გაზაფხულის მოახლოებისთანავე ნებისმიერმა მეფუტკრემ თუ მოყვარულმა დამწყებმა, სასურველია ტყეებში, მაღალ ხეებზე ფუტკრის მართვეს დასაჭერად, ე. წ. ბუკი მოათავსოს.
წინათ ადამიანები ასეთ სათავსოს, ძირითადად, ხის გადაჭრილი საშუალო მორის ამოღრმავებით აკეთებდნენ. ახლა უფრო ფიცრების შეჭედვით აკეთებენ ყუთებს, რომელსაც მერე ხეებზე ათავსებენ.
უმთავრესი არის ის, რომ ასეთი ყუთი თუ “ბუკი” ტყეებში, მაღალ ხეებზე ისეთ ადგილებში უნდა მოვათავსოთ, სადაც გზა ნაკლებად გადის, არის სრული სიჩუმე და ადამიანები არ მოძრაობენ. გასათვალისწინებელია, არ ისმოდეს მდინარის ხმაურიც კი, შორიდან მომავალი ტრანსპორტის თუ ქარხანა-დაწესებულების გუგუნი.
_ ფუტკრის მართვე კი არ უნდა დავიჭიროთ _ ეს სიტყვა არ ვიხმაროთ _ ის უნდა დავიბრუნოთ. ღვთიურ ფრინველს არანაირი მოძალადე ქცევა თუ სიტყვაც კი არ უნდა ვაკადროთ, _ ღიმილით გვეუბნებიან ფუტკრის მეგობრები _ ჯანვერდ ცეცხლაძე, გია მახარაძე, ავთო კალანდაძე.
მათი თქმით, მიუხედავად იმისა, რომ დღეს ფუტკრის ოჯახებზე განსაკუთრებული მზრუნველობა ხდება, ყოფენ ხელოვნურად _ მაინც აუცილებელია, რაც შეიძლება ნაკლები დანაკარგი იყოს.
_ მეფუტკრეობა სწრაფი ტემპით ვითარდება, მაგრამ მაინც მუდამ გამართლებულია ხალხური მეთოდები. ამიტომ არ უნდა დავიზაროთ ღვთიური ქართული ფუტკრის შინ მობრუნებისთვის ყოველი ღონე ვიხმაროთ. მით უფრო, როცა ბოლო წლებში, არა ერთგან მიყოლებით დაიხოცა დედა ფუტკრები, შემცირდა სკების რაოდენობა, _ ამბობენ ისინი.
