დღის წესრიგში ცენტრალური გათბობის საკითხი და გახორციელდება კიდეც. ჩვენი სკოლა საკმაოდ დიდკონტიგენტიანია, რაც ძალიან სასიხარულოა და გვინდა, ბავშვებს მაქსიმალურად შევუქმნათ ისეთი გარემო, რომ მათ სხვა სკოლებში _ ქალაქებში, სოფლებში არ მოუნდეთ გადასვლა”, _ ამბობს “გურია ნიუსთან” საუბრისას ჩოხატაურის მუნიციპალიტეტის მერის წარმომადგენლის თანაშემწე ქვენობანი-ბუკნარის ადმინისტრაციული ერთეულში თეონა ქათამაძე.
“გურია ნიუსი”, ესაუბრა ჩოხატაურის მუნიციპალიტეტის რესურსცენტრის ხელმძღვანელს, ქალბატონ შორენა სიხარულიძეს:
“ცენტრალური გათბობა გაზიფიცირებაზეა დამოკიდებული _ თუ სოფელი არის გაზიფიცირებული, იმ შემთხვევაში კეთდება სკოლაში ცენტრალური გათბობა.
როგორც მოგეხსენებათ, პრემიერის ინიციატივით, წელს 800 სკოლის რეაბილიტაცია მიმდინარეობს და ეს ინიციატივა შეეხო ჩოხატაურის რამდენიმე სკოლას. სულ 8 სკოლა რემონტდება 2 წლის განმავლობაში.
ამ ეტაპზე, ზაფხულში 5 სკოლის რეაბილიტაციას ვიწყებთ და ამ ხუთეულში არის ბუკნარის საჯარო სკოლაც. როცა სრული რეაბილიტაცია მოხდება, რა თქმა უნდა, ცენტრალური გათბობაც მაშინ იქნება.
გათბობის სისტემა ზოგ სკოლაში ელექტროენერგიაზეა, ზოგ სკოლაში გაზზეა და ზოგან შეშის “ბრიკეტებითაც” ვთბებით.
რაც შეეხება რეაბილიტაციას, ის შეეხება არა მარტო ბუკნარის სკოლა, არამედ 2-3 წელიწადში, ალბათ, ყველა სკოლას. როგორც იცით, 7 ახალი სკოლა აშენდა ჩოხატაურის მუნიციპალიტეტში. 3-ის სრული რეაბილიტაცია მიმდინარეობს _ ეს არის ბუკისციხის, სამებისა და ვან-ზომლეთის საჯარო სკოლები, სადაც, ცხადია, ცენტრალური გათბობა დამონტაჟებული იქნება”, _ ამბობს ქალბატონი შორენა ჩვენთან საუბრისას.
