გაზაფხულის დადგომისთანავე, ადამიანებს უდიდესი სურვილი უჩნდებათ, როდის დააგემოვნებენ მარწყვს და თვალი ბაზრისკენ უჭირავთ. რა თქმა უნდა, ოჯახშიც ბევრს აქვს ეს უგემრიელესი კენკროვანი მცენარე.
ჩვენ ახლა გვსურს, ტყის მარწყვზე გესაუბროთ, რომელიც ბალახოვანი მცენარეა, აქვს ხუთფურცლიანი ყვავილი, პატარა, წითელი უგემრიელესი და სურნელოვანი ნაყოფი, რომელიც ივლისში მწიფდება.
საქართველოს კუთხეებში მას ზოგან წიამპოლას, ზოგან კიდე წიწინდერას და დანდალას ეძახიან.
ველური ტყის მარწყვი უხვად გვხვდება გურიაშიც, განსაკუთრებით იქ, სადაც მზეც კარგად წვდება.
მინდა, პირველ რიგში, ქალბატონებს ვურჩიო, თუ როგორ საუკეთესო და შედეგიანია ასეთი ველური მარწყვის ნიღაბი. ოღონდ გავითვალისწინოთ ისიც, რომ მათ, ვისაც გააჩნია სხვადასხვა მცენარის მიმართ ალერგიული გამოვლინება, უნდა მოერიდონ. ვისაც ეს არ გაწუხებთ, ძალზე ადვილია, მოამზადოთ ველური მარწყვის ნიღაბი _ კარგად დაჭყლიტეთ და თუნდაც ყოველდღიურად დაიდეთ სახეზე ნახევარი საათით. მერე გაიწმინდეთ, ჩამოიბანეთ და თხლად წაისვით რომელიმე დღის კრემი _ სახის კანი მკვრივი, ელასტიური და ერთგვარად ცოცხალი გახდება.
რაც შეეხება ნაყენს, რომელიც სხვადასხვა დაავადებისთვის გამოიყენება, გთავაზობთ მის ზოგიერთ რეცეპტს:
_ მარწყვის ფოთლები აუცილებლად გამხმარი უნდა გამოიყენოთ. ერთ სუფრის კოვზ გამხმარ მასას ერთი ჭიქა მდუღარე წყალი დაასხით. დადგით ორთქლზე და ასე გააჩერეთ ოცი წუთით. როცა გადმოდგამთ, გაგრილდეს, გაწურეთ. დალიეთ მესამედი ან ნახევარი ღვინის ჭიქა, დღეში ორჯერ ან სამჯერ, ჭამის წინ. ძალიან კარგია კუჭ-ნაწლავისთვის, ასევე, შაქრიანი დიაბეტის დროს.
_ ანემიის დროს ძალიან კარგია თუ ტყის მარწყვის, გვირილას და კრაზანას თანაბარი რაოდენობით, ვთქვათ, თითო ჩაის კოვზს დავასხამთ ერთ ლიტრ ადუღებულ წყალს, დავდგამთ ორთქლზე, ნახევარი საათით. შემდეგ გავწურავთ და სამ სუფრის კოვზს დავლევთ დღეში სამჯერ, ჭამის წინ.
_ ტყის მარწყვის წვენს, ასევე, ნახარშს და ნაყენს გააჩნია ძლიერი შარდმდენი, ასევე, ოფლმდენი უნარი; აუმჯობესებს მადას.
_ ტყის მარწყვი ძალიან კარგი დიეტური საშუალებაცაა. ასევე, გამოირჩევა ათეროსკლეროზის და ჰიპერტონიის საწინააღმდეგო თვისებებით. ამიტომ, კარგია, თუ არ დაგეზარებათ, მოძებნით და მოკრეფთ მას, რომელიც საკმაოდ უხვადაა ჩვენში და მიირთმევთ სურვილის მიხედვით.
მკითხველს შევახსენებ, რომ ველური მარწყვის ნაყოფი, მუდამ მაღალ ყუნწზე, ე.წ. თავდახრილ მდგომარეობაში მწიფს და ამით ხილულად განსხვავდება საჭმელად უვარგისი, სარეველა “გველის მარწყვისგან”, რომელიც დეკორატიული თვალსაზრისით ლამაზია, თუმცა, საკვებად არ გამოდგება.
გალინა წიტაიშვილი
