წლის დასაწყისში, საქართველოს მთავრობამ მასშტაბური პროექტის დაწყება დააანონსა _ სახელმწიფო პროგრამის _ “განახლებული რეგიონები“ არსი ძალიან მნიშვნელოვანია და ქვეყნის 63 მუნიციპალიტეტს მოიცავს.
პროგრამა აფინანსებს ისეთი ტიპის პროექტებს, როგორებიცაა: მნიშვნელოვანი კულტურული თუ ისტორიული მემკვიდრეობის ობიექტების რეაბილიტაცია; მუნიციპალიტეტების ადმინისტრაციული ცენტრების რეაბილიტაცია; რეკრეაციული სივრცეების მოწყობა და რეკრეაციულ პარკებში შესაბამისი ტურისტული ინფრასტრუქტურის განვითარება; მუნიციპალიტეტისათვის მნიშვნელოვანი საზოგადოებრივი ობიექტების მშენებლობა; ქალაქების, კურორტებისა და დასახლებების ურბანული განახლების საპროექტო დოკუმენტების შემუშავება.
პრემიერ-მინისტრის ინიციატივით დაწყებული ამ სახელმწიფო პროგრამის ფარგლებში, 160 მილიონი ლარის ღირებულების ტენდერები პირველ ეტაპზე გამოცხადდა საქართველოს რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდის მიერ და მოიცავს დასავლეთ საქართველოს ოცდათოთხმეტივე მუნიციპალიტეტს. გამოცხადებული 8 ტენდერიდან, თითოეულის მოცულობა 20 მილიონი ლარია.
ამ ტენდერების შედეგად, უნდა გამოვლენილიყო საპროექტო და სამშენებლო კომპანიები, რომლებიც მოამზადებდნენ სპეციალური კომისიის მიერ შერჩეული ობიექტების ურბანული განახლების პროექტებს და შეასრულებდნენ ამავე დოკუმენტაციით განსაზღვრულ სამშენებლო-სარეაბილიტაციო სამუშაოებს.
მუნიციპალური განვითარების ფონდის ვებგვერდზე განთავსებული ინფორმაციის თანახმად, ურბანული განახლების პროექტების მომზადებისას, გათვალისწინებული უნდა ყოფილიყო თითოეული რეგიონის მახასიათებლები, ისტორიულ-კულტურული თავისებურებები და ობიექტების ფუნქციური დანიშნულება. ამავე ოფიციალური ინფორმაციით, სპეციალურ კომისიას უნდა განესაზღვრა ურბანული განახლების კონკრეტული პროექტები და ობიექტები, და ამ კომისიის შემადგენლობაში იქნებოდნენ როგორც ადგილობრივი თვითმმართველობის, ისე ცენტრალური ხელისუფლების წარმომადგენლები და სივრცითი დაგეგმარების სპეციალისტები.
ამ გრანდიოზული პროგრამის ხანგრძლივობა 4 წელია და მხოლოდ პირველი ეტაპის საორიენტაციო ღირებულება ნახევარი მილიარდი ლარია.
სამწუხაროდ, როგორც ხშირად ხდება, პროექტების რეალიზებისას, მიზანი სრულიად განსხვავებულია რეალობისგან და ამის მაგალითი, ამ პროგრამის ფარგლებში მიმდინარე სამუშაოებია, თუნდაც კონკრეტულად ჩოხატაურის მუნიციპალიტეტში.
“გურია ნიუსი“ ჟურნალისტურ მოკვლევას ამზადებს გურიაში ამ პროგრამის გახორციელების შესახებ და შესაბამისად, მივმართეთ საჯარო უწყებებს. მათ შორის, ადგილობრივ ხელისუფლებას და ცხადია, გურიის გუბერნატორს, რადგან საქართველოს კანონმდებლობით, სწორედ გუბერნატორია აღმასრულებელი ხელისუფლების წარმომადგენელი სახელმწიფო პროგრამების მონიტორინგის ფუნქციით; შესაბამისი ტერიტორიული საზღვრების ფარგლებში, სწორედ გუბერნატორი მონაწილეობს რეგიონული განვითარების ღონისძიებებში.
