“მინდა, მკაფიოდ განვაცხადო და ერთმნიშვნელოვნად, რომ საქართველო, ჩვენი ეროვნული ინტერესების და ხალხის ინტერესების გათვალისწინებით, არ აპირებს მონაწილეობა მიიღოს ფინანსურ და ეკონომიკურ სანქციებში, ვინაიდან აღნიშნული მხოლოდ დააზიანებს გაცილებით უფრო მეტად ჩვენს ქვეყანას და ჩვენს მოსახლეობას”,_ პრემიერ-მინისტრ ირაკლი ღარიბაშვილის მიერ გაკეთებულმა ამ განცხადებამ დღეს საზოგადოების ნაწილის აღშფოთება გამოიწვია.
პრემიერის ამ გადაწყვეტილების შეფასება გურულ ოპოზიციონერ პოლიტიკოსებს ვთხოვეთ.
“ერთიანი ნაციონალური მოძრაობის” ოზურგეთის ორგანიზაციის თავმჯდომარე, დავით მჟავანაძე ჩვენთან სატელეფონო საუბრისას ამბობს, რომ მსგავსი სამარცხვინო განცხადების გაკეთებას ჯობდა, ხელისუფლებას განცხადება საერთოდ არ გაეკეთებინა.
“ეს იყო ყველაზე სამარცხვინო გადაწყვეტილება. მთელი დღე მთელი ქვეყანა შეშფოთებული იყო იმის გამო, რომ 6-7 საათი დასჭირდა საქართველოს მთავრობას გაეკეთებინა განცხადება უკრაინასთან მიმართებაში, მაგრამ მე ვფიქრობ, რომ ამ სამარცხვინო განცხადების გაკეთებას ჯობდა საერთოდ არ გაეკეთებინათ. aსეთ განცხადებებს აკეთებენ ადამიანები, რომლებიც რუსული გავლენების ქვეშ არიან. სხვანაირად, 2008 წელს უკრაინის პრეზიდენტს არ ჰქონდა თავისი საქმე ? თუ მაშინ როცა თბილისისკენ იყო რაკეტები მომართული და საქართველოს ტერიტორია იბომბებოდა, არ შეიძლებოდა საფრთხე შექმნოდა უკრაინის სახელმწიფოს? მაგრამ უკრაინის პრეზიდენტმა მიიღო სწორი გადაწყვეტილება. არ დაგვხმარებია მხოლოდ საქართველოში ჩამოსვლით. როგორც ვიცით, შეიარაღებული ძალებითაც გვეხმარებოდა და რა შესაძლებლობებიც ჰქონდა, მაქსიმუმი გააკეთა. როცა საქმე ეხება მეგობარს, პარტნიორ სახელმწიფოს, რომელიც არის მტერი და რომელსაც შენი ქვეყნის 20% ოკუპირებული აქვს და შენ ამბობ, რომ ომი უკრაინაში მიმდინარეობს და არ აპირებ სანქციებში მონაწილეობა მიიღო, ეს არის პირდაპირ მუხანათური და მოღალატეობრივი განცხადება. ეს რუსეთის მხარეს დგომაა და მეტი არაფერი”,_ ამბობს მჟავანაძე.
მჟავანაძე აღნიშნავს, რომ დღეს ხელისუფლების უმოქმედობა საქართველოს მომავალში მძიმედ დააწვება და იმედოვნებს, რომ უკრაინა და დასავლეთი ქართველი ხალხის დამოკიდებულებას სწორად გაიგებენ.
“ძალიან მძიმედ დააწვება საქართველოს სახელმწიფოს დღევანდელი მთავრობის უმოქმედობა. ამის შედეგს, სამწუხაროდ, ჩვენ გადავიხდით. რა ჰგონია პრემიერ-მინისტრს, რომ თუ უკრაინაში გაიმარჯვებს პუტინი ამით დაკმაყოფილდება და საქართველოს არ მოადგება? რათქმა უნდა ღმერთმა ნუ ქნას. უკრაინაში ომის მოგება ნიშნავს, რომ ხვალ საქართველოსაც მოადგება, ბალტიისპირეთსაც, დამატებით კიდე პრობლემებს შექმნის იმ სახელმწიფოებში, სადაც ჯერ კიდევ შეჭრილი არ არის. ღიად აცხადებს კრემლი, რომ საბჭოთა კავშირი უნდა აღადგინოს. დღეს ბრძოლის ხაზი არის უკრაინა და ყველაფერი უნდა გავაკეთოთ, რომ უკრაინაში პუტინმა ვერ გაიმარჯვოს და ფეხი ვერ მოიკიდოს. იმედი მაქვს, ჩვენი დასავლელი მეგობრები და უკრაინაც გაიგებენ იმას, რომ ეს არ არის ქართველი ხალხის დამოკიდებულება. ეს არის კრემლის წარმომადგენლების დამოკიდებულება, რომლებიც დღეს მოკალათებულნი არიან და ქვეყანას მართავენ. ხალხის განწყობა არის აბსოლუტურად სხვა და ეს განწყობა გამოჩნდა გუშინ თბილისის ქუჩებში”,_ ამბობს მჟავანაძე.
პარტია “ლელოს” წევრი ლანჩხუთიდან, გოჩა ჯანაშია პრემიერის განცხადებას სისულელეს და ბოდვას უწოდებს.
“სისულელე და ბოდვაა. ჩვენი ხელისუფლება ზედმეტად ფრთხილ პოლიტიკას აწარმოებს ამ არგაღიზიანების პოლიტიკით, მაგრამ რაღაც სიტუაციაში სათქმელი აუცილებლად უნდა ითქვას რბილად მაინც. ამ შემთხვევაში პრემიერი რუსეთზე მსოფლიო წამყვანი ქვეყნების მხრიდან ზეწოლის წინააღმდეგი არ უნდა ყოფილიყო. რუსეთის შეჩერება შესაძლებელია მხოლოდ ამ მეთოდებით”,_ ამბობს ჯანაშია.
“ევროპული საქართველოს” თავმჯდომარე ჩოხატაურში, ლია ჩიგოგიძე ამბობს, რომ ძალიან ცუდი გადაწყვეტილებაა მიღებული.
“ეს არის ძალიან ცუდი, მოღალატეობრივი გადაწყვეტილება. ვფიქრობ, რომ ასეთი ადამიანები თანამდებობებს არ უნდა იკავებდნენ. საქართველო საფრთხის წინაშე ყოველთვის დგას. დღესაც საფრთხის წინაშეა და ის, რაც დღეს უკრაინაში ხდება, ხვალ, შესაძლოა, ჩვენთან მოხდეს”,_ გვითხრა ჩიგოგიძემ.
ინფორმაციისთვის, საომარი ქმედებები უკრაინაში მეორე დღეა რაც გრძელდება. ბოლო ინფორმაციით, ვლადიმერ პუტინი მზად არის, მინსკში რუსეთის დელეგაცია გააგზავნოს თავდაცვის სამინისტროს, საგარეო საქმეთა სამინისტროსა და პრეზიდენტის ადმინისტრაციის წარმომადგენლების დონეზე, რათა უკრაინულ დელეგაციასთან მოლაპარაკებები გამართონ.
[sexy_author_bio]
