ჩოხატაურში _ ცენტრალური მოედნის მოწყობა და დუმბაძის ქუჩის მოწესრიგება, პრემიერის პროგრამის “განახლებული რეგიონების” ფარგლებში გასულ წელს დაიწყო.
პროექტის ფარგლებში რამდენიმე შენობის, მათ შორის კინოს სახლის ფასადიც განახლდა, მაგრამ სამუშაოები ბოლომდე მიყვანილი ჯერ არ არის. უფრო მეტიც, იქმნება შთაბეჭდილება, რომ მუნიციპალიტეტში, ამ პროექტის ფარგლებში საერთოდ არაფერი აღარ კეთდება.
ცენტრში, ხელოვნების სასახლის წინ სადაც პარკი უნდა გაკეთდეს, გადათხრილია ტერიტორია, რასაც ადრე მანქანები სადგომად იყენებდნენ. ფილების ნაწილი კი რომელიც დუმბაძის ქუჩაზე უნდა დაიგოს, ისევ ხელუხლებად ალაგია.
რა ეტაპზეა პრემიერის პროგრამა ჩოხატაურში – ამის გასარკვევად მერიის ინფრასტრუქტურის სამსახურის უფროსს, მერაბ ბერძენიშვილს ვესაუბრეთ.
როგორც ირკვევა, სამუშაოების გასაგრძელებლად ახალ პროექტს ელოდებიან, რადგან პროექტი, რომელიც უკვე არსებობს, ჩოხატაურის ცენტრის შესაბამისი არ აღმოჩნდა.
„პროექტირების ეტაპზეა. შეუსაბამობა იყო ზომებთან დაკავშირებით, რის გამოც შევაჩერეთ სამუშაოები და ველოდებით პროექტს“,_ ამბობს ბერძენიშვილი.
ბერძენიშვილის თქმით, ცენტრში ზომებია დარღვეული და სამუშაოების გაგრძელების შემთხვევაში ავარიული სიტუაციების თავიდან არიდება შეუძლებელი იქნებოდა.
„მაგალითად, ზომები დარღვეულია ცენტრში, საავარიო სიტუაცია იქმნება, ამის გამო მასშტაბი უნდა შემცირდეს, რომ ავირიდოთ ავარიები თავიდან. არის კიდევ დაგებულ ქვაფენილებზე შენიშვნები, რაც გამოსასწორებელია“,_ ამბობს ბერძენიშვილი.
ინფორმაციისთვის, სამუშაოები შპს “აღმაშენებელი ქუთაისმა” განახორციელა. კომპანიამ, მაისში, ერთხელ დაგებული ფილები აყარა და ხელახლა დააგო. ამის მიზეზად კი მაშინ კომპანიიდან ბესო გუბელაძემ “გურია ნიუსს” განუცხადა, რომ ხარვეზების გასწორება მიმდინარეობდა და აღნიშნული მონაკვეთი დამოუკიდებლობის დღემდე უნდა დასრულებულიყო, მაგრამ ეს მხოლოდ დუმბაძის ქუჩის ცალ მხარეს ეხებოდა.
ამ დროისთვის, ჯერჯერობით ჩვენთვის უცნობია, ელოდება თუ არა ხელხლა აყრა და კიდევ ერთხელ თავიდან დაგება უკვე დაგებულ ფილებს.
თუმცა ქალაქის იერსახესთვის და ასევე მაცხოვრებლებისთვის დისკომფორტს მხოლოდ აქა-იქ დაწყობილი ფილები და ხელოვნების სასახლის წინ გადათხრილი პარკისთვის გამოყოფილი ტერიტორია არ ქმნის.
მოქალაქეები, რომლებსაც ორპირას მიმდებარე ტერიტორიაზე გავლა ყოველდღე უწევთ, ამბობენ, რომ ადრე ტერიტორია უპატრონოდ მიტოვებულს გავდა, ახლა კი ისეა გადათხრილი, მთელი ქალაქი უპატრონოს დაემსგავსა.
„ამბობენ, რომ კეთდება, მაგრამ როდისღა? გადათხრლია ყველაფერი. ადრე ცენტრალური გზით რომ წახვიდოდი რამეს მაინც ნახავდი, აქაურობა კი უპატრონოს ჰგავდა. ახლა იქაც გადათხრილია ყველაფერი და აქაც“,_ ამბობენ მოქალაქეები და საკუთარ ვინაობას არ გვიმხელენ.
ცნობისთვის, ჩოხატაურში კიდევ ერთი პროექტი ხორციელდება, რომელიც ორპირას სანაპიროს მოწყობას ისახავს მიზნად.
სამუშაოების მიმდინარეობის პროცესში სრულად გადათხრილია მდინარის კალაპოტი.
„ორპირას სამუშაოები მიმდინარეობს. დასრულების ვადა ორი თვით ჰქონდა კომპანიას გადაწეული, შემდეგ უკვე შესრულებულ სამუშაოს ვაკვირდებოდით და ამის მიხედვით მივეცით მეტი ვადა. მათ დაარღვიეს ბევრი რამ, ბევრი შეუთანხმებლობაც იყო და ამ პროექტის ჩავარდნა რომ არ შეიძლბა, ამიტომ ვექცევით ესე ლოილაურად“,_ გვითხრა მერაბ ბერძენიშვილმა.
ცნობისთვის, ორპირას რეაბილიტაცია სამ ნაწილად დაიყო. პირველი ნაწილი, რომელიც უკვე გაკეთებულია “ავერსის” მიმდებარე ტერიტორიიდან იწყება და “ვისოლთან” მდებარე ხიდამდე არსებულ ტერიტორიას მოიცავს.
მეორე ნაწილი “ვისოლის” ბენზინგასამართ სადგურთან იწყება და მოდის პოლიციის შენობასთან მდებარე ხიდამდე; მესამე ნაწილი კი პოლიციის ხიდიდან სოციალური სააგენტოს შენობამდე უნდა მოვიდეს.
პროექტის მიხედვით, ტერიტორიაზე უნდა გაკეთდეს დასასვენებელი პარკი, მოწესრიგდეს ხიდები და განათებები.
