ბუნებრივი აირით ლანჩხუთის მუნიციპალიტეტის სოფლების უზრუნველყოფა ადგილობრივი მოსახლეობისთვის ერთ-ერთი აქტუალური თემაა, მათ შორის, იმ სოფლებშიც, სადაც გაზიფიცირებისთვის საჭირო სამუშაოები 2017 წელს გახორციელდა. საქმე ისაა, რომ მთავრობის განკარგულებით, ამ მხრივ საჭირო სამუშაოები ნიგოითის ადმინისტრაციულ ერთეულში შემავალ ხუთივე სოფელში ერთი წლის წინ შესრულდა, თუმცა, მოსახლეობას ბუნებრივი აირი დღემდე არ მიეწოდება და მათთვის ჯერაც პასუხგაუცემელ კითხვად რჩება, როდის ექნებათ ოჯახებში გაზი.
“ერთი წელზე მეტია, სისტემა გაკეთებულია და დღემდე ვერ მოხერხდა გაზის შემოყვანა. წესიერად ვერც გავიგეთ, რა არის ამის მიზეზი. ადრე ტექნიკური პრობლემების შესახებ იყო საუბარი, მერე თქვეს, ქონების გადაბარების პრობლემა შეიქმნაო. თუმცა, არავინ იცის ამ საქმის ასე გაჯანჯლების რეალური მიზეზი. პირად საუბრებში გაზის კომპანიის თანამშრომლებმა გვითხრეს, რომ მომავალი წლის დასაწყისში გექნებათ გაზიო. ზოგმა ისიც თქვა, გაზაფხულამდე არ მოხდება შემოყვანაო.
თავის დროზე ბევრი ვიბრძოლეთ, არა ერთი აქცია გავმართეთ და მივაღწიეთ იმას, რომ გაზიფიცირება მომხდარიყო, მაგრამ თუ გაზი არ ჩაგვირთეს, რად გვინდა ტყუილად ეს მილები?!” _ ამბობენ გაურკვევლობაში მყოფი ნიგოითის ზონის მაცხოვრებლები.
“გურია ნიუსი” მოსახლეობის მხრიდან დასმულ კითხვაზე პასუხის მისაღებად მერის პირველ მოადგილეს გოგი ფაცურიას დაუკავშირდა. ფაცურია ამბობს, რომ სისტემა უკვე გამართულია და მზადაა ბუნებრივი აირის გასაშვებად, თუმცა, ვერ აკონკრეტებს, როდის შეძლებს ნიგოითის ზონის მოსახლეობა ბუნებრივი აირის შეყვანას:
“შემოწმებულია და გამართულია სისტემა, მაგრამ ამ ეტაპზე კონკრეტული დროის დასახელება, როდიდან მოხდება ოჯახებში გაზის შეყვანა, არ შემიძლია. როგორც კი დაზუსტდება ეს, აუცილებლად ჩაგაყენებთ საქმის კურსში”, _ გვითხრა ფაცურიამ.
ნიგოითის მაჟორიტარი დეპუტატი ლანჩხუთის საკრებულოში ზაზა წულაძე ადასტურებს, რომ მაგისტრალი სრულ მზადყოფნაშია გამართული მუშაობისთვის და უახლოეს დღეებში გამრიცხველიანების პროცესის დაწყებასაც აანონსებს:
“ტექნიკური ხარვეზები, რომელიც იყო მაგისტრალზე, გამოსწორებულია, ამ დღეებში მოხდა მისი ტესტირება და დაიწყება მოსახლეობიდან განცხადებების მიღება გამრიცხველიანებასთან დაკავშირებით”, _ ამბობს სოფლის მაჟორიტარი.