გუბერნატორი გიორგი ურუშაძე, ცოტა ხნის წინ დაინიშნა ამ თანამდებობაზე და საზოგადოება არც კი იცნობს. იგი მედიასთან კომუნიკაციით არ გამოირჩევა და ბოლო დღეებში, მხოლოდ რამდენიმე წინასაარჩევნო შეხვედრაზე ჰქონდა არც მთლად შთამბეჭდავი გამოსვლა. გუბერნატორის პრესსამსახურმა, დიდი ვარაუდით, ურუშაძის სურვილითვე, ამ საკითხებზე პირდაპირი საუბრის ფორმატს თავი აარიდა და კითხვების გადაგზავნა მოითხოვა.
რადან საკითხი ძალიან მნიშვნელოვანია და მილიონობით ლარის ბედს ეხება, თან, გავითვალისწინეთ, რომ ურუშაძეს პირდაპირი კომუნიკაცია მედიასთან გამოუცდელობის გამო ალბათ, ჯერ კიდევ უჭირს, კითხვებიც გადავგზავნეთ. მესამე დღეს, როცა პასუხი მოვიკითხეთ, უპრეცენდენტო პასუხი მივიღეთ _ ვერ ვიხსენებთ შემთხვევას, როცა საჯარო მოხელეს, ნებისმიერი ხელისუფლების დროს, თავისთვის უფლება მიეცეს ამ ფორმულირებით ეპასუხა მედიასაშუალებისთვის: “ამ ეტაპზე, სახელმწიფო რწმუნებულს არ სურს ინტერვიუ და თავი შეიკავა“ (?!).
აქვე ვაქვეყნებთ შეკითხვებს, რომელზეც პასუხი გიორგი ურუშაძეს (იგი გურიის გუბერნატორი გახლავთ!) “არ სურს“: 1. იცნობთ თუ არა პროგრამას “განახლებული რეგიონები“?
- გაქვთ თუ არა ინფორმაცია, რა ჯდება გურიაში ამ პროგრამის გახორციელება?
- გაქვთ თუ არა ნანახი გურიის სამივე მუნიციპალიტეტში გასახორციელებელი პროექტები, თუ მოეწყო ამ პროექტების განხილვა საზოგადოებასთან ან თუ გამოქვეყნდა დეტალური ინფორმაცია ამ პროექტების შესახებ, რომ საზოგადოებასაც გაეგო რა კეთდება?
- ვინაა პასუხისმგებელი სამუშაოების შესრულების მონიტორინგზე და რამდენადაა ამ საქმეში ჩართული ადგილობრივი თვითმმართველობა?
- პირადად თქვენ, როგორც მთავრობის მეთვალყურეს, ზედამხედველობის ინსტიტუტის წარმომადგენელს, თუ გაქვთ ნანახი, როგორ ხორციელდება ეს პროგრამა გურიის მუნიციპალიტეტებში? როდის გეგმავთ მონიტორინგი გაუწიოთ ამ სახელმწიფო პროგრამის ფარგლებში უკვე შესრულებულ სამუშაოებს?
საინტერესოა, როდის “მოესურვება“ ინტერვიუ გურიის გუბერნატორს და როდის დაუმთავრდება “თავშეკავების ეტაპი“. ხვალ კი საქართველოში ადგილობრივი თვითმმართველობის არჩევნებია, რომელიც, სამწუხაროდ, უკიდურესად პოლარიზებულ გარემოში ტარდება. ამ პოლარიზაციის შექმნა კი დიდწილად, მმართველი პარტიის საკადრო პოლიტიკას უკავშირდება, რომელიც საზოგადოების გაღიზიანებას, ინსტიტუტების გაუმართავ მუშაობას და ადგილებზე მილიონობით ლარის ცუდად, უხარისხოდ ხარჯვას განაპირობებს.
ავტორები: გიორგი გირკელიძე, ია მამალაძე
